ភ្នំពេញ៖លោកសុខ មេសា ហៅនាយចឺម ទោះជាមិនសូវបានកម្ពស់មែន ប៉ុន្ដែថ្វីមាត់របស់នាយធ្វើឲ្យតារាស្រីៗដែលលោកមេសា ដាក់ទិសដៅថាញ៉ែហើយពិបាករត់គេចពីកណ្ដាប់ដៃតារាចម្រៀងសាន់ដេរូបនេះណាស់ព្រោះពួកនាងជឿរសម្ដីនាយចឺម ថាស្រលាញ់ស្មោះតែអូនម្នាក់គត់ ឬអូនជានារីចុងក្រោយនោះស៊ប់តែម្ដង។ប៉ុន្ដែក្រោយពីប្រេះឆានាយចឺម បានបន្ទោសទៅលើនាងៗថាមិនមានភាពស្មោះត្រង់ជាមួយនាយ ឬចូលមកក្នុងជីវិតមើលឃើញតែផលប្រយោជន៍ពីនាយទៅវិញទើបធ្វើឲ្យស្រីៗទាំងនោះចត់បាយដោយសារតែនាយចឺម ព្រោះអស់ទាំងខ្លួន ហើយត្រូវលោកមេសា ដៀលទៀតផង។
គេឃើញតារាសម្ដែងដល់ទៅ៣ដួងមកហើយដែលសុខចិត្តដើរចេញពីនាយចឺម ក្រោយដឹងថានាងៗមិនអាចធ្វើឲ្យលោកមេសា ត្រូវចិត្តឬធ្វើជាប្រពន្ធស្របច្បាប់របស់អ្នកចម្រៀងរូបនេះបានក្នុងនោះគឺសុទ្ធតែជាតារាទាំង៣ដួងសុទ្ធមានសាច់សខ្ចីដូចគ្នាគឺមាននាងអៀ ម៉េងលិ ហៅអូនម៉ីម៉ី ,អតីតFreshie លេខ១កាលពីឆ្នាំ២០១៥ នាងពុធ ស្រីខួច និងតារាសម្ដែងរូបស្រស់នាងហ្វា ហ្វា ហៅស្រីយី ត្រូវនាយចឺម ផ្ដាច់ស្នេហ៍កណ្ដាលទីដូចគ្នា។ចំពោះនាងម៉ីម៉ី និងពុធ ស្រីខួច ពួកគេរកបានគូស្នេហ៍ថ្មីរៀងៗខ្លួនអស់ទៅហើយតាំងពីក្រោយចែកផ្លូវគ្នាជាមួយនាយចឺម ភ្លាមៗម្លេះ។ប៉ុន្ដែសម្រាប់ស្រីយី វិញពេលនេះកំពុងតែតុកស៊ិកខ្លាំងនិងមិនទាន់យកសង្សារថ្មីទេបើទោះជានាយចឺម កំពុងតែបង្ហាញភាពស្អិតល្មូតស្នេហ៍ជាមួយសង្សារថ្មីនាងសេង សុខគីម ជាចំហហើយសរសើរសង្សារក្រោយពេញៗមាត់ក្ដី។ដោយសារតែនាយចឺម ឆ្វាក់តែស្រីស្អាតៗនោះគេជឿរថាមានប្រុសៗមិនតិចនោះទេ ដែលឆ្ងល់ថាហេតុអីនាយចឺម ញ៉ែតារាស្រីៗទាំងនោះច្រើនតែបានតែម្ដង ពិសេសគឺតារាដែលថតMVជាមួយនាយ…។ចម្លើយនាយចឺម ធ្លាប់ប្រាប់អ្នកយកព័តមានយើងថាបើយកសង្សារគឺត្រូវតែស្អាត បើមិនស្អាតតើយកមកធ្វើអី?
តាមព័តមានថាតារាស្រីស្អាតៗដែលលង់ស្នេហ៍នាយចឺម ទាំងនោះដោយសារតែពួកគេជឿរពាក្យលួងលោមសុំស្នេហ៍របស់អតីតតារាកំប្លែងCtnរូបនេះ ពិសេសគឺការនាំនាងៗទៅជួបគ្រួសារនៅស្រុកកំណើត។ប៉ុន្ដែពេលចែកផ្លូវគ្នានាយចឺម ហាក់ចាត់ទុកថាជារឿងធម្មតាមិនដែលកើតទុក្ខឬខូចចិត្តម្ដងណាឡើយ។
ទោះជានាយចឺម ញ៉ែបានតារាស្រីៗជាបន្ដបន្ទាប់ក្ដី តែដូចពាក្យចាស់ពោលថា”ដំរីជើងបួន គង់តែមានភ្លាត់”ព្រោះកាលពីថ្ងៃទី១៨ខែធ្នូឆ្នាំ២០១៩ នាយចឺម បានរងគ្រោះដេរអស់៥ថ្នេរព្រោះតែត្រូវកីឡាករបាល់ទាត់ឈ្មោះង៉ែត លីទី វាយក្បាលឲ្យរបួសធ្ងន់ដោយចោទនាយថាឆាតទៅញ៉ែសង្សាររបស់ខ្លួនឈ្មោះនាងស្រីលាទ ។ប៉ុន្ដែនាយចឺម មិនបាក់ស្បាតនោះទេ ហើយគ្រាន់តែបែកបាក់នាងហ្វា ហ្វា មិនបានប៉ុន្មានម៉ោងផងក៍ប្រកាសរកបានសង្សារថ្មីទី៤សាច់សខ្ចីដូចម៉ែសំឡី មិនចាញ់ស្រីយី ឡើយ។នាយចឺម ថាស្រីស្នេហ៍ថ្មីនេះជានារីចុងក្រោយក្នុងជីវិតរបស់នាយ ហេតុនេះហើយគេរងចាំមើលថាតើនាយចឺម-សុខគីម អាចរក្សារស្នេហានេះបានយូរអង្វែងបានរហូតដល់ឈានទៅជីវិតអាពាហ៍ពិពាហ៍ដែរឬទេ?
តាមព័តមានថាក្រៅពីនាយចឺម តារាដែលពូកែញ៉ែស្រីស្អាតធ្វើឲ្យពួកនាងជឿរស្លុបនោះមានដូចជានាយពាក់ម៉ី,នាយក្រូច និងលោកសាន្ដ ពេជ្រសុភារិទ្ធិ ហៅអ៊ីណូ ។ចំពោះនាយចឺម វិញធ្លាប់ត្រូវបានម្ដាយតារាសម្ដែងមួយចំនួនបារម្ភនៅពេលដែលកូនស្រីរបស់ពួកគាត់ថតMVជាមួយនាយចឺម ព្រោះតែលោកមេសា ពូកែញ៉ែពេក ហើយបើមានឈុតស្នេហានាយចឺម គិតតែពីគ្រញិចអោបថើបតួស្រីទាំងកំរោលបើទោះជាអ្នកដឹកនាំមិនទាន់បញ្ជារក្ដី ទើបធ្វើឲ្យតួស្រីៗខ្លះគ្រវីក្បាលតែម្ដងពេលឮថាថតបទនាយចឺម ។ទស្សនិកជនរងចាំមើលថាស្រីស្រស់សេង សុខគីម នឹងមានចំណុចពិសេសជាងអូនម៉ីម៉ី,ពុធ ស្រីខួច និងហ្វា ហ្វា អាចធ្វើឲ្យនាយចឺម ស្មោះស្ម័គ្រតែរូបនាងម្នាក់និងជានារីចុងក្រោយដូចការប្រកាសរបស់ម្ចាស់បទ”នរក១៨ជាន់”រូបនេះបានមែនឬនាយចឺម អាចមិនត្រូវចិត្តហើយស្វែងរកសង្សារទី៥?
