សហរដ្ឋអាមេរិក ៖ លោកចូ បៃដិន (Joe Biden) អតីតប្រធានាធិបតីសហរដ្ឋអាមេរិក បានអរគុណចំពោះការគាំទ្រនិងលោកទឹកចិត្តពីជុំវិញពិភពលោក រួមទាំងព្រះរាជសារពីស្តេច ឆាលស៍ ទី៣ (Charles III) នៃចក្រភពអង់គ្លេស បន្ទាប់ពីបានលោកបានលាតត្រដាងថា កើតជំងឺមហារីកក្រពេញប្រូស្តាត។
តាមប្រភពទីភ្នាក់ងារព័ត៌មានបរទេស បានរាយការណ៍ថា អតីតប្រធានាធិបតីសហរដ្ឋអាមេរិក រូបនេះ បានប្រកាសកាលពីថ្ងៃអាទិត្យ ទី១៨ ខែឧសភា ឆ្នាំ២០២៥ ថាគាត់ត្រូវបានធ្វើរោគវិនិច្ឆ័យថា មានទម្រង់ធ្ងន់ធ្ងរនៃជំងឺមហារីកក្រពេញប្រូស្តាត។
លោក ចូ បៃដិន អាយុ 8៨២ឆ្នាំ បានបង្ហោះនៅលើប្រព័ន្ធផ្សព្វផ្សាយសង្គម កាលពីព្រឹកថ្ងៃចន្ទទី១៩ ខែឧសភា ឆ្នាំ២០២៥ ថា “ជំងឺមហារីក បានប៉ះយើងទាំងអស់គ្នា។ ដូចជាអ្នករាល់គ្នាជាច្រើនដែរ។ ជីល (Jill) និងខ្ញុំ បានរៀនសូត្រថា យើងខ្លាំងបំផុតនៅកន្លែងបាក់បែក អរគុណសម្រាប់លើកទឹកចិត្តយើងឡើងដោយក្ដីស្រឡាញ់ និងការគាំទ្ររបស់អ្នក»។
កាលពីថ្ងៃអាទិត្យ ទី១៨ ខែឧសភា ឆ្នាំ២០២៥ ការិយាល័យរបស់លោកបៃដិន បានចេញសេចក្តីថ្លែងការណ៍មួយ ដោយនិយាយថា អតីតប្រធានាធិបតីអាមេរិក បានឆ្លងកាត់ការធ្វើតេស្ត បន្ទាប់ពីជួបប្រទះបញ្ហាជាមួយនឹងការបន្ទោបង់នោម របស់គាត់ ឈានទៅដល់ការរកឃើញដុំតូចមួយនៅក្នុងក្រពេញប្រូស្តាត របស់គាត់ ដែលវេជ្ជបណ្ឌិតបានធ្វើរោគវិនិច្ឆ័យកាលពីថ្ងៃសុក្រ សប្តាហ៍មុន ថាលោកបៃដិន មានជំងឺមហារីកក្រពេញប្រូស្តាតធ្ងន់ធ្ងរ និងបានរាលដាលដល់ឆ្អឹង។
ព័ត៌មានចុងក្រោយអំពីជំងឺមហារីករបស់លោក ចូ បៃដិន មានការចោទជាសំណួរថា តើគាត់ឈឺយូរប៉ុនណា? ហើយតើជំងឺនេះ ប៉ះពាល់ដល់ការបំពេញការងាររបស់លោក ពេលកាន់តំណែងជាប្រធានាធិបតី ដែរឬទេ?
ទោះបីជាយ៉ាងណា បន្ទាប់ពីជំងឺមហារីក ត្រូវបានលាតត្រដាង មនុស្សជាច្រើន បានបង្ហាញការគាំទ្រនិងលោកទឹកចិត្តចំពោះលោកបៃដិន រួមទាំងគូប្រជែងនយោបាយ លោកប្រធានាធិបតី ដូណាល់ ត្រាំ (Donald Trump) អតីតប្រធានាធិបតីអាមេរិក បារ៉ាក់ខ៍ អូបាម៉ា(Barack Obama) និងអតីតអនុប្រធានាធិបតី លោកស្រី កាម៉ាឡា ហាររីស (Kamala Harris) ។
ចំណែកព្រះរាជវាំង បាក់ឃីងហែម (Buckingham) បានឲ្យដឹងថា ស្តេចឆាលស៍ ទី៣ (Charles III) នៃចក្រភពអង់គ្លេស ទ្រង់ក៏បានសរសេរព្រះរាជសារមួយច្បាប់ ជូនទៅកាន់លោក ចូ បៃដិន ផងដែរ ដើម្បីបង្ហាញពីការគាំទ្រ និងលើកទឹកចិត្ត និងប្រទានពរ ឲ្យសំណាងល្អ៕