ខេត្តស្វាយរៀង៖ ក្មេងស្រីរងគ្រោះដែលលង់ទឹកស្លាប់ កាលពីថ្ងៃទី០១ ខែមករា ឆ្នាំ២០១៩ នៅចំណុចស្រះទឹកខាងក្រោយផ្ទះអ្នកភូមិ ស្ថិតក្នុងភូមិបាត់ថង់ ឃុំគគីសោម ស្រុកស្វាយទាប។ មានឈ្មោះវ៉ាន់ នីសា អាយុ២ឆ្នាំ៤ខែ មានឪពុកឈ្មោះស៊ីម វ៉ាន់ អាយុ៤១ឆ្នាំ ម្តាយឈ្មោះស៊ុន គន្ធា អាយុ២៤ឆ្នាំ មានលំនៅក្នុងភូមិឃុំកើតហេតុខាងលើ។
តាមប្រភពពីក្រុមគ្រួសារក្មេងស្រីរងគ្រោះខាងលើ បានរៀបរាប់ប្រាប់ថា ក្មេងស្រីរងគ្រោះ បានបាត់ខ្លួនពីផ្ទះតាំងពីវេលាម៉ោងប្រហែល ១០ព្រឹក ថ្ងៃទី២៩ ខែធ្នូ ឆ្នាំ២០១៨ ដោយមិនដឹងថាបាត់ទៅណា ធ្វើឱ្យក្រុមគ្រួសារភ័យឆោឡោចែកផ្លូវគ្នាតាមរកសព្វកន្លែង និងដើរសួរគេឯងពេញភូមិ នៅតែមិនមានអ្នកណាម្នាក់បានប្រទះឃើញសោះ។
ប្រភពដដែលបន្តថា ដោយសារតែតាមស្វែងរកអស់លទ្ធភាព នៅតែគ្មានដំណឹងសូន្យឈឹង ទើបក្រុមគ្រួសារ បានសម្រេចប្រកាសរក កូនស្រីតាមហ្វេសប៊ុកវិញម្តង ក្រែងមានអ្នកប្រទះឃើញ ប៉ុន្តែនៅតែមិនទទួលបានដំណឹងអ្វីដដែល។ ស្រាប់តែមកដល់វេលាព្រឹកថ្ងៃទី០១ ខែមករា ឆ្នាំ២០១៩ ក៏មានប្រជាពលរដ្ឋបានប្រទះឃើញសាកសពក្មេងស្រីរងគ្រោះស្ថិតក្នុងសភាពហើមស្អុយ អណ្តែតនៅក្នុងស្រះទឹក ខាងក្រោយផ្ទះអ្នក ភូមិឈ្មោះអៀក ស៊ីថា ភេទប្រុស អាយុ៤២ឆ្នាំ ចម្ងាយពីផ្ទះរបស់ក្មេងស្រីរងគ្រោះប្រមាណ២៣ម៉ែត្រប៉ុណ្ណោះ ទើបធ្វើឱ្យកើតមានការផ្អើលឆោឡោ និងរាយការណ៍ប្រាប់សមត្ថកិច្ចចុះមកពិនិត្យតែម្តង៕