ខេត្តកំពង់ឆ្នាំង៖ ហេតុការណ៍ភ្ជង់កាំបិតប្លន់ថៅកែវេរលុយនេះ បានកើតមានការភ្ញាក់ផ្អើលឡើង កាលពីវេលាម៉ោង៦ និង១៥នាទីព្រលប់ ថ្ងៃទី០៦ ខែមករា ឆ្នាំ២០១៩ នៅចំណុចភូមិកំពង់បឹង ឃុំកំពង់ហៅ ស្រុកកំពង់លែង។
ជនសង្ស័យមានឈ្មោះផាន់ សុខភ័ស្ត្រ ហៅជា អាយុ២០ឆ្នាំ មានស្រុកកំណើតនៅភូមិទំនប់ ឃុំត្រងិល ស្រុកកំពង់លែង បច្ចុប្បន្នរស់នៅភូមិខ្សាម សង្កាត់ខ្សាម ក្រុងកំពង់ឆ្នាំង។
តាមប្រភពពីសមត្ថកិច្ចបានឱ្យដឹងថា នៅមុនពេលកើតហេតុ ជនសង្ស័យបានជិះម៉ូតូ១គ្រឿង ប្រភេទសេ១០០កូរ៉េ ពណ៌ក្រហម បានជិះម៉ូតូសំដៅចូលទៅផ្ទះជនរងគ្រោះ ហើយបានសួរចុះឡើង ក៏បានចូលទៅកៀកជនរងគ្រោះរួចយកកាំបិត ភ្ជង់គំរាមឱ្យនៅស្ងៀមរួច រួចក៏ធ្វើសកម្មភាពប្រមូលយកលុយចេញពីថតតុ និងប្រញាប់ឡើងម៉ូតូរបស់ខ្លួនជិះចេញទៅតែម្តង។
ក្រោយពីជនសង្ស័យប្រមូលលុយចេញទៅ ជនរងគ្រោះនិងប្រេជាពលរដ្ឋដែលរស់នៅក្បែនោះ បានស្រែកឆោឡោឡើង ថាចោរៗៗ។ ឃើញដូចនេះ ប្រជាពលរដ្ឋ និងសមត្ថកិច្ចបានដេញតាមជនសង្ស័យរហូតដល់ជនសង្ស័យភ័យស្លន់ស្លោ ដាក់ម៉ូតូ និងកាំបិតចោល រួចទៅពួនសម្ងំនៅ ក្រោមផ្ទះរបស់ស្ត្រីម្នាក់ឈ្មោះផាន់ តុម ត្រូវជាម្តាយចិញ្ចឹមរបស់ជនសង្ស័យ នៅចំណុចភូមិទំនប់ ឃុំត្រងិល ស្រុកកំពង់លែង។ លុះក្រោយពីមានការស្រាវជ្រាវយ៉ាងយកចិត្តទុកដាក់ សមត្ថកិច្ចក៏ឈានដល់ការចាប់ខ្លួនជនសង្ស័យបាននៅវេលាម៉ោង១០យប់ថ្ងៃដដែល។
ក្រោយឃាត់ខ្លួនជនសង្ស័យ សមត្ថកិច្ចបានដកហូតវត្ថុតាង រួមមាន ដាវ១ដើម ទូរសព្ទ័ដៃ១គ្រឿង ម៉ូតូជនល្មើសជិះធ្វើសកម្មភាព១គ្រឿង និងលុយបានមកវិញចំនួន៦លាន ៣០ម៉ឺនរៀល។
ជនសង្ស័យខាងលើ ត្រូវបានសមត្ថកិច្ចរៀបចំកសាងសំណុំរឿង បញ្ជូនខ្លួនទៅកាន់ស្នងការដ្ឋាននគរបាលខេត្ត ដើម្បីចាត់ការតាមនីតិវិធី៕