ព្រោះតែគំនុំ ព្រួតវ៉ៃគូទំនាស់របួសធ្ងន់២នាក់ ជាប់ខ្នោះ៥នាក់

ភ្នំពេញ ៖ មនុស្សប្រុសស្រី២ក្រុម បានជួបជុំគ្នាផឹកស៊ី២វង់ផ្សេងគ្នា តែនៅមុខបន្ទប់ជួលទល់មុខគ្នា លុះក្រោយពីផឹកស្រវឹងធ្លាក់ភ្នែក ក៏នឹកដល់គំនុំចាស់ ទើបឈានដល់ការឌឺដងពាក្យសម្តីដាក់គ្នា រហូតផ្ទុះជាអំពើហិង្សាព្រួតវាយកាប់ចាក់គ្នាទៅវិញទៅមក បណ្តាលឱ្យនារី២នាក់ ទទួលរងរបួសធ្ងន់ ចំណែកមនុស្សប្រុសស្រី៥នាក់ផ្សេងទៀត ត្រូវបានសមត្ថកិច្ចចាប់ឃាត់ខ្លួននាំយកទៅសាកសួរ។

ករណីអំពើហិង្សាខាងលើនេះ បានកើតឡើងកាលពីវេលាម៉ោង១និង០៥នាទីរំលងអធ្រាត្រ ឈានចូលថ្ងៃទី១៤ ខែកក្កដា ឆ្នាំ២០១៨ នៅចំណុចលើដងផ្លូវលេខ 259 កែង 138Z ក្រុមទី១៥ ភូមិ៤ សង្កាត់ទឹកល្អក់ទី១ ខណ្ឌទួលគោក។ ចំណែកជនសង្ស័យ៥នាក់ ត្រូវបានកំលាំងផ្នែកព្រហ្មទណ្ឌនៃអធិការដ្ឋាននគរបាលខណ្ឌទួលគោក ចុះឃាត់ខ្លួនបាន កាលពីវេលាម៉ោង៥ និង៣០នាទីល្ងាច ថ្ងៃទី១៤ ខែកក្កដា ឆ្នាំ២០១៨។

ភាគីទំនាស់ទី១ មានគ្នា៤នាក់ រួមមាន ទី១-ឈ្មោះឈាន ចាន់ធី ហៅយ៉ា ភេទស្រី អាយុ១៨ឆ្នាំ មុខរបរជាងអ៊ុតសក់ ទី២-ឈ្មោះចាន់ ដានី ហៅស្រីខួច ភេទស្រី អាយុ២៥ឆ្នាំ មុខរបរជាងអ៊ុតសក់ ទី៣-ឈ្មោះយិន ផល្លា ភេទស្រី អាយុ៥៤ឆ្នាំ មុខរបរមេផ្ទះ។ អ្នកទាំង៣ ស្នាក់នៅផ្ទះជួល លេខ១៨៦ ផ្លូវលេខ 138Z ក្រុមទី១៥ ភូមិ៤ សង្កាត់ ទឹកល្អក់ទី១ ខណ្ឌទួលគោក និងទី៤-ឈ្មោះជឹង ជុងដាយ ភេទប្រុស អាយុ២០ឆ្នាំ ជនជាតិវៀតណាម មុខរបរកម្មករកន្លែងលក់ខោអាវជជុះ ស្នាក់នៅផ្ទះជួលលេខ១៩ ផ្លូវលេខ១៨៩ សង្កាត់អូឡាំពិក ខណ្ឌចំការមន។

ចំណែកជនសង្ស័យភាគីទី២ មានគ្នា២នាក់ រួមមាន ទី១-ឈ្មោះហ៊ុល វណ្ណៈ ភេទប្រុស អាយុ៣៥ឆ្នាំ មុខរបរកងយោធពលខេមរភូមិន្ទ ឋានន្តរសក្តិ វរសេនីយ៍ទោ កងឯកភាព នាយកដ្ឋានហិរញ្ញវត្ថុអគ្គភស្តុភារហិរញ្ញវត្ថុ (ក.ព.ជ) ស្នាក់នៅផ្ទះលេខ 56Eo ផ្លូវលេខ១២២ ក្រុម១០ សង្កាត់មិត្តភាព ខណ្ឌ៧មករា និងទី២-ឈ្មោះជួន ផល្លី ភេទស្រី អាយុ៣៧ឆ្នាំ មុខរបរសិល្បការិនី ស្នាក់នៅផ្ទះជួលលេខ១៨៥ ផ្លូវលេខ 138Z ក្រុមទី១៥ ភូមិ៤ សង្កាត់ទឹកល្អក់ទី១ ខណ្ឌួទួលគោក (រងរបួសសៀតផ្កាខាងឆ្វេងធ្ងន់ កំពុងព្យាបាលរបួសនៅមន្ទីរពេទ្យព្រះកុសុមៈ)។

វត្ថុតាងចាប់យកមាន អាវុធខ្លី១ដើមម៉ាក BERETTA ផលិតនៅសហរដ្ឋអាមេរិក មានលេខ BER 570610 គ្រាប់ចំនួន១៥គ្រាប់ មានប័ណ្ណសំគាល់អាវុធខ្លីសមូហភាព ចុះបញ្ជីលេខ បក.២៣១២២ កពជ ថ្ងៃចេញប័ណ្ណ ២០-០៣-២០១៧ មានលិខិតបញ្ជាបេសកកម្មលេខ ៥៧,១៨ ចុះថ្ងៃទី១៥ ខែមករា ឆ្នាំ២០១៨ ផុតកំណត់ថ្ងៃទី៣០ខែធ្នូ ឆ្នាំ២០១៨ (ចាប់យកពីឈ្មោះ ហ៊ុល វណ្ណៈ)។

តាមប្រភពពីសមត្ថកិច្ច បានឱ្យដឹងថា កាលពីថ្ងៃទី១៣ ខែកក្កដា ឆ្នាំ២០១៨ វេលាម៉ោងប្រហែល៨យប់ ឈ្មោះជួន ផល្លី បានអង្គុយផឹកស៊ីនៅមុខបន្ទប់ជួល នៃផ្ទះលេខ១៨៥ ផ្លូវលេខ 138Z ក្រុមទី១៥ ភូមិ៤ សង្កាត់ទឹកល្អក់ទី១ ខណ្ឌទួលគោក ដោយផឹកស៊ីមានមិត្តភក្តិមកចូល រួមជាបន្តបន្ទាប់ចំនួន១០នាក់ ក្នុងនោះក៏មានឈ្មោះហ៊ុល វណ្ណៈ ជាសង្សារបស់ឈ្មោះជួន ផល្លី មកចូលរួមផឹកស៊ីដែរ លុះរហូតដល់ម៉ោង១២រំលងអធ្រាត្រ ស្រាប់តែមានឈ្មោះចាន់ ដានី ហៅស្រីខួច ឈ្មោះយិន ផល្លា ឈ្មោះឈាន ចាន់ធី ហៅយ៉ា និងឈ្មោះជឹង ជុងដាយ រួមនិងមិត្តភក្តិ ប្រុសស្រី៤នាក់ទៀត (មិនស្គាល់ឈ្មោះ) បានមកអង្គុយផឹកស៊ីនៅខាងមុខផ្ទះលេខ 186Z (ទល់មុខគ្នា)។ ក្នុងពេលភាគីទាំងពីរនេះកំពុងផឹកស៊ីនៅទល់មុខគ្នា និងដោយសារមានទំនាស់គ្នារឿងចាស់កន្លងមក ទើបឈ្មោះចាន់ ដានី ក៏បានឌឺដងពាក្យសំដីគ្នាមកលើឈ្មោះជួន ផល្លី ដោយឌឺទៅវិញទៅមក រហូតដល់ម៉ោងប្រហែល១និង០៥នាទី រំលងអធ្រាត្រ ឈានចូលថ្ងៃទី១៤ ខែកក្កដា ឆ្នាំ២០១៨ ភាគីឈ្មោះជួន ផល្លី និងឈ្មោះហ៊ុល វណ្ណៈ រួមនិងមិត្តភក្តិផ្សេងទៀត ក៏បានឈប់ផឹកស៊ី ព្រោះខ្លាចមានរឿង រួចក៏នាំគ្នាចេញទៅក្រៅ ស្រាប់តែឈ្មោះចាន់ ដានី ហៅស្រីខួច ឈ្មោះយិន ផល្លា ឈ្មោះឈាន ចាន់ធី ហៅយ៉ា និងឈ្មោះជឹង ជុងដាយ និងឈ្មោះចាន់ រស្មី ហៅទូច (គេចខ្លួន) មានបក្សពួកបន្ថែមទៀត បានជិះម៉ូតូកង់បី មកដល់ក៏រត់ទៅធ្វើសកម្មភាពវាយនិងគប់ទៅលើឈ្មោះជួន ផល្លី និងមិត្តភក្តិ (មើលតាមកាមេរ៉ាសុវត្ថិភាពផ្ទះលេខ១៨៥) ហើយក៏មានការ វាយប្រតាយប្រតប់គ្នាទៅវិញទៅមក បណ្តាលឱ្យត្រូវរបួសទាំងសងខាង ដោយក្នុងនោះឈ្មោះជួន ផល្លី ត្រូវរបួសសៀតផ្កាខាងឆ្វេងធ្ងន់ ចំណែកឈ្មោះឈាន ចាន់ធី ត្រូវរបួសក្បាលផ្នែកខាងឆ្វេងពីរកន្លែង ដោយសារឈ្មោះហ៊ុល វណ្ណៈ បានយកអាវុធខ្លីវាយ ហើយឈ្មោះ ហ៊ុល វណ្ណៈ បានអាម៉េអាវុធខ្លីការពារខ្លួន គំរាមកុំឱ្យភាគីម្ខាងទៀតចូលមកវាយទៀត ក្នុងការវាយទំនាស់គ្នាទៅវិញទៅមកគឺពុំមានការផ្ទុះអាវុធទេ ដោយបន្សល់ទុកនៅកន្លែងកើតហេតុមានដំបងឈើមូលមួយមាន ដំបងឈើមូលមួយមាន ដែករុំទាំងសងខាង មានប្រវែងប្រហែល៩តឹក ដែកដង អំបោសពណ៌ស១ដើម ប្រវែងប្រហែល៦តឹក កំទេចអំបែងដបស្រាបៀរមួយចំនួន និងម៉ូតូ១គ្រឿងម៉ាក YAMAHA EXCITER ពណ៌សលាយ ក្រហម ពាក់ស្លាកលេខ ស្វាយរៀង 1I-8278 លេខម៉ាស៊ីន 216798 (ជារបស់ភាគីទាំងពីរយកទៅគប់និងវាយគ្នាហើយចោលនៅកន្លែងកើតហេតុ)៕