យោងតាមប្រភពព័ត៌មាន Daily Mail ចេញផ្សាយកាលពីថ្ងៃព្រហស្បត៍ ទី ២៤ ខែមករា ឆ្នាំ២០១៩ បានឲ្យដឹងថា ក្លឹបស្តេចស Real Madrid បានដណ្តើមយកទីតាំងឈរជើងរបស់ក្លឹបបិសាចក្រហម Man Utd ដែលធ្លាប់កាន់កាប់តំណែងនេះ កាលពីឆ្នាំកន្លងទៅ ។
សម្រាប់រដូវកាល២០១៧-២០១៨ ក្លឹបស្តេចស Real Madrid រកប្រាក់ចំណូលបាន៦៦៥,២លានផោន ស្មើនឹងជាង៨៦៩លានដុល្លារ កើនឡើងជាង១១១លានដុល្លារ បើប្រៀបធៀបទៅនឹងឆ្នាំកន្លងទៅ។
កាលពីឆ្នាំកន្លងទៅ ក្លឹប Real Madrid តាមពីក្រោយក្លឹប Man Utd គឺរកចំណូលបាន៧៥៧លានដុល្លារ។
ក្លឹបអ្នកមានបុណ្យ Barcelona ដែលកាលពីរដូវកាលចាស់ ទទួលបានលេខ៣ បានឡើងមកឈរចំណាត់ថ្នាក់លេខ២ ក្នុងតារាង រកចំណួលបាន៧៩៨លានដុល្លារ។
ចំណែកឯក្លឹបបិសាចក្រហម Man Utd មិនអាចគ្រប់គ្រងតំណែងលេខ១បាន គឺធ្លាក់មកដល់លេខ៣ ក្នុងតារាងរកចំណូលបាន៧៧១លានដុល្លារ ខណៈក្លឹប Bayern និង Man City រក្សាចំណាត់ថ្នាក់លេខ៤ និង៥ដដែល។
ក្លឹប Bayern ឈរចំណាត់ថ្នាក់លេខ៤ រកចំណូលបាន៧២៨លានដុល្លារ និងក្លឹបMan City ចំណាត់ថ្នាក់លេខ៥ រកចំណូលបាន៦៥៧លានដុល្លារ៕