ភ្នំពេញ៖ បុរសដែលបង្កការភ្ញាក់ផ្អើលកាលពីវេលាម៉ោង១០ព្រឹក ថ្ងៃទី២៧ ខែធ្នូ ឆ្នាំ២០១៨ នៅចំណុចអគារសំណង់ Down town ស្ថិតនៅម្តុំច្រមុះជ្រូកក្បាលថ្នល់ តាមបណ្តោយផ្លូវព្រះមុន្នីវង្ស ក្នុងសង្កាត់ទន្លេបាសាក់ ខណ្ឌចំការមន។ មិនត្រូវបានស្គាល់ពីអត្តសញ្ញាណនោះទេ គ្រាន់តែពិនិត្យតាមភិនភាគ មានវ័យប្រមាណជាង៣០ឆ្នាំ ស្លៀកខោជើងវែងពណ៌ខ្មៅ អត់មានពាក់អាវ។
តាមប្រភពពីកន្លែងកើតហេតុ បានឱ្យដឹងថា នៅមុនពេលកើតហេតុ គេឃើញបុរសខាងលើ មិនដឹងជាធ្វើដំណើរពីណាមកណានោះទេ ស្រាប់តែសុខៗ ក៏ស្ទុះរត់សម្រុកចូលក្នុងការដ្ឋានសំណង់ខាងលើ ភ្លាមនោះសន្តិសុខ ដែលយាមប្រចាំការនៅច្រកទ្វារចូល បានចេញមកស្ទាក់ឃាត់ សួរនាំ ស្រាប់តែបុរសខាងលើមិនស្តាប់ ធ្វើឱ្យកើតមានការប្រតាយប្រតប់គ្នា បន្ទាប់មកបុរសរូបនោះ បានរត់ចូលទៅខាងក្នុងការដ្ឋាន និងបានឡើង ទៅលើរន្ទាដែក ដែលមានកម្ពស់ប្រមាណជាង២០ម៉ែត្រ ស្រែកឡូឡា ទាំងអារម្មណ៍រវើរវាយ និងចេះតែប៉ុនប៉ងលោតចុះដីទម្លាក់ខ្លួន បង្កឱ្យមាន ការភ្ញាក់ផ្អើលពីបងប្អូនប្រជាពលរដ្ឋ និងសមត្ថកិច្ចមូលដ្ឋានចុះអន្តរាគមន៍ដល់ទីតាំងកើតហេតុ។
ប្រភពដដែលបន្តថា លុះមួយសន្ទុះក្រោយមក ក៏មានសាច់ញាតិបុរសខាងលើ បានមកដល់ និងបានឡើងទៅជួយនិយាយបន្ទន់ចិត្ត បុរស រូបនោះឱ្យចុះមកក្រោមវិញ រហូតដល់បុរសរូបនោះទន់ចិត្តព្រមចុះមកក្រោមតាមសម្រួល ពោលគឺមិនបង្កឱ្យមានគ្រោះថ្នាក់អ្វីទាំងអស់។
ក្រោយកើតហេតុ សមត្ថកិច្ច និងអាជ្ញាធរមូលដ្នាន រួមនឹងម្ចាស់ការដ្ឋានសំណង់ខាងលើ បានសម្រេច ប្រគល់បុរសរូបនោះ ទៅឱ្យក្រុមគ្រួសារដឹកត្រឡប់ទៅផ្ទះវិញបាត់ទៅ៕