តារាចម្រៀងយុវវ័យ២ដួង មកពីផលិតកម្ម២ផ្សេងគ្នា នាងទេព បូព្រឹក្ស របស់ផលិតកម្មរស្មីហង្សមាស និងនាងសេន យូរី ហៅយូរី របស់ផលិតកម្មសាន់ដេ ត្រូវបានគេមើលឃើញថា អ្នកទាំង២ បានជ្រើសគូស្នេហ៍ គឺជាប្រុសក្មេង តារាចម្រៀងដែលជ្រកក្រោមដំបូលផលិតកម្មតែមួយដូចគ្នា បើទោះបីជាទាំងបូព្រឹក្ស និងយូរី ស្ថិតក្នុងក្រសែភ្នែកពីការប្រមាញ់ស្នេហ៍របស់មន្ត្រីធំៗក៏ដោយ។
ទោះជាយ៉ាងណា មហាជនបានលើកឡើងថា តើនាងទេព បូព្រឹក្ស និង យូរី នឹងអាចការពារស្នេហ៍ ដែលជាតារាចម្រៀងដូចគ្នានេះ បានដែលអាចនឹងដឹកដៃគ្នាចូលរោងការជាមួយគូស្នេហ៍រៀងៗខ្លួនបានដែរទេ? ឬមួយក៏អាចដើរតាមគន្លងតារាមួយចំនួន ដែលផ្លាស់ប្តូរដៃគូស្នេហា នៅពេលដែលមានជនទី៣ ចូលជ្រែកដោយអំណាចទឹកលុយ?
ទេព បូព្រឹក្ស ៖ អតីតតារាចម្រៀងផលិតកម្មរស្មីស្ទឹងសង្កែ និង TV Production រូបនេះ បានឈានចូលហង្សមាស នៅឆ្នាំ២០១០ ហើយនាងមិនមែនល្បីដោយសារការច្រៀងទឹមដមសំឡេងខ្លាំងក្លានោះទេ តែល្បីដោយសារការតែងខ្លួនបែបយុវវ័យ និងលេងក្បាច់រាំ ដែលទៅដល់ណា រង្គើឆាកនៅទីនោះ។ បូព្រឹក្ស ហៅស្រីនិច្ច ត្រូវបានអ្នកសិល្បៈជាច្រើនដឹងថា នាងមិនត្រូវគ្នាជាមួយរៀមច្បងនៅហង្សមាស នាងពេជ្រ សោភា ឡើយ ព្រោះធ្លាប់លេចឮថា សោភា ប្រកាន់បូព្រឹក្ស មិនសូវចេះគោរពរៀមច្បង ទើបធ្វើឱ្យអ្នកទាំង២ មើលមុខគ្នាមិនចំឡើយ រយៈពេលជិត១០ឆ្នាំនេះ។
ទោះជាយ៉ាងណា អ្វីដែលសឹងមិនគួរឱ្យជឿនោះ គឺនៅពេលដែលពេជ្រ សោភា បានយកងួន ចាន់ដេវីត ចូលហង្សមាស ដោយនាងជាអ្នកចេញមុខធានា ហើយពេលម្ចាស់បទ “រាំញីកែងជើង” ល្បីឈ្មោះនោះ ស្រាប់តែបូព្រឹក្ស ឆក់ដេវីត ឱ្យមកចាប់ដៃគូជាមួយនាងទៅវិញ ដែលធ្វើឱ្យតារាជាច្រើនស្រឡាំងកាំង។ មិនយូរប៉ុន្មានទេព បូព្រឹក្ស និងងួន ចាន់ដេវីត បានប្រកាសថា ពួកគេគឺជាគូស្នេហ៍ដែលស្រលាញ់គ្នាពិតៗចេញពីបេះដូង ហើយថ្មីៗនេះ គូស្នេហ៍យុវវ័យ១គូនេះ ថែមទាំងបានដាក់ទុនចូលគ្នារកស៊ី ដោយដាក់ទុនរួមគ្នាអស់១៤ម៉ឺនដុល្លារ បើកហាង XTBP ដែលចំណាយម្នាក់ៗ ៧ម៉ឺនដុល្លារទៀតផង។ ប៉ុន្តែ នៅពេលដែលត្រូវសួររឿងរៀបការទាំងបូព្រឹក្ស និងដេវីត អះអាងដូចគ្នាថា មិនទាន់គិតទេ គិតតែពីការរកស៊ី និងពង្រឹងអាជីពចម្រៀងសិន។ អ្វីដែលគួរឱ្យភ្ញាក់ផ្អើលផងដែរនោះ គឺទេព បូព្រឹក្ស ដែលបង្ហាញភាពស្អិតល្មួតជាមួយដេវីត កាន់តែខ្លាំងនោះ ស្រាប់តែមានដំណឹងគួរឱ្យភ្ញាក់ផ្អើលពេញស្រទាប់មហាជន និងអ្នកសិល្បៈថា តាមពិត តារារូបនេះមានគូស្នេហ៍លោកធំផ្កាយ៤ម្នាក់ នៅក្រោយខ្នងឧបត្ថម្ភឱ្យនាងទិញវីឡាតម្លៃ១៤ម៉ឺនដុល្លារ និងរថយន្តទំនើប Land Cruiser V8 តម្លៃជិត១០ម៉ឺនដុល្លារ តែបូព្រឹក្ស បញ្ជាក់ថា លុយទាំងនោះជាកម្លាំងញើសឈាមរបស់នាងផ្ទាល់ គ្មានអ្នកណាជួយផ្តល់ឱ្យឡើយ។
យូរី ៖ អតីតអ្នកចម្រៀងផលិតកម្ម Rock នេះ បានលោតចូលផលិតកម្មសាន់ដេ ហើយបានសាងស្នេហ៍ជាមួយអ្នកដឹកនាំសម្តែងផលិតកម្មនេះ គឺលោករ៉េត។ ប៉ុន្តែ នៅពេលដែលកេរ្តិ៍ឈ្មោះរបស់យូរី ហក់ឡើង ហើយចាប់ដៃគូជាមួយលោកប៉ីម៉ូ នោះ ហើយដែលធ្វើឱ្យអតីតសង្សារលោករ៉េត ចុកឈាម ព្រោះអ្នកទាំង២ បានបង្កាត់ភ្លើងស្នេហាជាមួយគ្នាហើយ ដើម្បីជាការបំបាក់មុខនាងយូរី លោករ៉េត ថែមទាំងបង្ហោះរូបភាពលោក និងយូរី បែបស្នេហាស្រើបស្រាលលើគ្រែ ផ្អើលពេញផ្ទៃប្រទេសទៀតផង។ ប៉ុន្តែ រហូតមកដល់ពេលនេះ នាងយូរី ហាក់លែងខ្វល់ខ្វាយពីសង្សារចាស់ទៀតហើយ ព្រោះនាងស្មគ្រ័ស្មោះស្នេហ៍តែលើប្រុសក្មេងប៉ីម៉ូ ម្នាកគត់ ដោយពួកគេទៅណាក៏បណ្តើរគ្នាយ៉ាងត្រសងដែរ។ ទោះជាយ៉ាងណា មិនទាន់មានដំណឹងចូលរោងការរបស់គូស្នេហ៍យុវវ័យនេះឡើយ។
មហាជនបានមើលឃើញថា ទេព បូព្រឹក្ស និងយូរី មានការប្រជែងគ្នាខ្លាំងលើទីផ្សារចម្រៀង ព្រោះថា តារាទាំង២នេះ ត្រូវបានគេចាប់អារម្មណ៍លើការតែងខ្លួនក្បាច់រាំច្រើន ជាងទឹកដមសំឡេងដូចគ្នា។ អ្វីដែលកាន់តែមានភាពទាក់ទាញថែមទៀតនោះ គឺទាំងបូព្រឹក្ស និងយូរី សុទ្ធតែជ្រើសរើសស្នេហ៍ប្រុសក្មេងជាដៃគូចម្រៀងជ្រកក្រោមដំបូលផលិតកម្មតែមួយដូចគ្នាហើយ ទាំងស្រីនិច្ច និងយូរី ត្រូវគូស្នេហ៍ធ្វើបទចម្រៀងឱ្យច្រៀងដូចគ្នាដែរ។ ប៉ុន្តែ គេចាំមើលថា ចំណងស្នេហាគូស្នេហ៍យុវវ័យទាំង២គូ នៅក្នុងផលិតកម្មផ្សេងពីគ្នា នាងទេព បូព្រឹក្ស-ងួន ចាន់ដេវីត និងយូរី-ប៉ីម៉ូ នេះ អាចរក្សាបានយូរអង្វែងដែរឬទេ ព្រោះថា ទាំងបូព្រឹក្ស និងយូរី សុទ្ធតែត្រូវបានមន្ត្រីធំៗ តាមដាក់អន្ទាក់ស្នេហ៍ដូចគ្នាផងដែរ តែអ្នកទាំងពីរមិនយកភ្នែកទៅមើលមន្ត្រីធំៗទាំងនោះឡើយ ព្រោះគេមានសង្សារក្មេងជាម្ចាស់បេះដូងទៅហើយ៕
