ភ្នំពេញ៖ ករណីឆក់កាបូបនារីខារ៉ាអូខេនេះ បានកើតឡើងកាលពីវេលាម៉ោង២និង៤០នាទីរំលងអធ្រាត្រ ឈានចូលថ្ងៃទី០៨ ខែមករា ឆ្នាំ២០១៩ នៅត្រង់ចំណុចក្បែរខាងក្រោមស្ពានអាកាសស្ទឹងមានជ័យ តាមបណ្តោយផ្លូវព្រះមុន្នីរ៉េត ស្ថិតក្នុងសង្កាត់បឹងសាឡាង ខណ្ឌទួលគោក។
នារីរងគ្រោះជាម្ចាស់កាបូប មានឈ្មោះសុភក្ត័ អាយុ៣៣ឆ្នាំ មុខរបរបម្រើការនៅខារ៉ាអូខេយីហោ អេកូ ស្នាក់នៅម្តុំក្រោយវត្តស្ទឹងមានជ័យ ស្ថិតក្នុងសង្កាត់ស្ទឹងមានជ័យទី១ ខណ្ឌមានជ័យ ជិះម៉ូតូ១គ្រឿងម៉ាក ធូដេ ពណ៌ក្រហម ពាក់ស្លាកលេខ ភ្នំពេញ 1FS-4845។ ចំណែកជនសង្ស័យដែលត្រូវសមត្ថកិច្ចក្របួចជាប់ មានឈ្មោះភឿន តួ អាយុ២៧ឆ្នាំ មុខរបរនិងស្នាក់នៅមិនពិតប្រាកដ និងមានស្រុកកំណើតនៅស្រុកស្អាង ខេត្តកណ្តាល ជិះម៉ូតូ១គ្រឿងម៉ាក អ៊ិចសាយទ័រ ពណ៌ខ្មៅ ពាក់ស្លាកលេខ ភ្នំពេញ 1HB-2656។
លុះមកដល់ចំណុចកើតហេតុ ស្រាប់តែលេចមុខជនសង្ស័យខាងលើ ជិះម៉ូតូម៉ាកអ៊ិចសាយទ័រ តាមមកពីក្រោយ រួចក៏ធ្វើសកម្មភាពឆក់កាបូបរបស់នាង ដែលស្ពាយជាប់ខ្លួន បណ្តាលឱ្យដាច់ខ្សែបានសម្រេច ហើយបណ្តាលឱ្យដៃម៉ូតូរបស់ជនសង្ស័យរេទៅទាក់ជាមួយដៃម៉ូតូរបស់នាង ធ្វើឱ្យដួលទាំងអស់គ្នា។
ភ្លាមៗនោះ ប្រជាពលរដ្ឋដែលបានឃើញហេតុការណ៍ បាននាំគ្នាជួយអន្តរាគមន៍ចាប់ឃាត់ជនសង្ស័យ និងបានស្វាគមន៍ម្នាក់មួយដៃមួយ ជើងបណ្តាលឱ្យហើមមុខ មើលលែងស្គាល់ចង់ស្គាល់។
នារីរងគ្រោះប្រាប់ថា ក្នុងកាបូបរបស់នាង ក៏ត្រូវបានជនឆ្លៀតឱកាសធ្វើការលួចយកទៅបាត់ទៀត ខណៈដែលមានមនុស្សម្នាកុះករមកជួយអន្តរាគមន៍ ប៉ុន្តែសំណាងល្អ ដែលនៅក្នុងកាបូបនោះ គ្មានរបស់មានតម្លៃ ឬលុយកាក់អ្វីទេ ប៉ុន្តែមានសុទ្ធតែក្រែមម្សៅប៉ុណ្ណោះ។
ក្រោយពីកើតហេតុជនសង្ស័យរួមទាំងវត្ថុតាំង ត្រូវបានសមត្ថកិច្ចមូលដ្ឋាននាំយកទៅសាកសួរនាំនៅប៉ុស្តិ៍នគរបាលរដ្ឋបាលបឹងសាឡាង ដើម្បីកសាងសំណុំរឿងបញ្ជូនខ្លួនទៅអធិការដ្ឋាននគរបាលខណ្ឌទួលគោក ចាត់ការបន្តតាមនីតិវិធី៕
