ភ្នំពេញ៖មាស សុខសោភា បានប្រកាសថានាងនឹងត្រៀមចេញវាយលុកទីផ្សារចម្រៀងនៅរាម នៅឆ្នាំ២០២២ ខាងមុខនេះហើយនិងថានោះគឺជាអ្វីដែលនាងមិនដែលធ្លាប់មានពីមុនមកនោះទេ ពោលគឺចេញមកម្ដងនេះប្លែកជាងលើកណាៗទាំងអស់ក្នុងអាជីពចម្រៀងរបស់នាង។ការតាំងចិត្តបែបនេះបញ្ជាក់ថាសុខសោភា បានតកុងត្រាថ្មីជាមួយរាម ទៅហើយព្រោះក្នុងតំណាក់កាលដំបូងនៃចំនួនកុងត្រាលើកទី១នោះនាងត្រូវផុតកំណត់នៅចុងខែកុម្ភៈឆ្នាំ២០២២ ពីកិច្ចសន្យាច្រៀងឲ្យផលិតកម្មមួយនេះរយៈពេល១ឆ្នាំ។ការព្រមរួមរស់ជាមួយរាម តទៅទៀតនេះបានន័យថាសុខសោភា នៅតែមិនអាចក្លាយទៅជាតារាចម្រៀងរបស់ហង្សមាសបានតទៅទៀតក្រោយពីផលិតកម្មធំនេះបានចចារកុងត្រាសោភា មកធ្វើជាតារារបស់ខ្លួនបានរងបរាជ័យអស់រយៈពេលជាង១០ឆ្នាំមកហើយ តែទីបំផុតសោភា នៅតែបន្ដក្រាញមិនចូលហង្សមាសដដែល។យ៉ាងណាតាមព័តមានបានឲ្យដឹងថាហង្សមាស និងGalaxy បានរងចាំអ៊ុតសុខសោភា អំឡុងពេលចប់កុងត្រានៅរាម នៅដើមឆ្នាំ២០២២ ខាងមុខនេះ ប៉ុន្ដែឥឡូវច្បាស់ការហើយពោលគឺសោភា នៅតែបន្ដច្រៀងឲ្យផលិតកម្មមួយនេះតទៅទៀតតាមរយៈការចាប់ដៃថៅកែស្រីរកស៊ីជាមួយគ្នា។រឿងបន្ថែមចំនួនកុងត្រាថ្មីនេះធ្វើឲ្យសុខសោភា បន្ដអាកខានក្នុងការធ្វើជាដៃគូរបស់កំពូលតារាចម្រៀងព្រាប សុវត្ថិ និងខេមរៈ សិរីមន្ដ តទៅទៀតដែរ ទើបធ្វើឲ្យអ្នកគាំទ្រតារាចម្រៀងសំនៀងផ្អែមរូបនេះចង់ឃើញនាងមានដៃដូឆ្លងឆ្លើយដែលសាកសមគ្នានោះនៅតែមិនទាន់បានដូចចិត្ត។
មាស សុខសោភា បានដើររចេញពីថោន ក្រោយនាងច្រៀងនៅផលិតកម្មមួយនេះរយៈពេល៩ឆ្នាំ ហើយការចរចារវាងនាងនិងហង្សមាសនៅចុងឆ្នាំ២០២០ បានខ្វែងគំនិតគ្នាទើបធ្វើឲ្យសោភា សម្រេចចិត្តចូលរាម និងផ្អឹបផលិតកម្មផ្ទាល់ខ្លួនCamtrax ។យ៉ាងណាអ្នកជំនាញសិល្បៈបានលើកឡើងថាការចូលរាម ទោះជាសុខសោភា ក្លាយទៅជាតួឯកក្ដី ប៉ុន្ដែនាងពិបាកក្នុងការប្រជែងជាមួយតាស្រីជូមុខរបស់ហង្សមាស និងGalaxy ព្រោះរាម ផលិតបទចម្រៀងមិនមែនដើម្បីប្រជែងផលិតកម្មទាំងពីរឡើយ។ប៉ុន្ដែមូលហេតុដែលសោភា បន្ដកុងត្រាថ្មីនៅរាម ទាំងដែលនាងមិនទាន់មានបទផ្ទុះខ្លាំងៗដូចមុននោះគឺដោយសារតែនាងចង់ពង្រឹងមុខជំនួញរកស៊ីជាមួយថៅកែស្រីរាម ។Composer ម្នាក់នៅហង្សមាសថាបើសិនជាសុខសោភា ចង់វាយលុកទីផ្សារចម្រៀងមែន ម្លេះបើនាងចូលហង្សមាស ឬGalaxyនោះច្បាស់ជាក្លាយទៅជាតារាចម្រៀងវ៉ាតារាស្រីផ្សេងអស់ទៅហើយ។ប៉ុន្ដែពេលនេះនាងនៅរាម គឺទៅដើម្បីរកស៊ី ច្រើនជាងផ្ដោតលើការច្រៀងរាំ។
មាស សុខសោភា បានក្លាយទៅជាថៅកែស្រីហាងលក់ផលិតផល និងកាហ្វេ ដោយចំណាយទុនអស់ជាច្រើនម៉ឺនដុល្លារនៅរដូវកូវីដ ហើយពេលនេះនាងលែងមានគម្រោងចេញទៅរស់នៅកាណាដាទៀតហើយ ខណៈដែលស្វាមីនាងលោកអ៊ឹត រ៉ាដា ជាគ្រូពេទ្យនោះក៍ចោលអាជីពមករស់នៅជាអចិនត្រេយ៍ជាមួយសោភា នៅខ្មែរជាច្រើនឆ្នាំហើយដែរ។ចំណងស្នេហាឆ្លងទ្វីពរបស់សុខសោភា និងលោករ៉ាដា រយៈពេល១៤ឆ្នាំ(២០០៧-២០២១)នេះទើបតែធ្លាយពួកគេទាំងពីររៀបការជាមួយគ្នាស្ងាត់ៗកាលពីថ្ងៃទី២៨ខែធ្នូឆ្នាំ២០០៩ ពោលគឺសោភា បានព្រមឲ្យមិត្តភក្ដិទម្លាយរូបអាពាហ៍ពិពាហ៍របស់ខ្លួនដែលមានតែលោកឆន សុវណ្ណារាជ និងញឹម ចាន់ថន ទៅកួចដៃនោះដើម្បីបញ្ចប់ពាក្យគេរិះគន់ថានាងចង់បន្ដភាពល្បីល្បាញក្នុងសិល្បៈសុខចិត្តសាងស្នេហ៍ឥតខាន់ស្លារ។ប៉ុន្ដែទាក់ទងរឿងរៀបការជាចំហវិញក្នុងជំនួបផ្ទាល់កន្លងមកសុខសោភា តែងតែផ្ដល់ចម្លើយខុសៗគ្នាដោយជូនកាលនាងថាចង់រៀបការនៅ២ទៅ៣ឆ្នាំខាងមុខនេះទៀត និងពេលខ្លះថាមិនដែលចង់រៀបការជាចំហម្ដងណាឡើយ។តែនៅពេលដែលសោភា រីករាយនាងបែជានិយាយថាចង់ធ្វើឲ្យអ្នកគាំទ្រភ្ញាក់ផ្អើលហេតុនេះហើយមិនអាចនិយាយទុកមុនរឿងរៀបការបានទេ។
មហាជនរងចាំមើលថាតើការប្រកាសពង្រឹងទីផ្សារចម្រៀងរបស់មាស សុខសោភា នៅឆ្នាំ២០២២ ខាងមុខនេះនាងពិតជាអាចធ្វើព្យុះភ្លៀងសារជាថ្មីបានមែនឬក៍នៅតែប្រឈមទ្រឹងតទៅទៀត?
