ខេត្តកំពង់ធំ៖ យុវជន៣នាក់ កំពុងជិះម៉ូតូតាមដងផ្លូវ លុះឃើញយុវជនម្នាក់ជិះម៉ូតូស្របគ្នា បន្ថែមល្បឿនវ៉ាម៉ូតូរបស់ខ្លួន ក៏ស្រាប់តែផ្ទុះកំហឹង ហូតខ្សែក្រវាត់ដេញវាយយុវជនរងគ្រោះ បណ្តាលឱ្យហើមស្លាបប្រជៀវ ទីបំផុតត្រូវបានសមត្ថកិច្ចស្ទាក់ឃាត់ខ្លួនបានម្នាក់ ខណៈបក្ខពួក ២នាក់ទៀត បានរត់គេចខ្លួនបាត់អស់។
ករណីអំពើហិង្សានេះ បានកើតឡើងកាលពីវេលាម៉ោង៦និង៣០នាទីព្រលប់ ថ្ងៃទី១៥ ខែកក្កដា ឆ្នាំ២០១៨ នៅចំណុចព្រំប្រទល់ភូមិរការជួ និងភូមិពាមក្លែង ឃុំក្លែង ស្រុកសណ្តាន់។
ជនរងគ្រោះដែលត្រូវក្រុមក្មេងស្ទាវដេញវ៉ៃឈ្មោះអ៊ី សុខក្រី អាយុ១៨ឆ្នាំ ជាជនជាតិអ៊ីស្លាម មានលំនៅក្នុងភូមិបាជ័យ ឃុំសណ្តាន់ ស្រុកសណ្តាន់ (រងរបួសហើមស្លាបប្រចៀវខាងឆ្វេង)។ ចំណែកក្រុមជនសង្ស័យមានគ្នា៣នាក់ រួមមាន ទី១-ឈ្មោះយឹម ពឿន ភេទប្រុស អាយុ២២ឆ្នាំ មានលំនៅភូមិទឹកម្លាង ឃុំសណ្តាន់ ស្រុកសណ្តាន់ ជាអ្នកបើកបរម៉ូតូ (ឃាត់ខ្លួន) ទី២-ឈ្មោះយន ស៊ីណាន ភេទប្រុស អាយុ២៣ឆ្នាំ មានលំនៅភូមិត្បូងទឹក ឃុំមានរិទ្ធ ស្រុកសណ្តាន់ (រត់គេចខ្លួន) និងទី៣-ឈ្មោះវុទ្ធី ភេទប្រុស អាយុ២២ឆ្នាំ មានលំនៅភូមិបាជ័យ ឃុំសណ្តាន់ ស្រុកសណ្តាន់ ជាជនដៃដល់ (រត់គេចខ្លួន)។ ជនសង្ស័យទាំង៣នាក់ខាងលើ ជិះម៉ូតូ១គ្រឿង ម៉ាកហុងដាឌ្រីម សេ១២៥ ពណ៌ខ្មៅ ស៊េរីឆ្នាំ២០១៣។
តាមប្រភពពីកន្លែងកើតហេតុ បានឱ្យដឹងថា នៅមុនពេលកើតហេតុ ក្រុមជនសង្ស័យទាំង៣នាក់ និងជនរងគ្រោះបានជិះម៉ូតូក្នុងដំណើរ ស្របទិសគ្នាពីត្បូងទៅជើង លុះមកដល់កន្លែងកើតហេតុ ជនរងគ្រោះបានបន្ថែមល្បឿនម៉ូតូវ៉ាទៅមុខម៉ូតូរបស់ក្រុមជនសង្ស័យ ដើម្បីទៅឱ្យទាន់រថយន្តឪពុករបស់ខ្លួនដែលបើកខាងមុខ។ លុះពេលឃើញជនរងគ្រោះជិះម៉ូតូវ៉ាម៉ូតូរបស់ខ្លួនបែបនេះ ក្រុមជនសង្ស័យក៏ផ្ទុះកំហឹង ព្យាយាមបន្ថែមល្បឿនវ៉ាម៉ូតូជនរងគ្រោះវិញ នៅពេលទៅដល់ទន្ទឹមគ្នា ជនសង្ស័យឈ្មោះវុទ្ធី បានហូតខ្សែក្រវាត់វាយទៅលើជនរងគ្រោះ១ខ្សែក្រវាត់ត្រូវពី ក្រោយចំស្លាបប្រចៀវខាងឆ្វេង បណ្តាលឱ្យជាំហើម។