ភ្នំពេញ៖ខេម បានមកដល់ស្រុកវិញជិត១ខែទៅហើយក្រោយពីនាំបណ្ដូលចិត្តអ្នកនាងស្រីកាទៅដើរលេងនៅទឹកដីបារាំងហើយបង្ហួសទៅដល់អាឡឺមង់និងស្វីសរយៈពេលជាង២ខែ។ទោះជាមកដល់ស្រុកវិញមែនតែខេម នៅមិនទាន់ចេញច្រៀងសម្ដែងតាមបណ្ដារឆាកតន្រ្ដីតាមប៉ុស្ដិ៍ទូរទស្សន៍នោះទេ ខណៈដែលតារាគេសង្ស័យថាមានកូន២រូបនេះត្រៀមខ្លួនច្រៀងសម្ដែងជាមួយនាងតន់ ច័ន្ទសីម៉ា ឡើងវិញក្រោយពីពួកគេខកខានការចាប់ដៃគ្នាមួយរយៈពេលធំព្រោះតែស្រីស្រស់សីម៉ា មុននេះសម្រុកច្រៀងឆ្លងឆ្លើយជាមួយលោកកំពូលតារាចម្រៀងលោកព្រាប សុវត្ថិ ។
ខេម ធ្លាប់ប្រាប់តាមទូរស័ព្ទថាលោកមានអារម្មណ៍ស្រស់ថ្លាច្រើនក្នុងតំណើរកម្សាន្ដនៅក្រៅស្រុកជាង២ខែកន្លងទៅថ្មីៗនេះ។ប៉ុន្ដែលោកសុណារិន ថាទាក់ទងការងារសិល្បៈវិញលោកនៅមិនទាន់កំណត់ចេញច្រៀងលើឆាកវិញពេលណាទេ តែនឹងត្រៀមថតបទថ្មីៗ។ដោយឡែកតារាតូចតន់នាងច័ន្ទសីម៉ា ធ្លាប់វាចារថានាងនឹងចាប់ដៃច្រៀងសម្ដែងជាមួយលោកខេម វិញព្រោះតែកន្លងមកនាងមានមោទនភាពដែលបានធ្វើជាដៃគូជាមួយកំពូលតារាចម្រៀងព្រាប សុវត្ថិ និងខេម។
ខេម បានចូលច្រៀងនៅGalaxy រយៈពេលជាង១ឆ្នាំទៅហើយក្រោយចាកចេញពីថោនទាំងចម្រូងចម្រាសហើយទស្សនិកជនដែលធ្លាប់តែគាំទ្រខេម លើកឡើងថាតារាចម្រៀងសំនៀងស្អករូបនេះមិនសូវមានសន្ទុះខ្លាំងដូចកាលនៅថោន ឡើយព្រោះថាឥទ្ធិពលរបស់កំពូលតារាចម្រៀងព្រាប សុវត្ថិ គ្របពីលើតែម្ដង។ដោយឡែកប្រភពជិតស្និតបានឲ្យដឹងថាលោកខេម ដាច់ខាតទោះជាទៅផលិតកម្មណាក៍ដោយលោកមិនដែលចង់នៅក្រោមតារាណាម្នាក់ទេហេតុនេះហើយការធ្វើជាតួរងនៅGalaxy នោះប្រាកដជាលោកសុណារិន មិនសប្បាយចិត្តនោះទេ។ប៉ុន្ដែខេម ធ្លាប់ប្រាប់អ្នកកាសែតត្រង់ៗថាលោកមិនដែលចាត់ទុកលោកព្រាប សុវត្ថិ ជាឆ្អឹងទទឹងកនោះទេបើទោះជាលោកបានចូលGalaxy មុនលោកក្ដី។
គូររំលឹកថាលោកប៉ុន សុណារិន ហៅខេម បានដឹកដៃសំណព្វចិត្តរបស់លោកអ្នកនាងស្រីកា ទៅបារាំងកាលពីថ្ងៃទី២០ខែកក្កដា នឹងទើបតែបណ្ដើរគ្នាចូលស្រុកវិញថ្ងៃទី៦ខែតុលា ហើយថ្មីៗនេះគេសង្ស័យថាខេម ដែលភ្ជាប់ស្នេហ៍ជាមួយស្រីកា ជាង៥ឆ្នាំនោះពួកគេមានកូន២នាក់ទៅហើយ(ស្រី១)តែខេម ប្រកែក។យ៉ាងណាខេម សារភាពថាលោកពិតជាចង់បានកូនដូចគេគ្រប់គ្នាដែរ តែការកំណត់ថ្ងៃរៀបការជាមួយម្ចាស់បេះដូងលោកមិនអាចនិយាយទុកជាមុនបានឡើយ៕
