តាមប្រភពព័ត៌មានពីគេហទំព័របរទេស ចេញផ្សាយកាលពីថ្ងៃព្រហស្បត៍ ទី១៤ ខែកុម្ភៈ ឆ្នាំ២០១៩ បានឲ្យដឹងថា ក្លឹបបិសាចក្រហម Man Utd បានត្រៀមលុយជាង១២៨លានដុល្លារ តាមប្រមាញ់កីឡាករខ្សែបម្រើវ័យក្មេង Joao Felix ពីក្លឹបបាល់ទាត់ ព័រទុយហ្គាល់ Benfica ។
ក្លឹប Man Utd បានបញ្ជូនភ្នាក់ងារទិញដូរកីឡាករទៅតាមអង្កេតមើលទម្រង់លេងរបស់កីឡាករវ័យ១៩ឆ្នាំរូបនេះ ២-៣ដងរួចហើយ នៅក្នុងរដូវកាលនេះ។ ក្លឹប Man Utd កំពុងចង់បានកីឡាករវ័យក្មេង សម្រាប់រដូវកាលដោះដូរបន្ទាប់។
ប្រភពព័ត៌មានដដែលនោះ បានឲ្យដឹងទៀតថា ក្លឹប Benfica បានដាក់តម្លៃខ្លួនកីឡាកររូបនេះ ១០០លានផោន ស្មើនឹងជាង ១២៨លានដុល្លារ។ ចំណែកឯប្រភពពី Old Trafford បានឲ្យដឹងដែរថា Felix គឺជាកីឡាករដែលមានទេពកោសល្យ អាចយកមកជំនួសកីឡាករចាស់នៅទីនេះបាន។ កីឡាកររូបនេះមានទម្រង់លេងដូចគ្នាទៅនឹងកីឡាករជើងចាស់ Deco។
ក្រៅពីក្លឹប Man Utd កីឡាករ Felix ក៏ត្រូវបានក្លឹប Real Madrid និង Bayern ចង់បានផងដែរ។
កាលពីរដូវកាលចាស់ ក្លឹប Man Utd ធ្លាប់នាំយកកីឡាករខ្សែការពារ Diogo Dalot ពីក្លឹប Porto និយាយរួមក្លឹបនេះពេញចិត្តកីឡាកររបស់ព័រទុយហ្គាល់ ដូចជា Ronaldo និង Nani ជាដើម៕