ភ្នំពេញ៖ ហេតុការណ៍អំពើហិង្សា ភ្ញៀវប្រុសខឹងបង្ខំស្រីម៉ាស្សារួមរ័កអត់បាន វ៉ៃខាងស្រីបណ្តាលឱ្យរងរបួសធ្ងន់នេះ បានកើតមានការភ្ញាក់ផ្អើលឡើងកាលពីវេលាម៉ោង ១និង៣០នាទីរំលងអធ្រាត្រ ឈានចូលថ្ងៃទី០២ ខែមករា ឆ្នាំ២០១៩ នៅចំណុចហាងកោសជប់ម៉ាស្សា យីហោ៩៩ មានទីតាំងស្ថិតក្នុងភូមិដំណាក់ធំ៥ សង្កាត់ស្ទឹងមានជ័យ៣ ខណ្ឌមានជ័យ។
ស្ត្រីរងគ្រោះ ដែលត្រូវប្រុសល្មោភកាមចាប់បង្ខំរួមរ័កអត់បាន វ៉ៃរហូតដល់រងរបួសធ្ងន់ សុំមិនបង្ហាញពីអត្តសញ្ញាណនោះទេ គ្រាន់តែបង្ហើបប្រាប់ថា មានអាយុ៥១ឆ្នាំ មុខរបរបើកហាងម៉ាស្សាកោសជប់យីហោ៩៩ ស្នាក់នៅផ្ទះកើតហេតុខាងលើ។ ចំណែកជនសង្ស័យល្មោភកាម មិនត្រូវបានស្គាល់អត្តសញ្ញាណនោះទេ ក្រោយកើតហេតុ បានរត់គេចខ្លួនបាត់ស្រមោល ដោយបន្សល់ទុកម៉ូតូ១គ្រឿងនៅនឹងកន្លែងកើតហេតុ។
តាមសម្តីស្ត្រីរងគ្រោះ បានរៀបរាប់ប្រាប់ថា នៅមុនពេលកើតហេតុ កូនចៅរបស់គាត់ (នារីម៉ាស្សាក្នុងហាង) បានដល់ម៉ោងឈប់ សម្រាកអស់ទៅហើយ និងបានចេញទៅក្រៅអស់ នៅសល់តែគាត់ម្នាក់ប៉ុណ្ណោះនៅអង្គុយក្នុងហាងតែម្នាក់ឯង ស្រាប់តែបន្តិចក្រោយមក ក៏លេចមុខ បុរសម្នាក់ជិះម៉ូតូ១គ្រឿង ម៉ាកគុបជ្រុង គ្មានពាក់ស្លាកលេខ បានចូលមករកសេវាម៉ាស្សា។ ពេលនោះ គាត់ប្រាប់ថា កូនចៅ (នាងៗម៉ាស្សា) សម្រាកអស់ហើយ គ្មានអ្នកនៅបម្រើសេវាម៉ាស្សាឱ្យទេ ស្រាប់តែបុរសរូបនោះ បាននិយាយថា “ចុះអ៊ី ម៉ាស្សាកើតអត់?” លឺបែបនេះ គាត់ក៏សម្រេចចិត្តបម្រើសេវាម៉ាស្សាឱ្យភ្ញៀវប្រុសម្នាក់នោះដោយផ្ទាល់ដៃតែម្តង។
ស្ត្រីរងគ្រោះបន្តថា លុះពេលចូលដល់បន្ទប់ម៉ាស្សា គាត់ចាប់ផ្តើមធ្វើចលនាម៉ាស្សាតាមជំនាញដែលគាត់មានជូនភ្ញៀវ ស្រាប់តែភ្ញៀវប្រុសរូបនេះ បែរជាកំរើកសរសៃតណ្ហា ចេះតែលូកលាន់គាត់មិនឈប់ តែគាត់ក៏មិននិយាយអ្វីច្រើនដែរ គ្រាន់តែគ្រវាសដៃភ្ញៀវនោះចេញ ស្រាប់តែបន្តិចក្រោយមក ភ្ញៀវប្រុសនោះក៏ចាប់បង្ខំគាត់រួមរ័កតែម្តង ប៉ុន្តែគាត់មិនព្រម ក៏ប្រឹងរើបម្រះ និងស្រែកឆោឡោផង ជាហេតុធ្វើឱ្យជនសង្ស័យរូបនោះផ្ទុះកំហឹង ក៏ប្រើអំពើហិង្សា វាយដំមកលើគាត់យ៉ាងចាស់ដៃ បណ្តាលឱ្យរងរបួសធ្ងន់តែម្តង៕
