គូណ្តឹង១គូបានសម្រេចចិត្តផ្អាកពិធីមង្គលការ ដោយត្រូវពន្យារពេល ដើម្បីបង្ការកូវីដ-១៩ ដោយពួកគេបានចរចាជាមួយខាងចុងភៅ សម្អាងការ និងផ្កាស្រស់ សុទ្ធតែយល់ព្រមតាមការស្នើសុំ ដោយយល់ពីស្ថានភាពនិងកាលៈទេសៈប្រទសជាតិ ប៉ុន្តែកន្លែងទីតាំងដែលជួលសម្រាប់ធ្វើពិធីជប់លៀងមង្គលការ មិនត្រឹមតែមិនព្រមតាមការស្នើសុំពន្យារពេលនោះទេ ថែមទាំងយកតម្លៃពេញដដែល។
លោកផែង វណ្ណៈ បានបង្ហោះសារលើហ្វេសប៊ុកថា “ដើម្បីចូលរួមចំណែកជាមួយរាជរដ្ឋាភិបាលក្នុងការទប់ស្កាត់ការរីករាលដាលនៃវីរ៉ុសកូវីដ ១៩ ប្រជាពលរដ្ឋជាច្រើនបានចូលរួម ជាពិសេសពិធីរៀបមង្គលការត្រូវបានប្រជាពលរដ្ឋខ្លះផ្អាក ឬពន្យារពេលដែរ ។
ប៉ុន្តែបញ្ហាប្រឈមចំពោះប្រជាពលរដ្ឋ គឺម្ចាស់ទីតាំងជួលអាគារជួលរោងការ មិនព្រមឲ្យពន្យារពេល និង ទាមទារដាច់លុយកក់ ហើយថែមទាំងតម្រូវឲ្យពលរដ្ឋបង់លុយចំនួន៥០ភាគរយទៅក្រុមភ្លេងថែមទៀតផង ។
ទង្វើរបស់ក្រុមហ៊ុនជួលអាគារទាំងនោះបង្ហាញឲ្យឃើញថា ពួកគេមិនបានចូលរួមជាមួយរាជរដ្ឋាភិបាល និង ប្រជាពលរដ្ឋ ក្នុងការជួយទប់ស្កាត់ការរីករាលដាលនៃវីរ៉ុសកូវីដ ១៩ ទេ ពួកគេដឹងតែម្យ៉ាងគត់ គឺ លុយ លុយ លុយ ។ សូមស្ថាប័នពាក់ព័ន្ធក្នុងជួររាជរដ្ឋាភិបាលមេត្តាពិនិត្យមើលករណីនេះផង”។
ក្រោយពេលលោកផែង វណ្ណៈ បង្ហោះសារនេះ ស្រាប់តែមាននារីម្នាក់ ប្រើគណនីហ្វេសប៊ុក Raksa TR បានComment ថា “បេីខ្ញុំវិញមិនមែន50%ទេ គឺយក100%ពេញម៉ងរឿងក្រុមភ្លេងនឹង ថ្លៃកក់ហាងទៀត យល់ថាគេមានគោលការណ៌តែ នេះជាវិបត្តិសកល”។
នារីដដែលនេះ ក៏បានបង្ហោះសារលើទំព័តហ្វេសប៊ុកផ្ទាល់ខ្លួនថា “ពាក្យសំណូមពរពីម្ចាស់ដើមការសុំអោយខាងហាងដែលជួលទីតាំងរៀបចំពិធីជួយសម្រួលគ្នាផងទៅ ព្រោះនេះជាវិបត្តិសាកលលោក មិនមែនជាកំហុសឯកជនទេ សូមចូលរួមការពារសុខភាពប្រជាជនផង សុខភាពខ្ញុំក៏ដូចសុខភាពអ្នក គ្មានអ្នកណាចង់ពន្យារថ្ងៃសិរីមង្គលរបស់ខ្លួននោះទេ
- អរគុណដល់សំអាងការ
-អរគុណដល់ខាងដេគ័រផ្កា
- អរគុណដល់ខាងចុងភៅ
ដែលជួយសំរួលដោយយល់ពីស្ថានភាពបច្ចុប្បន្ននេះច្បាស់”។
ដោយឡែក កាលពីថ្ងៃទី១៧ ខែមីនា ឆ្នាំ២០២០ នារីដដែលនេះ បានបង្ហោះសារលើទំព័រហ្វេសប៊ុកថា “យើងខ្ញុំទាំងពីរនាក់ ព្រមទាំងឪពុក-ម្តាយទាំងសងខាង សូមជម្រាបជូនដល់ឯកឧត្តម លោកឧកញ៉ា លោកជំទាវ លោក លោកស្រី មិត្តភក្តិ បងប្អូន ព្រមទាំងភ្ញៀវកិត្តិយសទាំងអស់មេត្តាជ្រាបថា : នៅថ្ងៃទី២២ ខែមីនា ឆ្នាំ២០២០ ខាងមុខនេះ ដែលជាថ្ងៃសិរីមង្គលរបស់យើងខ្ញុំទាំងពីរ ដែលប្រារព្ធធ្វើឡើងនៅមជ្ឈមណ្ឌលសន្និបាត និងពិព័រណ៌កោះពេជ្រ (អាគារF) ត្រូវបានពន្យារពេលលើកថ្ងៃទៅពេលវេលាសមស្របណាមួយវិញ។
អាស្រ័យដូចបានជម្រាបជូនខាងលើ យើងទាំងពីរព្រមទាំងក្រុមគ្រួសារទាំងសងខាង សូមខន្តីអភ័យទោស និងសុំការយោគយល់ពីភ្ញៀវកិត្តិយសទាំងអស់ផង យើងខ្ញុំទាំងពីរនាក់សូមជូនពរបងប្អូនភ្ញៀវកិត្តិយសទាំងអស់ឲ្យមានសុខភាពល្អ និងសម្រេចជោគជ័យគ្រប់ភារកិច្ចទាំងអស់ សូមបងប្អូនភ្ញៀវកិត្តិយសទាំងអស់ជ្រាបជាព័ត៌មាន ដោយក្តីអនុគ្រោះ សូមអរគុណ”។
យ៉ាងណា យើងមិនទាន់ទទួលការបកស្រាយពីម្ចាស់ទីតាំងដែលនារីខាងលើ ជួលដើម្បីរៀបចំពិធីមង្គលការនោះនៅឡើយទេ៕