អតីតតារាសម្ដែងជីដូនកាកី នាងស្រីម៉ុច ស្រាប់តែលេចមុខដើរបង្ហាញម៉ូដកណ្ដាលសណ្ឋាគារសូហ្វីតែល ភោគិត្រា ភ្នំពេញ កាលពីរាត្រីថ្ងៃទី២៣ ខែកក្កដា ឆ្នាំ២០១៨ ធ្វើឲ្យទាំងភ្ញៀវជាតិ និងអន្តរជាតិ តារាល្បីៗជាច្រើនដួង មានការភ្ញាក់ផ្អើលយ៉ាងខ្លាំង នៅពេលដែលនាងស្លៀកឈុតសិចស៊ីលេចខោក្នុង និងបញ្ចេញដើមទ្រួងយ៉ាងទ្រលុកទ្រលន់ ប៉ះជាមួយតារាចម្រៀងល្បីរបស់ថៃ នាង Katreeya English ក្នុងកម្មវិធីជប់លៀងរបស់គ្លីនិកកែសម្ផស្សមួយ ឈ្មោះ ”មជ្ឈមណ្ឌលឌែរម៉ូគ្លីនិក”។
អ្វីដែលកាន់តែធ្វើឲ្យគេគ្រប់គ្នាភ្ញាក់ផ្អើលខ្លាំង ចំពោះនាងស្រីម៉ុច ថែមទៀតនោះគឺអតីតកំពូលតារាសិចស៊ីរូបនេះ បានត្រូវរង្វាន់នូវទឹកប្រាក់៦,៦៦៦ដុល្លារ ដើម្បីទៅថែរក្សាសម្រស់នៅប្រទេសកូរ៉េ ទៀតផង ទើបធ្វើឲ្យស្រីម៉ុច អរសឹងហោះរត់ទៅឱបនាង katreeya English។
ក្រៅពីនាងស្រីម៉ុច ក៏មានតារាល្បីៗជាច្រើនដួងទៀត បានចូលរួមកម្មវិធីជប់លៀងនោះដែរ មានដូចជា យុគ ចិន្ដា ,គង់ សុជាតិ,សុគន្ធ និសា ,ម៉ាក សែនសូនីតា, បាន មុនីលក្ខណ៍, ពេជ្រ សិរីរ័ត្ន , ព្រះកាយ ច័ន្ទ , ឈួន សុវណ្ណឆ័យ , ទឹម រដ្ឋា , វីត វីត ជាដើម ដែលចូលរួមកម្មវិធីនេះ ខណៈដែលកន្លងមកធ្លាប់លេឮថាមានតារាល្បីៗជាច្រើនបានទៅកែសម្ផស្សនៅហាងឌែរម៉ូគ្លីនិក នេះ។
តាមការឲ្យដឹងពីលោកស្រីហូវ ដាណេ អគ្គនាយិកា ”ឌែរម៉ូគ្លីនិក”បានឲ្យដឹងថា “ពិធីខាងលើនេះធ្វើឡើងដើម្បីជាការថ្លែងអំណរគុណដល់អតិថិជនសំខាន់ៗ ដែលតែងតែគាំទ្រសេវាកម្មរបស់ឌែរម៉ូគ្លីនិក កន្លងមក។ ដើម្បីឲ្យកម្មវិធីកាន់តែមានភាពរីករាយនៃការជួបជុំគ្នានោះដែរអ្នកស្រីក៏បានរៀបចំឲ្យអ្នកសិល្បៈដែលចូលរួមច្រៀង សម្ដែង និងការបង្ហាញម៉ូដ ហើយពួកគេទាំងនោះមួយចំនួនធំ ក៏សុទ្ធតែឧស្សាហ៍ទៅកែសម្ផស្សនៅហាងអ្នកស្រីផងដែរ។ ដោយឡែក អ្នកនាងស្រីម៉ុច ដែលបង្ហាញខ្លួនក្នុងកម្មវិធីនេះ ព្រោះស្រីម៉ុច ជាមិត្តភក្ដិរបស់អ្នកស្រី ហើយគាត់ក៏ធ្លាប់មកទទួលសេវាកម្មពីហាងអ្នកស្រីផងដែរ”។ ដោយឡែក ចំពោះ Katreeya English វិញ អគ្គនាយិការូបនេះបានឲ្យដឹងថា ”ឌែរម៉ូគ្លីនិក” ជាដៃគូMs Clinic នៅបាងកក និង Mega Clinic ប្រទេសកូរ៉េខាងត្បូង ហើយ Katreeya English ជា Presenter និងជាតារាចម្រៀងម្នាក់ដែលតែងតែទទួលការថែរក្សាសម្ផស្សនៅគ្លីនិកនេះ។ ចំពោះតារាផ្សេងៗទៀត ត្រូវបានឌែរម៉ូគ្លីនិក អញ្ជើញសុទ្ធតែជា presenter ដែលមានតម្លៃខ្ពស់ និងតែងតែមកទទួលសេវានៅឌែរម៉ូគ្លីនិក”។
តារាចម្រៀងល្បីរបស់ថៃ katreeya English បានឡើងបកស្រាយចម្រៀងជូនដល់ភ្ញៀវទាំងអស់ឲ្យស្ដាប់កម្សាន្ដ និងរាំលេងផងដែរ ខណៈដែលតារាចម្រៀងហង្សមាស សុគន្ធ និសា ក៏បានច្រៀងបំពេរអារម្មណ៍ភ្ញៀវទាំងអស់យ៉ាងជក់ចិត្ត ស្របពេលដែលអ្នកចម្រៀងថោន សុគន្ធ ថេរ៉ាយុ បានយកក្រុមរាំទៅច្រៀងសម្ដែងឡើងរង្គើឆាកផងដែរ៕
