ភ្នំពេញ៖ ហេតុការណ៍គ្រោះថ្នាក់ចរាចរណ៍នេះ បានកើតមានការភ្ញាក់ផ្អើលឡើង កាលពីវេលាម៉ោង១និង៣០នាទីរំលងអធ្រាត្រ ឈាន ចូលថ្ងៃទី០៨ ខែមករា ឆ្នាំ២០១៩ នៅត្រង់ចំណុចខាងក្រោមស្ពានអាកាស៧មករា តាមបណ្តោយផ្លូវសហព័ន្ធរុស្ស៊ី កែងនឹងផ្លូវ២៧១ ស្ថិតក្នុងសង្កាត់ទឹកថ្លា ខណ្ឌសែនសុខ។
រថយន្តទំនើបដែលជួបហេតុការណ៍គ្រោះថ្នាក់ចរាចរណ៍នេះ ម៉ាកឡិចស៊ីស NX-200t ពណ៌ខ្មៅ ពាក់ស្លាកលេខភ្នំពេញ 2AX-7011 បើកបរដោយបុរសម្នាក់ត្រូវគេស្គាល់ច្បាស់ថា ជាកីឡាករបាល់ទាត់ល្បីឈ្មោះរបស់កម្ពុជា គឺកីឡាករ ចាន់ វឌ្ឍនាកា និងរួមដំណើរដោយនារីវ័យក្មេងរូបស្រស់សោភាម្នាក់ មិនស្គាល់អត្តសញ្ញាណ។
តាមប្រភពពីកន្លែងកើតហេតុ បានឱ្យដឹងថា នៅមុនពេលកើតហេតុគេឃើញ រថយន្តស៊េរីទំនើបមួយគ្រឿងម៉ាក ឡិចស៊ីស NX-200t បើកបរដោយកីឡាករបាល់ទាត់ល្បីឈ្មោះ ចាន់ វឌ្ឍនាកា និងរួមដំណើរដោយនារីរូបស្រស់ម្នាក់ ទំនងស្ថិតក្នុងស្ថានភាពស្រវឹង បានបើកបរក្នុងល្បឿនយ៉ាងលឿន តាមបណ្តោយផ្លូវសហព័ន្ធរុស្ស៊ី ក្នុងទិសដៅពីកើតទៅលិច។ លុះមកដល់ចំណុចកើតហេតុខាងលើ រថយន្តក៏បានបួងចង្កូតបត់ស្តាំ បម្រុងឆ្ពោះទៅផ្លូវ២៧១ ដោយមិនបន្ថយល្បឿន និងខ្វះការប្រុងប្រយ័ត្ន ក៏ជ្រុលទៅបុកខឿនសួនច្បារដែលនៅខាងក្រោមស្ពានអាកាស៧មករា បណ្តាលឱ្យខូចខាតជិត១០កង់ បែកខ្ទាតពេញផ្លូវ។ ចំណែកឯរថយន្តបង្ករងការខូចខាតបែកកង់ និងកំពិតកាងផ្នែកខាងមុខចំហៀងខាងឆ្វេង។
ប្រភពដដែលបន្តថា ក្រោយកើតហេតុភ្លាមៗ រថយន្តបង្កបានព្យាយាមបើកទៅមុខ ចេញផុតពីកន្លែងកើតហេតុបានប្រមាណ១០០ម៉ែត្រ ក៏ត្រូវសមត្ថកិច្ចដែលប្រចាំការនៅទីនោះធ្វើការជិះប្រដេញឃាត់បានទាន់ពេលវេលា។ ប៉ុន្តែក្រោយមក អ្នកបើកបររថយន្តដែលគេបានស្គាល់ថា ជាកីឡាករបាល់ទាត់ជម្រើសជាតិ ចាន់ វឌ្ឍនាកា រួមទាំងនារីម្នាក់ទៀតដែលរួមដំណើររជាមួយគ្នា បានគេចខ្លួនចេញទៅបាត់ ដោយបន្សល់ទុកតែ រថយន្តបង្កដែលរងការខូចខាតនៅនិងកន្លែងកើតហេតុតែប៉ុណ្ណោះ។
ក្រោយពេលកើតហេតុរថយន្តបង្កខាងលើ ត្រូវបានសមត្ថកិច្ចជំនាញចុះមកធ្វើការស្ទូច យកទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំម្ចាស់ចូលខ្លួនមកធ្វើការដោះស្រាយទៅតាមផ្លូវច្បាប់នៅពេលក្រោយ៕
