ការស្រាវជ្រាវមួយរបស់អង់គ្លេស រកឃើញថា ឈាមរដូវគ្រាដំបូងនៃស្ត្រី អាចទស្សន៍ទាយសុខភាពក្នុងពេលអនាគតបាន ជាពិសេស ចំពោះស្ត្រីពេញក្រមុំមុនវ័យ ឬរដូវមកមុនអាយុ១៣ឆ្នាំ អាចប្រឈមកើតជំងឺបេះដូង ពេលឈានចូលវ័យចាស់ជរា។
ក្រុមអ្នកស្រាវជ្រាវបានប្រើពេលជាង១០ឆ្នាំ ក្នុងការប្រមូល និងរក្សាទិន្នន័យពីស្ត្រីជនជាតិអង់គ្លេស អាយុចន្លោះពី៥០-៦៤ឆ្នាំ ចំនួន១.៣លាននាក់ ដើម្បីរកមើលថា តើអាយុដែលមានរដូវលើកដំបូងក្នុងវ័យក្មេង ចោទជាបញ្ហាចំពោះសុខភាពនៅពេលឈានចូលវ័យចំណាស់ឬទេ? ការមករដូវលើកដំបូងតាំងពីអាយុ១០ឆ្នាំ ឬតិចជាងនេះ រួមទាំងស្ត្រីដែលមករដូវលើកដំបូងអាយុ១៧ឆ្នាំឡើងទៅ ហើយមានការប្រឈម២៧% នឹងអាចកើតជំងឺបេះដូងជាជំងឺប្រចាំកាយ។ ក្នុងពេលតែមួយ ស្ត្រីដែលមករដូវលឿនជាងធម្មតា និងយឺតជាងធម្មតា ប្រឈម២០% ដែលបាត់បង់ជីវិតពីជំងឺសម្ពាធឈាមខ្ពស់ និង១៦% បាត់បង់ជីវិតដោយជំងឺសរសៃឈាមក្នុងខួរក្បាល (Stroke)។
ផលប៉ះពាល់ចំពោះសុខភាពនៃការមករដូវនៅអាយុតិច មិនត្រឹមតែប្រឈមចំពោះជំងឺបេះដូងពេលចាស់នោះទេ តែនៅប៉ះពាល់ដល់ការរីកលូតលាស់នៃឆ្អឹងផងដែរ ដែលក្មេងស្រីមករដូវលើកដំបូងក្នុងអំឡុងវ័យ១០ឆ្នាំ ឬលឿនជាងនេះ អាចនាំឱ្យរាងកាយឈប់លូតកម្ពស់ ខណៈដែលក្មេងស្រីមានរាងធាត់ ភាគច្រើន រមែងមករដូវលឿនជាងក្មេងស្រីដែលមានរាងស្គម ស្តើង ព្រោះភាពធាត់ បង្កផលប៉ះពាល់ដល់វដ្តរដូវឱ្យវិវត្តលឿនទៅតាមនោះផងដែរ៕