ភ្នំពេញ៖ ហេតុការណ៍នេះកើតឡើងកាលពីវេលាម៉ោង១២និង៣០នាទីរំលងអធ្រាត្រ ឈានចូលថ្ងៃទី០៥ ខែមករា ឆ្នាំ២០១៩ នៅចំណុចដីឡូត៍ ជាប់ផ្លូវបេតុង ស្ថិតក្នុងភូមិវិមានទ្រង់ ស្ថិតក្នុងសង្កាត់ក្រាំងធ្នង់ ខណ្ឌសែនសុខ។
គូស្នេហ៍ជាជនសង្ស័យដែលត្រូវសមត្ថកិច្ចចាប់ក្របួចទាំងគូនេះ រួមមាន ភាគីខាងប្រុស មានឈ្មោះដួង សេរីពន្លក អាយុ២៣ឆ្នាំ មុខរបររត់រ៉ឺម៉កម៉ូតូកង់៣។ ចំណែកភាគីខាងស្រីស្នេហ៍ មានឈ្មោះនួន ចាន់ណា អាយុ២២ឆ្នាំ។ គូស្នេហ៍ខាងលើ សព្វថ្ងៃស្នាក់នៅផ្ទះជួលជាមួយគ្នា ម្តុំមូលដ្ឋានសង្កាត់បឹងកក់១ ខណ្ឌទួលគោក។
តាមប្រភពពីមន្ត្រីនគរបាលមូលដ្ឋាន បានបញ្ជាក់ប្រាបថា នៅមុនពេលកើតហេតុ សមត្ថកិច្ចមូលដ្ឋាន បានចេញល្បាតក្នុងភូមិសាស្ត្រខាងលើ ស្រាប់តែបានប្រទះឃើញម៉ូតូរ៉ឺម៉កកង់៣មួយគ្រឿង ពាក់ស្លាកលេខភ្នំពេញ 1FS-6692 កំពុងចតនៅក្នុងដីឡូត៍វាលស្ងាត់មួយកន្លែង នៅជាប់ផ្លូវបេតុង ស្ថិតក្នុងភូមិវិមានទ្រង់ សង្កាត់ក្រាំងធ្នង់ ខណ្ឌសែនសុខ។ ដោយមានមន្ទិលសង្ស័យ សមត្ថកិច្ចបានចុះទៅត្រួតពិនិត្យមើល ស្រាប់តែប្រទះឃើញគូស្នេហ៍ខាងលើ កំពុងសម្ងំជក់ថ្នាំញៀនយ៉ាងត្រជាក់ល្ហឹម ទើបសមត្ថកិច្ចសម្រេចចាប់ឃាត់ខ្លួន និងបន្តឆែករកឃើញមានថ្នាំញៀន ពណ៌សថ្លា ជាប្រភេទថ្នាំម៉ាទឹកកក រហូតចំនួន១៣កញ្ចប់តូច និង១កញ្ចប់ធំទៀត សរុប១៤កញ្ចប់។
ក្រោយពេលសមត្ថកិច្ចចាប់ខ្លួនបញ្ជូនមកទីស្នាក់ការប៉ុស្តិ៍ ដើម្បីសួរនាំស្រាវជ្រាវរកប្រភព ដែលពួកបានថ្នាំញៀននេះមកពីទីណានោះ ពួកគេមិនព្រមប្រាប់ឡើយ ដោយគ្រាន់តែសារភាពថា ថ្នាំញៀននេះ ខ្លួនបានទិញពីគេមិនស្គាល់ឈ្មោះ យកមកប្រើប្រាស់ផ្ទាល់ខ្លួនផង និងលក់បន្តផង ក្នុង១កញ្ចប់តម្លៃ១០ម៉ឺនរៀល។
ជនសង្ស័យទាំង២នាក់ខាងលើ ត្រូវបានសមត្ថកិច្ចរៀបចំកសាងសំណុំរឿង បញ្ជូនខ្លួនទៅកាន់សាលាដំបូងរាជធានីភ្នំពេញ ដើម្បីចាត់ការបន្តតាមនីតិវិធី៕