កាលពីថ្ងៃទី២៣ ខែមិថុនា ឆ្នាំ២០១៨ ប៉ូលិសអាហ្សង់ទីន នៅទីក្រុង Buenos Aires បានត្រួតពិនិត្យរកឃើញថ្នាំញៀនប្រភេទកូកាអ៊ីន និងកញ្ឆា សរុបចំនួន១,៥គីឡូក្រាម លាក់ទុកក្នុងពានរង្វាន់ចម្លងបាល់ទាត់ពិភពលោក ២០១៨ សម្រាប់លក់ឱ្យអ្នកគាំទ្រ។
នេះគឺជាវិធីសាស្ត្រថ្មីដែលជនខិលខូច ទើបតែរកឃើញ ក្នុងការជួញដូរថ្នាំញៀនរបស់ខ្លួ នដែលគ្មាននរណានឹកស្មានដល់ទាល់តែសោះ។
ជនល្មើសបានប្រើប្រាស់រូបភាពពានចម្លងបាល់ទាត់ពិភពលោក លាក់គ្រឿងញៀន ដើម្បីលាក់បាំងសកម្មភាពខុសរបស់ខ្លួន។ ទោះជាយ៉ាងណាក្តី ប៉ូលិសនៅតែអាចទប់ស្កាត់បានដដែល។ នេះចាត់ទុកថាជាមេរៀនថ្មីមួយទៀត សម្រាប់មន្ត្រីគយច្រកព្រំដែន។
នៅក្នុងប្រតិបត្តិការនេះ ប៉ូលិសបានឃាត់ខ្លួនបក្ខពួកប្រព្រឹត្តិសកម្មភាពខាងលើបាន៦នាក់ នៅទីក្រុង Matanza Partido ដែលលាក់ថ្នាំញៀនក្នុងពានរង្វាន់បាល់ទាត់ពិភពលោក មានពណ៌មាស និងពណ៌ទង់ជាតិអាហ្សង់ទីន ស-ផ្ទៃមេឃ នៅផ្នែកខាងក្រោម៕
