យោងតាមប្រភពព័ត៌មាន BBC ចេញផ្សាយកាលពីថ្ងៃពុធ ទី១៦ ខែមករា ឆ្នាំ២០១៩ បានឲ្យដឹងថា ក្លឹប Fulham បានចុះហត្ថលេខាទិញ Ryan Babel អតីតកីឡាករខ្សែការពារក្លឹបហង្សក្រហម Liverpool ដែលបច្ចុប្បន្នកំពុងលេងឲ្យក្លឹបបាល់ទាត់តួកគី Besiktas។
កីឡករវ័យ៣២ឆ្នាំរូបនេះ ដែលបានចំណាយពេល៣ឆ្នាំ ជាមួយក្លឹបLiverpool បានចូលជាមួយក្លឹប Fulham រហូតដល់ដំណាច់រដូវកាលនេះ។
ទាក់ទងទៅនឹងបញ្ហានេះ គេមិនបានបង្ហើបឲ្យដឹងពីតម្លៃខ្លួន និងរយៈពេលកុងត្រានោះទេ។
ក្លឹប Fulham ស្ថិតនៅចំណាត់ថ្នាក់លេខរៀងទី១៩ ក្នុងតារាងអង់គ្លេសប្រឺមីញេលីក។
កីឡាករ Babel ដែលរកគ្រាប់បាល់បាន៦គ្រាប់ ឲ្យក្លឹប Besiktas សម្រាប់រដូវកាលនេះ បាននិយាយថា “ខ្ញុំមានជំនឿថា Fulham អាចបន្តនៅប្រឺមីញេលីកសម្រាប់រដូវកាលក្រោយ។ នេះគឺជាហេតុផលដែលខ្ញុំត្រូវមកកាន់ទីនេះ”។
លោក Tony Khan អនុប្រធានក្លឹប Fulham បាននិយាយថា “Ryan គឺជាកីឡាករដែលមានទេពកោសល្យ និងបទពិសោធន៍ច្រើននៅលើសមរភូមិវាលស្មៅ”។
លោកបានបន្តទៀតថា “វត្តមានរបស់កីឡាកររូបនេះ នឹងធ្វើឲ្យលទ្ធផលក្លឹប Fulham ប្រែប្រួល”។
បន្ទាប់ពីចាកចេញពីក្លឹប Liverpool កាលពីឆ្នាំ២០០៧ កីឡាកររូបនេះបានទៅលេងជាមួយក្លឹបជាច្រើន ដូចជាក្លឹប Hoffenheim , Ajax, Kasimpasa, Al Ain , Deportivo និងចុងក្រោយ Besiktas ៕