ភ្នំពេញ៖តារាចម្រៀងសាន់ដេលោកសុខ មេសា ហៅនាយចឺម បានទទួលស្គាល់ថាកំពូលស្នេហ៍ថ្មីរបស់នាយនាងសេង សុខគីម ពិតជាមេម៉ាយកូន១ដូចគេនិយាយមែន។ការអះអាងបែបនេះក្រោយពីមានការលើកឡើងថានាយចឺម មិនសមណាចោលសង្សារក្រមុំអូនហ្វា ហ្វា មកស្រវ៉ាអោបអ្នកមេម៉ាយកូន១សេង សុខគីម សោះពិតជាចោលអង្ករ យកអង្កាមមែន…។
នាយចឺម ប្រាប់”នគរធំ”តាមទូរស័ព្ទកាលពីរសៀលថ្ងៃទី២៨ខែតុលាថាសង្សារនាយគឺពិតជាមេម៉ាយកូនដូចគេថាមែន ហើយនាងមិនលាក់បាំងរឿងនេះទេបង្ហាញឲ្យគេដឹងអស់ហើយតើ។នាយចឺម រៀបរាប់ថានាយនិងអូនសុខគីម ស្រលាញ់គ្នាដោយចិត្តនិងចិត្តដោយខ្លួនឯង គ្មានអ្នកណាណែនាំនោះទេ ហើយដោយសារតែពេលនេះស្ថិតក្នុងតំណាក់កាលត្រឹមជាសង្សារនិងកំពុងស្វែងយល់ចិត្តគ្នាហេតុនេះហើយមិនអាចនិយាយរឿងភ្ជាប់ពាក្យឬរឿងរៀបការបានឡើយ។នាយចឺម ដែលថានាយស្រលាញ់តែអូនសុខគីម ម្នាក់គត់និងចាត់ទុកថាជានារីចុងក្រោយរបស់នាយនោះនៅតែអះអាងថាប្ដីប្រពន្ធខ្លះក៍គង់តែនៅបែកគ្នាចុះទម្រាំ នាយនិងសុខគីម ត្រឹមជាសង្សារនិងគ្នាមិនដឹងថាថ្ងៃក្រោយនឹងមានរឿងរ៉ាវអ្វីកើតឡើងនោះទេ ហេតុនេះហើយនាយមិនអាចនិយាយទុកមុនបានឡើយ។
ឆ្លើយតបសំណួរថាតើហេតុអ្វីបាននាយចឺម ផ្ដាច់ស្នេហ៍នាងហ្វា ហ្វា នោះអតីតតារាកំប្លែងCtn រូបនេះថានាយក៍មិនចង់ជួបរឿងអីចឹងដែរ តែធ្វើម៉េចបើមនុស្ស២នាក់បែកគ្នាទៅហើយគឺមានតែសាមីខ្លួនទាំងសងខាងទេទើបអាចដឹងរឿងនេះច្បាស់ ព្រោះចង្កៀងផ្ទះអ្នកណាភ្លឺផ្ទះអ្នកនោះ។យ៉ាងណានាយចឺម ថារវាងនាយ និងហ្វា ហ្វា គឺបែកគ្នាដោយសន្ដិវិធីគ្មានជម្លោះឬគុំគួនគ្នានោះទេ។តារាសាន់ដេបន្ថែមថាពីមុនលោកមិនដែលនិយាយរឿងរ៉ាវទាំងនេះប្រាប់អ្នកកាសែតទេ តែនេះលោកសូមនិយាយក្នុងនាមជាសុភាពបុរសថាគ្មានអ្នកណាចង់បែកគ្នាទេ ។ប៉ុន្ដែធ្វើម៉េចរឿងទាំងនោះវាបានកើតឡើងទៅហើយ។លោកមេសា ថាមានតែអ្នកធ្លាប់មានសង្សារទេ ទើបយល់អារម្មណ៍មួយនេះថាម៉េចបានសុខៗបែកគ្នា។
នាយចឺម ថ្លែងថា”ខ្ញុំនិងហ្វា ហ្វា បែកគ្នាដោយយល់ព្រមទាំងសងខាងគ្មានអ្នកទី៣ចូលជ្រៀតជ្រែកអីទេ។ប៉ុន្ដែមានតែយើងទាំង២នាក់ទើបដឹងរឿងនេះច្បាស់ហើយខ្ញុំមិនអាចនិយាយលើសពីនេះបាន ព្រោះយើងបែកគ្នាដោយសន្ដិវិធីមិនមែនជាសត្រូវឬគំគួនគ្នាទេ។តែអ្នកខ្លះគាត់មិនដឹងរឿងចេះតែខមិនជេខ្ញុំអី ខ្ញុំសូមឲ្យបងប្អូនទាំងអស់មេត្តាឈប់ខឹងខ្ញុំទៅព្រោះខ្ញុំនិងហ្វា ហ្វា ត្រឹមជាសង្សារគ្នាហើយពួកយើងក៍ដល់ផ្លូវបំបែក ធើម៉េចបើយើងមិនអាចបន្ដដំណើរជាមួយគ្នាទៅមុខទៀត”។
ការប្រេះឆាស្នេហ៍របស់នាយចឺម ជាមួយនាងនាងហ្វា ហ្វា នោះគឺជាលើកទី៣ហើយសម្រាប់នាយចឺម ដែលមិនអាចរក្សារស្នេហាបានព្រោះថាលោកមេសា ធ្លាប់ចែកផ្លូវគ្នាជាមួយអតីតសង្សារនាងអៀ ម៉េងលិ ហៅអូនម៉ីម៉ី និងពុធ ស្រីខួច មុននាងហ្វា ហ្វា ទៅទៀត។ប៉ុន្ដែមានតែសង្សារទី៤របស់នាយចឺម នាងសេង សុខគីម ម្នាក់ប៉ុណ្ណោះដែលនាយចឺម ថានឹងបញ្ឈប់នាយ ត្រឹមនេះមិនឲ្យនាយទៅមើលឃើញស្រីផ្សេងទៀតឡើយ។ដោយមិនសំដៅថាជាសង្សារទីប៉ុន្មានឬឈ្មោះអីខ្លះនោះនាយចឺម ធ្លាប់ចេញសារដោយដាក់បន្ទុកទៅលើអតីតសង្សាររបស់ខ្លួនថាសុទ្ធតែចូលមកដើម្បីតែប្រយោជន៍ពីនាយ ដែលខុសពីម្ចាស់ស្នេហ៍ថ្មីរបស់នាយនាងសុខគីម គឺជានារីដែលត្រូវចិត្តនាយគ្រប់យ៉ាងតែម្ដង។យ៉ាងណានាយចឺម ថាម្ដាយរបស់នាយនៅស្រុកណើតឯខេត្តកំពង់ស្ពឺនោះចង់ឃើញនាយ រក្សារស្នេហាឲ្យបានយូអង្វែង ប៉ុន្ដែគាត់ក៍មិនដឹងថាម៉េចដែរនៅពេលដែលនាយបែកពីនាងហ្វា ហ្វា នោះព្រោះថាម្ដាយមិនមែនរស់នៅជាមួយនាយ ឡើយហេតុនេះហើយរឿងគូជីវិតគឺមានតែមនុស្ស២នាក់ទើបដឹងច្បាស់។នាយចឺម ថាពេលនេះនាយ និងសង្សារថ្មីនាងសុខគីម កំពុងតែចុះសម្រុងគ្នាល្អនិងមិនគិតលើរឿងអតីតកាលដូចគ្នា។តែនាយថារឿងរៀបការគឺនៅត្រូវការពេលវេលាវែងឆ្ងាយណាស់ មិនអាចថាឆ្នាំណាទើបរៀបចំឡើងបានទេ៕
