ខេត្តត្បូងឃ្មុំ ៖ បន្ទាប់ពីសមត្ថកិច្ចចាប់ខ្លួនជនសង្ស័យជាប្តី ដែលបានកាប់ប្រពន្ធស្លាប់ កាលពីព្រឹកមិញ យោងតាមស្ត្រីជាម្តាយនារីរងគ្រោះបានទម្លាយរឿងហេតុដែលនាំឲ្យកូនប្រសាកំណាចរូបនេះហ៊ានកាប់ប្រពន្ធ មិនញញើតដៃនេះ។
ម្តាយនារីរងគ្រោះ ឈ្មោះអួន គឹមលី បានឱ្យដឹងថា មុនពេលកើតហេតុ គាត់នៅក្រោមផ្ទះជុំគ្នាជជែកលេងជាមួយកូនស្រីបង្កើត (ប្រពន្ធជនសង្ស័យ) និងចៅប្រុសអាយុជាង១ខួប៨ខែ។ លុះនៅវេលា ម៉ោងជាង១រសៀល ថ្ងៃទី១៤ ខែមិថុនា ឆ្នាំ២០១៩ ស្រាប់តែលេចមុខកូនប្រសារកំណាចនេះ ជិះម៉ូតូ១គ្រឿង ម៉ាកគុប មកដល់ មិននិយាយស្តីអ្វីនោះទេ រួចស្ទុះមកចាប់ទាញយកចៅប្រុស (កូណជនសង្ស័យ) ពីក្នុងអង្រឹង ដោយនិយាយថា “យកទៅលេងនៅផ្ទះស្រែសៀម ២ទៅ៣ថ្ងៃ”។ ភ្លាមៗនោះ កូនស្រីរបស់គាត់ (នារីរងគ្រោះ) បានស្រែកទាមទារកូនមកវិញ ក៏កើតជាជម្លោះ។
ស្ត្រីជាម្តាយនារីរងគ្រោះ បន្តថា ពេលផ្ទុះជម្លោះនោះ កូនប្រសារបានចោទមកលើប្រពន្ធថា “នាងឯងមានប្រុសថ្មី ហើយលេងទូរស័ព្ទ បង្ហោះ Facebook រកតែប្រុស… ភ្លេចបអញនិងកូន”។ ពេលនោះដែ កូនប្រសារកំណាចនេះដាក់កូនតូចងអង្គុយនៅលើដី រួចចាប់អូសដៃប្រពន្ធឲ្យឡើងជិះម៉ូតូ ក៏ផ្ទុះហិង្សាវាយប្រតាយប្រតប់គ្នា ហើយកូនប្រសារនេះបានទាញប្រពន្ធយកទៅចង្ក្រានបាយ។
ប្រភពដដែលបានបញ្ជាក់ថា ពេលឃើញកូនប្រសារូបនេះកាន់តែកញ្ជ្រោលហិង្សា គាត់បានយកព្រនង់ឈើ១កំណាត់ មកកំញើញ ទើបលែងប្រពន្ធ។ បន្ទាប់មក កូនប្រសាររូបននេះ នៅតែពុលនឹងកំហឹងក៏បានរត់ទៅយកកាំបិតប៉័ងតោនៅចង្ក្រានបាយ ភ្លាមៗនោះ គាត់បានឱ្យកូនស្រីរត់ចេញទៅ មុខផ្ទះ បានប្រមាណ៦០ម៉ែត្រ ក៏កូនប្រសារតាមទាន់ កាប់ត្រូវកស្លាប់ក្នុងថ្លុកឈាមតែម្តង។
គួរបញ្ជាក់ថា កាលពីរសៀលថ្ងៃទី១៤ ខែមិថុនា ឆ្នាំ២០១៩ បុរសម្នាក់បានកាប់ប្រពន្ធស្លាប់ ក្នុងថ្លុកឈាមយ៉ាងអាណោចអាធ័ម ព្រោះតែខឹងនារីរងគ្រោះជាប្រពន្ធបានរើបង្វេចចេញមករស់នៅផ្ទះឪពុកម្តាយបង្កើតវិញ។ ហេតុការណ៍នេះបានកើតឡើងនៅចំណុចភូមិទួលវិហារ ឃុំជីរោទ៍ទី២ ស្រុកត្បូងឃ្មុំ។
ក្រោយពីកាប់ប្រពន្ធស្លាប់ បុរសជាប្តីបានរត់គេចខ្លួនស្រមោល លុះនៅវេលាម៉ោង៦និង២០នាទីព្រឹក ថ្ងែទី១៥ ខែមិថុនា ឆ្នាំ២០១៩ កម្លាំងសមត្ថកិច្ចបានដឹកនាំកម្លាំងចុះចាប់បាន នៅភូមិទឹកចេញ ឃុំជីរោទិ៍ទី២ ខេត្តត្បូងឃ្មុំ។
ប្តីកំណាចដែលសម្លាប់ប្រពន្ធរួចរត់គេចខ្លួននេះ មានឈ្មោះ ព្រាប ម៉ាយ ភេទប្រុស អាយុ២៣ឆ្នាំ ។ ចំណែកនារីរងគ្រោះជាប្រពន្ធ មានឈ្មោះ ជុំ ធារី អាយុ១៧ឆ្នាំ៕