ខេត្តបាត់ដំបង៖ ករណីប៉ុនប៉ងរំលោភសេពសន្ថវៈនេះ បានកើតឡើងកាលពីព្រឹកថ្ងៃទី២៨ ខែធ្នូ ឆ្នាំ២០១៨ នៅចំណុចភូមិចំការសំរោង សង្កាត់ចំការសំរោង ក្រុងបាត់ដំបង។ លុះនារីរងគ្រោះដាក់ពាក្យប្តឹង ក៏ត្រូវសមត្ថកិច្ចចុះស្រាវជ្រាវ ចាប់ខ្លួនជនសង្ស័យបាន កាលពីវេលាម៉ោង៣រសៀល ថ្ងៃទី២៨ ខែធ្នូ ឆ្នាំ២០១៨។
ជនសង្ស័យល្មោភកាមដែលប៉ងចាប់រំលោភកូនស្រីគេ តែមិនបានសម្រេច បែរជាត្រូវសមត្ថកិច្ចចាប់វាយខ្នោះនេះ មានឈ្មោះជា សុហេង អាយុ៣៤ឆ្នាំ មុខរបរមិនពិតប្រាកដ មានលំនៅក្នុងភូមិឃុំកើតហេតុខាងលើ។ ចំណែកនារីរងគ្រោះ មានឈ្មោះស.ស អាយុ១៩ឆ្នាំ មានស្រុកកំណើត នៅភូមិតាប៉ុន ស្រុកសង្កែ។
តាមប្រភពពីសមត្ថកិច្ច បានឱ្យដឹងថា ជនសង្ស័យខាងលើ ត្រូវបានកម្លាំងការិយាល័យប្រឆាំងការជួញដូរមនុស្ស និងការពារអនីតិជន ចាប់ខ្លួនដោយអនុវត្តតាមបញ្ជាលោកនួន សាន ព្រះរាជអាជ្ញាអមសាលាដំបូងខេត្តបាត់ដំបង ដែលបានបញ្ជាឱ្យនាំខ្លួនឈ្មោះជា សុហេង ដែលត្រូវចោទប្រកាន់ពីបទរំលោភសេពសន្ថវៈឈ្មោះស.ស (មិនបានសម្រេច) នៅចំណុចភូមិចំការសំរោង សង្កាត់ចំការសំរោង ក្រុងបាត់ដំបង។
ប្រភពដដែលបន្តថា ការចាប់ខ្លួនជនសង្ស័យខាងលើ ធ្វើឡើង បន្ទាប់ពីនារីរងគ្រោះ បានមកដាក់ពាក្យបណ្តឹងឱ្យសមត្ថកិច្ចជួយអន្តរាគមន៍ ក្នុងករណីដែលនាងត្រូវបានជនសង្ស័យឈ្មោះជា សុហេង បានប៉ុនប៉ងចាប់រំលោភ តែសំណាងល្អ ត្រូវនាងរើបម្រាស់រត់គេចខ្លួនទាន់ពេល៕
