យោងតាមប្រភពជាច្រើនបានប្រាប់សារព័ត៌មានរ៉យទ័ចេញផ្សាយកាលពីថ្ងៃអង្គារទី ២៥ ឧសភា ២០២១ ថា កាលពីយប់ថ្ងៃចន្ទ ពួកយោធាប្រទេសម៉ាលី បានចាប់ឃុំខ្លួនប្រធានាធិបតីលោក Bah Ndaw នាយករដ្ឋមន្ត្រីលោក Moctar Ouane និងរដ្ឋមន្ត្រីក្រសួងការពារជាតិលោក Souleymane Soucoure ដែលកំពុងដឹកនាំដ្ឋាភិបាលបណ្តោះអាសន្ន។ រដ្ឋប្រហារយោធាថ្មីនេះកាន់តែធ្វើអោយនយោបាយប្រទេសម៉ាលីកធ្លាក់ចូលក្នុងវិបត្តិកាន់តែជ្រៅ ក្នុងរយៈពេលតែប៉ុន្មានខែបន្ទាប់ពីយោធាបណ្តេញប្រធានាធិបតីមុនចេញពីអំណាច។
ប្រភពព័ត៌មានខាងលើបានអោយដឹងទៀតថា អ្នកទាំងបីត្រូវបានយកទៅឃុំខ្លួននៅបន្ទាយយោធាក្នុងតំបន់Kati ក្រៅរដ្ឋធានីBamako ។ រដ្ឋប្រហារយោធានេះបានកើតឡើងតែប៉ុន្មានម៉ោង បន្ទាប់ពីសមាជិកមេដឹកនាំយោធា២នាក់ បានបាត់បង់តំណែងក្នុងការរុះរើរដ្ឋាភិបាលបណ្តោះអាសន្ន។
រដ្ឋប្រហារនេះបានកើតឡើង បន្ទាប់ពីក្រុមយោធាមើលឃើញថា រដ្ឋាភិបាលបណ្តោះអាសន្នបច្ចុប្បន្ននេះកំពុងទាត់ចោលអតីតក្រុមយោធា ដែលជិតស្និទ្ធនឹងខ្លួន ជាពិសេសការដកលោក Sadio Camara ពីរដ្ឋមន្ត្រីការពារជាតិ និងលោក Modibo Kone ពីរដ្ឋមន្ត្រីសន្តិសុខ ហើយដាក់ជំនួសដោយ លោក Soylemane Doucoure និងលោក Mamadou Lamine Ballo ជាដើម។
ប្រទេសម៉ាលីមានរដ្ឋប្រហារយោធាម្តងរួចមកហើយកាលពីខែសីហា ឆ្នាំ២០២០ ដែលបង្ខំឲ្យប្រធានាធិបតីជាប់ឆ្នោត លោក Ibrahim Boubacar Keita ចុះចេញពីអំណាច និងបានប្រកាសរំលាយសភា។ វាជារដ្ឋប្រហារលើកទី៤ ក្រោយទទួលបានឯករាជ្យ ហើយក៏ជារដ្ឋប្រហារលើកទី២ក្នុងរយៈមួយឆ្នាំនេះ។
ក្រោយលោក Keita ចុះចេញពីតំណែង ក្រុមយោធាដែលដឹកនាំដោយលោក Assimi Goita បានបង្កើតរដ្ឋាភិបាលបណ្តោះអាសន្ន ដោយជ្រើសរើសលោក Bah Ndaw ឧត្តមសេនីយ៍ចូលនិវត្តន៍ ធ្វើជាប្រធានាធិបតី ហើយលោក Moctar Ouane ជានាយករដ្ឋមន្ត្រី។
ប្រតិកម្មសហគមន៍អន្តរជាតិ
រយៈពេលតែប៉ុន្មានម៉ោងក្រោយការចាប់ខ្លួន សហគមន៍អន្តរជាតិបានចេញសេចក្តីថ្លែងការណ៍និងថ្កោលទោសអោយក្រុមយោធាដោះលែងប្រធានាធិបតី នាយករដ្ឋមន្ត្រី និងអ្នកនយោបាយផ្សេងទៀត ជាបន្ទាន់ និងគ្មានលក្ខខណ្ឌ។
បេសកជនពិសេសរបស់អង្គការសហប្រជាជាតិប្រចាំប្រទេសម៉ាលីបានអំពាវនាវឱ្យមានការដោះលែងជាបន្ទាន់និងគ្មានលក្ខខណ្ឌ និងបាននិយាយថាអ្នកដែលចាប់មេដឹកនាំនឹងត្រូវឆ្លើយចំពោះសកម្មភាពរបស់ពួកគេ។
គណៈប្រតិភូមកពីស្ថាប័នធ្វើសេចក្តីសម្រេចចិត្តថ្នាក់តំបន់កំពូលប្រចាំសហភាពអាហ្វ្រិក សហគមន៍សេដ្ឋកិច្ចប្រទេសអាហ្វ្រិកខាងលិច( ECOWAS )នឹងធ្វើទស្សនកិច្ចនៅទីក្រុង Bamako នៅថ្ងៃអង្គារនេះដើម្បីជួយដោះស្រាយការប៉ុនប៉ងធ្វើរដ្ឋប្រហារ ។ចំណែកឯក្រសួងការបរទេសសហរដ្ឋអាមេរិកបានអំពាវនាវនៅក្នុងសេចក្តីថ្លែងការណ៍មួយអោយមាន ការដោះលែងដោយឥតលក្ខខណ្ឌចំពោះអ្នកជាប់ឃុំទាំងអស់៕