ខេត្តពោធិ៍សាត់ ៖ បុរសម្នាក់ទើបនឹងមកទិញដីចំការមួយកន្លែងថ្មីៗ ក៏យករណាយន្តទៅកាត់ដើមឈើ១ដើមធំក្នុងចម្ការនោះ ស្រាប់តែអកុសល មិនដឹងជាមានការធ្វេសប្រហែសយ៉ាងម៉េច ក៏ត្រូវដើមឈើរលំសង្កត់ខ្លួនឯង បណ្តាលឱ្យស្លាប់មួយរំពេច កាលពីវេលាម៉ោង៤រសៀល ថ្ងៃទី០១ ខែកក្កដា ឆ្នាំ២០១៨ នៅចំណុចបាក់ត្រាក្រោម ស្ថិតក្នុងភូមិអូរបាក់ត្រា ឃុំព្រងិល ស្រុកភ្នំក្រវាញ។
បុរសរងគ្រោះដែលត្រូវដើមឈើរលំសង្កត់ស្លាប់ មានឈ្មោះអូច ឌីន អាយុ៤៤ឆ្នាំ មានលំនៅក្នុងភូមិក្តោង ឃុំភ្នំសំពៅ ស្រុកបាណន់ ខេត្តបាត់ដំបង ទើបនឹងមកទិញដីចម្ការនៅខេត្តពោធិ៍សាត់។
តាមប្រភពពីកន្លែងកើតហេតុ បានឱ្យដឹងថា នៅមុនពេលកើតហេតុ ជនរងគ្រោះទើបនឹងមកទិញដីចម្ការមួយកន្លែងនៅទីតាំងកើតហេតុខាងលើ និងមានបំណងធ្វើចម្ការនៅទីតាំងខាងលើ។ លុះមកដល់ថ្ងៃកើតហេតុ ជនរងគ្រោះបានយករណាយន្ត១គ្រឿង ទៅកាត់ដើមឈើ នៅក្នុងបរិវេណដីចម្ការនោះតែម្នាក់ឯង ដើម្បីរៀបចំទីតាំងធ្វើចម្ការ ស្រាប់តែអកុសល នៅពេលដើមឈើនោះដួលរលំ ក៏បែរជាមកសង្កត់ពីលើជនរងគ្រោះ បណ្តាលឱ្យស្លាប់យ៉ាងអាណោចអាធ័ម និងត្រូវបានអ្នកជិតខាងម្នាក់ដើរទៅមើលប្រទះឃើញ ជនរងគ្រោះត្រូវដើមឈើសង្កត់លើស្លាប់ ក៏រាយការណ៍សុំអន្តរាគមន៍ពីសមត្ថកិច្ចតែម្តង៕