ខេត្តតាកែវ ៖ ករណីប៉ុនប៉ងលួច និងប្រើអំពើហិង្សាដោយចេតនានេះ បានកើតឡើងកាលពីវេលាម៉ោង៤ ទៀបភ្លឺ ថ្ងៃទី០៧ ខែមករា ឆ្នាំ២០១៩ នៅចំណុចភូមិតាសូ ឃុំតាភេម ស្រុកត្រាំកក់។
ជនសង្ស័យដែលត្រូវសមត្ថកិច្ចចាប់វាយខ្នោះ មានឈ្មោះទួន ម៉ៅ អាយុ៣២ឆ្នាំ មានលំនៅក្នុងភូមិត្រពាំងស្វាយ ឃុំតាភេម ស្រុក ត្រាំកក់។ ចំណែកជនរងគ្រោះជាម្ចាស់រថយន្ត មានឈ្មោះទឹម ចន្ថា ភេទប្រុស អាយុ៣៥ឆ្នាំ រស់នៅភូមិតាសូ ឃុំតាភេម ស្រុកត្រាំកក់។
តាមប្រភពពីសមត្ថកិច្ចស្រុកត្រាំកក់ បានបញ្ជាក់ប្រាប់ថា នៅមុនពេលកើតហេតុ កាលពីវេលាម៉ោង៤ទៀបភ្លឺ នៅចំណុចមុខផ្ទះរបស់ ឈ្មោះកែវ នី ភេទស្រី អាយុ៥៨ឆ្នាំ ស្ថិតនៅភូមិតាសូ ឃុំតាភេម ស្រុកត្រាំកក់ មានជនសង្ស័យម្នាក់ បានធ្វើសកម្មភាពចូលរកលួចគាស់ទ្វារ រថយន្តលួចសម្ភារៈរបស់ជនរងគ្រោះឈ្មោះទឹម ចន្ថា ដែលកំពង់ដេកក្នុងរថយន្ត។ ស្រាប់តែពេលនោះម្ចាស់រថយន្តក៏ភ្ញាក់ដឹងខ្លួនទាន់ ហើយបានស្រែកថាចោរៗ រួចបានប្រតាយប្រតប់គ្នាជាមួយជនសង្ស័យ ហើយជនសង្ស័យបានបាញ់ជំពាម និងបានដកកាំបិតចាក់ទៅលើជនរងគ្រោះ បណ្តាល ឱ្យត្រូវដៃទាំងសងខាង រងរបួសធ្ងន់ បញ្ជូនទៅមន្ទីរពេទ្យខេត្តតាកែវ។
ក្រោយកើតហេតុ ជនសង្ស័យបានព្យាយាមរត់គេចខ្លួនចេញពីកន្លែងកើតហេតុដែរ តែត្រូវប្រជាពលរដ្ឋលាន់លឺសំឡេង ចេញមកជួយអន្តរាគមន៍ព័ទ្ធចាប់ក្របួចជាប់ និងបានស្វាគមន៍ម្នាក់មួយដៃមួយជើង បណ្តាលឱ្យហើមប៉ោងមុខមាត់ ទើបប្រគល់ឱ្យសមត្ថកិច្ចយកទៅសាកសួរ។
ជនសង្ស័យខាងលើ ត្រូវបានសមត្ថកិច្ចរៀបចំកសាងសំណុំរឿង បញ្ជូនខ្លួនទៅកាន់សាលាដំបូងខេត្ត ដើម្បីចាត់ការបន្តតាមនីតិវិធី៕