ខេត្តបន្ទាយមានជ័យ ៖ យុវជនចំនួន៣នាក់ កំពុងជិះម៉ូតូដឹកគ្នាសុខៗ ក៏ត្រូវក្មេងទំនើងមួយក្រុមមានគ្នា៤នាក់ ជិះម៉ូតូប្រដេញតាម រួចដកដាវសាំម៉ូរ៉ៃ១ដើមកាប់ប្រហារ បណ្តាលឱ្យយុវជនទាំង៣នាក់ រងរបួសរយះថ្ពាល់ រយះស្មា និងរយះក្បាលយ៉ាងដំណំ បង្កឱ្យមានការភ្ញាក់ផ្អើលឡើងកាលពីវេលាម៉ោងជាង៩យប់ ថ្ងៃទី១៧ ខែកញ្ញា ឆ្នាំ២០១៨ នៅចំណុចផ្លូវបំបែកជាបួននៃទឹកដីកាស៊ីណូផារ៉ាមែក ស្ថិតក្នុងភូមិសាមគ្គីមានជ័យ សង្កាត់ប៉ោយប៉ែត ក្រុងប៉ោយប៉ែត។
យុវជនរងគ្រោះទាំង៣នាក់ ដែលត្រូវក្មេងទំនើងកាប់បណ្តាលឱ្យរងរបួសធ្ងន់ រួមមាន ទី១-ឈ្មោះបឺត សុធា អាយុ១៩ឆ្នាំ (រងរបួសស្មាស្តាំ) ទី២-ឈ្មោះវ៉ន សម្ភស្ស អាយុ១៨ឆ្នាំ រងរបួសក្បាល និងស្មាស្តាំ និងទី៣-ឈ្មោះវិច្ចរ៉ា អាយុ២០ឆ្នាំ រងរបួសថ្ពាល់ស្តាំ។ ជនរងគ្រោះទាំង៣នាក់ខាងលើ ស្នាក់នៅចំណុចអគារបុគ្គលិកកាស៊ីណូហ្គោលដិន ក្នុងភូមិកើតហេតុ។
តាមប្រភពពីកន្លែងកើតហេតុ បានឱ្យដឹងថា នៅមុនពេលកើតហេតុ គេឃើញជនរងគ្រោះទាំង៣នាក់ខាងលើ ជិះម៉ូតូ១គ្រឿង ម៉ាកហុងដាឌ្រីម សេ១២៥ ស៊េរីឆ្នាំ២០១៧ ពណ៌ខ្មៅ ១គ្រឿងឌុបគ្នា ធ្វើដំណើរតាមផ្លូវ ស្រាប់តែភ្លាមនោះ ក៏លេចមុខជនសង្ស័យ១ក្រុម មានគ្នាចំនួន៤នាក់ជិះម៉ូតូ២គ្រឿង ម៉ាកហុងដាឌ្រីម សេសេ១២៥ ស៊េរីឆ្នាំ២០១៧ ពណ៌ក្រហម ១គ្រឿង និង១គ្រឿងទៀតម៉ាកឃ្លីក ពណ៌ខ្មៅ ប្រដាប់ដោយដាវសាម៉ូរ៉ៃ បានជិះប្រដេញតាម រួចកាប់ពីក្រោយដោយមិនដឹងពីមូលហេតុ បណ្តាលឱ្យយុវជនរងគ្រោះទាំង៣នាក់ខាងលើ ទទួលរងរបួសធ្ងន់ទាំងអស់គ្នាតែម្តង ។
ក្រោយកើតហេតុ ជនរងគ្រោះត្រូវបានគេបញ្ជូនទៅព្យាបាលនៅគ្លីនិកឯកជនមួយកន្លែងដែលនៅក្បែរនោះ។ ដោយឡែក ក្រុមជនសង្ស័យ បានគេចខ្លួនបាត់ដោយសុវត្ថិភាព៕