ភ្នំពេញ ៖ ស្រ្តីស្រស់សោភាម្នាក់ស្រវឹងស្រា បើករថយន្តទាំងមេឃកំពុងតែរលឹមស្រិចៗ រេចង្កូតទៅបុកក្បាលនាគ ពុះចែកផ្លូវវៀចអស់មួយកង់ ហើយរេចង្កូតឡើងលើសួនច្បារ ទើបរថយន្តទៅមុខលែងរួច ហេតុការណ៍នេះបង្កឲ្យមានការភ្ញាក់ផ្អើល កាលពីវេលាម៉ោង៩និង២០នាទីយប់ថ្ងៃទី៣០ ខែឧសភា ត្រង់ចំណុចស្តុបសណ្ឋាគារស តាមបណ្តោយផ្លូវព្រះមុនីវង្ស កែងផ្លូវ២១៧ សង្កាត់ផ្សារថ្មី២ ខណ្ឌដូនពេញ ។
សាក្សីឃើញហេតុការណ៍បានឲ្យដឹងថា មុនពេលកើតហេតុ មេឃកំពុងតែរលឹមស្រិចៗ ស្រាប់តែរថយន្តបង្កម៉ាកកាមរីហាយប្រីត ពណ៌ស្ករ ពាក់ស្លាកលេខ ភ្នំពេញ 2S-3447 បើកបរដោយស្រ្តីម្នាក់ក្នុងស្ថានភាពស្រវឹង បើកបរតាមផ្លូវព្រះមុនីវង្ស ទិសដៅពីត្បូងទៅជើង ក្នុងល្បឿនយ៉ាងលឿន ខណៈពេលមកដល់ចំណុចកើតហេតុ បានរេចង្កូតជ្រុលទៅបុកក្បាលនាគពុះចែកទ្រូងផ្លូវ បណ្តាលឲ្យវៀចកង់ រីឯរថយន្តបង្កវិញមិនទាន់អស់ល្បឿននោះទេ ក៏រេចង្កូតជ្រុលទៅបុកឡើងលើឃឿនសួនច្បារ នៅតាមផ្លូវលេខ២១៧ ទៅមុខលែងរួច បណ្តាលឲ្យស្រ្តីជាអ្នកបើករថយន្តរងរបួសស្រាល ភ្លាមៗនោះ អ្នកបើករថយន្តបង្ក បានរត់គេចខ្លួនបាត់ស្រមោលបន្សល់ទុកនៅតែរថយន្តបង្កនៅកន្លែងកើតហេតុ ។
ក្រោយពេលកើតហេតុ រថយន្តបង្កត្រូវសមត្ថកិច្ចវាស់វែងយកទៅរក្សាទុកនៅអធិការដ្ឋានខណ្ឌដូនពេញ រង់ចាំដោះស្រាយគ្នានៅពេលក្រោយទៀត៕