ស្រីក្មេងរូបស្រស់អស់រលីងពីខ្លួន ដោយសារត្រូវថ្នាំសណ្តំ

ភ្នំពេញ ៖នារីវ័យក្មេងរូបស្រស់ម្នាក់ រៀបនឹងដើរឆ្លងផ្លូវ ក៏ត្រូវស្ត្រី២នាក់ដើរមកចាប់ដឹកដៃឆ្លងផ្លូវ រួចក៏បាត់បង់ស្មារតីចេះតែដើរតាមគេ រហូតត្រូវស្ត្រីទាំង២នាក់ នាំឡើងជិះម៉ូតូចេញទៅកន្លែងស្ងាត់ ល្បួងដោះយកគ្រឿងអលង្ការអស់ពីខ្លួន  រួចក៏ដឹកយកមកទម្លាក់ចោលតាមផ្លូវ ធ្វើឱ្យ នារីរងគ្រោះដើរទាំងអារម្មណ៍រវើរវាយ និងត្រូវបានប្រជាពលរដ្ឋឃាត់សួរនាំ ទើបដឹងថា នារីរងគ្រោះត្រូវជនសង្ស័យដាក់ថ្នាំសណ្តំដោះយកគ្រឿងអលង្ការ។

ករណីនារីវ័យក្មេងត្រូវជនសង្ស័យដាក់ថ្នាំសណ្តំ ដោះយកទ្រព្យសម្បត្តិអស់នេះ បានកើតមានការភ្ញាក់ផ្អើលឡើង កាលពីវេលាម៉ោង ៦និង៣០នាទីព្រឹក ថ្ងៃទី១៧ ខែកក្កដា ឆ្នាំ២០១៨ នៅចំណុចផ្សារទួលពង្រ ស្ថិតក្នុងសង្កាត់ចោមចៅ១ ខណ្ឌពោធិ៍សែនជ័យ។

នារីរងគ្រោះមានឈ្មោះស្រីពៅ អាយុ១៧ឆ្នាំ មុខរបរកម្មការិនីរោងចក្រ ស្នាក់នៅក្នងបន្ទប់ជួលនៅភូមិត្រពាំងថ្លឹង សង្កាត់ចោមចៅទី១ ខណ្ឌពោធិ៍សែនជ័យ  និងមានស្រុកកំណើតនៅខេត្តកំពង់ចាម។

តាមសម្តីបុរសជាសន្តិសុខម្នាក់ ដែលយាមប្រចាំការនៅក្បែរកន្លែងកើតហេតុ បានឱ្យដឹងថា នៅមុនពេលកើតហេតុ គាត់បានប្រទះឃើញ នារីរងគ្រោះខាងលើ បានដើរតាមផ្លូវទាំងអារម្មណ៍មិននឹងនរ រួចក៏បានមកសួរគាត់ថា មានឃើញមិត្តភក្តិរបស់នាង២នាក់ទេ? លុះគាត់សួរនាំវិញ ក៏ប្រទះឃើញថា នារីរងគ្រោះ ហាក់និយាយស្តីត្រឡប់ត្រឡិនមិនដឹងខុសត្រូវ ទើបគាត់សង្ស័យថានាងត្រូវថ្នាំសណ្តំ ក៏ជួយឃាត់នាងទុក កុំឱ្យដើរទៅណា ដើម្បីទាក់ទងរកក្រុមគ្រួសារមកទទួលនាងយកទៅវិញ។

តាមសម្តីនារីរងគ្រោះ បានរៀបរាប់ប្រាប់ ទាំងអារម្មណ៍មិនទាន់ប្រក្រតីថា នៅមុនពេលកើតហេតុ នាងទើបនឹងដើរចេញពីផ្ទះបងប្អូន និងបម្រុងឆ្លងផ្លូវវេងស្រេង ស្រាប់តែភ្លាមនោះ ក៏លេចមុខស្ត្រី២នាក់ ម្នាក់ក្មេងម្នាក់ចំណាស់ បានដើរមកចាប់ដឹកដៃនាងឆ្លងផ្លូវ ធ្វើដូចជាមនុស្សធ្លាប់ស្គាល់គ្នាពីពេលណាមកអ៊ីចឹង។ លុះឆ្លងផ្លូវរួចហើយ នាងក៏ចាប់ផ្តើមវិលវល់ និយាយអ្វីក៏មិនចេញ និងចេះតែដើរតាមស្ត្រីទាំង២នាក់នោះ ហើយព្រមធ្វើតាមសម្តីគេរហូត ស្រាប់តែក្រោយមក ពេលនាងដឹងស្មារតីឡើងវិញ គឺនាងនៅម្តុំផ្សារទួលពង្រទៅហើយ។

បន្ទាប់ពីប្រមូលអារម្មណ៍ និងស្មារតីបានស្រួលបួល នារីរងគ្រោះក៏នឹកឃើញថា នៅក្នុងខ្លួននាងមានទូរស័ព្ទ iPhone 6 មួយគ្រឿង កងដៃប្លាកទីន៥កង និងលុយចំនួន១១ម៉ឺនរៀល។ ប៉ុន្តែពេលនេះ នាងបែរជាមានកាបូបលុយមនុស្សប្រុស១ និងមានថង់ក្រហមមួយ ដែល ក្នុងនោះមានខ្សែក១ខ្សែ ជាខ្សែដែក តែជ្រលក់មាស រីឯលុយកាក់ ទ្រព្យសម្បត្តិ និងគ្រឿងអលង្ការរបស់នាងបាត់អស់ទៅហើយ ហើយនាងសង្ស័យនាងត្រូវស្ត្រីសង្ស័យ២នាក់ដែលដឹកដៃនាងឆ្លងផ្លូវ ដាក់ថ្នាំសណ្តំយកទ្រព្យសម្បត្តិអស់ពីខ្លួនតែម្តង៕