សហរដ្ឋអាមេរិក និងអង្គការណាតូបាននិយាយថា រុស្ស៊ីនៅតែកំពុងកសាងកម្លាំងកងទ័ពនៅជុំវិញអ៊ុយក្រែននៅថ្ងៃពុធ១៦កុម្ភៈទោះបីជាមានការអះអាងពីទីក្រុងម៉ូស្គូថាខ្លួនកំពុងដកថយក៏ដោយ។នេះវាធ្វើអោយមានការចោទសួរពីបំណងប្រាថ្នារបស់ប្រធានាធិបតី វ្ល៉ាឌីមៀ ពូទីន ក្នុងការចរចារកដំណោះស្រាយចំពោះវិបត្តិអ៊ុយក្រែន។យោងតាមមន្ត្រីជាន់ខ្ពស់អាមេរិកបាននិយាយថា ការអះអាងរបស់រុស្ស៊ីដែលថាខ្លួនកំពុងដកកងទ័ពចេញពីព្រំដែនជាមួយអ៊ុយក្រែនគឺមិនពិតទេ។ផ្ទុយទៅវិញរុស្ស៊ីបាន បន្ថែមទាហានចំនួន7000នាក់បានមកដល់ក្នុងរយៈពេលប៉ុន្មានថ្ងៃថ្មីៗនេះ។
រដ្ឋមន្ត្រីការបរទេសអាមេរិក លោក Antony Blinken បាននិយាយថា អង្គភាពសំខាន់ៗរបស់រុស្ស៊ី កំពុងធ្វើដំណើរឆ្ពោះទៅព្រំដែន តែមិនមែនទៅឆ្ងាយទេ។Blinken បាននិយាយនៅក្នុងបទសម្ភាសន៍មួយនៅលើទូរទស្សន៍ MSNBC ថាវាជាអ្វីដែលរុស្ស៊ីនិយាយ ហើយបន្ទាប់មកមានអ្វីដែលរុស្ស៊ីធ្វើ។យើងមិនបានឃើញការដកថយនៃកងកម្លាំងរបស់រុស្ស៊ីទេ”។ យើងបន្តមើលឃើញអង្គភាពសំខាន់ៗធ្វើដំណើរឆ្ពោះទៅព្រំដែន តែមិនមែននៅឆ្ងាយពីព្រំដែននោះទេ។ប្រធានាធិបតីអាមេរិក លោកចូ បៃឌិននិងអធិការបតីអាល្លឺម៉ង់ OlafScholz បានព្រមព្រៀងគ្នានៅក្នុងការហៅទូរស័ព្ទកាលពីថ្ងៃពុធថាប្រទេសរុស្ស៊ីត្រូវតែចាត់វិធានការជាក់ស្តែងឆ្ពោះទៅរកការបន្ថយកម្តៅជម្លោះ។អគ្គលេខាធិការអង្គការណាតូ លោក Jens Stoltenberg បាននិយាយថា ការចល័តទ័ព និងរថក្រោះ ទៅមក មិនមែនជាភស្តុតាងនៃការដកទ័ពចេញនោះទេ។លោកបាននិយាយមុនពេលកិច្ចប្រជុំសម្ព័ន្ធភាពនៅទីក្រុងប្រ៊ុចសែលថា អ្វីដែលយើងឃើញគឺថាពួកគេបានបង្កើនចំនួនទាហាន ហើយកងទ័ពកាន់តែច្រើនកំពុងធ្វើដំណើរ។លោកStoltenbergបាននិយាយថាអង្គការណាតូអាច បង្ហាញពីការបរាជ័យរបស់រុស្ស៊ីក្នុងការដកកងទ័ពរបស់ខ្លួនមកវិញ ជាមួយនឹងរូបភាពផ្កាយរណប។
ណាតូពិចារណាបង្កើតសមរភូមិថ្មីបន្ថែមនៅជិតអ៊ុយក្រែន
លោក Jens Stoltenberg អគ្គលេខាធិការអង្គការណាតូ បានប្រកាសកាលពីថ្ងៃពុធថារដ្ឋមន្ត្រីការពារជាតិរបស់អង្គការណាតូបានសម្រេចចិត្តបង្កើនវត្តមានយោធារបស់ពួកគេនៅក្នុងទឹកដីសម្ព័ន្ធមិត្តនៅជិតប្រទេសអ៊ុយក្រែនបើទោះបីជាមានកាប្រឆាំងពីទីក្រុងមូស្គូក៏ដោយ។គម្រោងនេះអាចរួមបញ្ចូលទាំងការបង្កើតសមរភូមិថ្មីរបស់ណាតូនៅអឺរ៉ុបកណ្តាល ខាងកើត និងភាគអាគ្នេយ៍ បន្ថែមពីលើក្រុមដែលបានបង្កើតឡើងរួចហើយនៅក្នុងរដ្ឋបាល់ទិក។លោកបានបន្ថែមថាមេបញ្ជាការយោធានឹងធ្វើការលើព័ត៌មានលម្អិតនិងរាយការណ៍ត្រឡប់មកវិញនៅក្នុងសប្តាហ៍ខាងមុខ។
លោកបានពន្យល់ពីចំណាត់ការនេះថា៖ «រុស្ស៊ីបានបង្ហាញឆន្ទៈក្នុងការប្រើកម្លាំងដើម្បីព្យាយាមបង្ខិតបង្ខំប្រទេសផ្សេងទៀត។រុស្ស៊ីបានបង្ហាញឱ្យឃើញថាខ្លួនពិតជាមានឆន្ទៈក្នុងការប្រកួតប្រជែងគោលការណ៍ជាមូលដ្ឋានសម្រាប់សន្តិសុខរបស់យើង”។ប្រធានសម្ព័ន្ធភាពបាននិយាយថា ទោះបីជារុស្ស៊ី ដកទ័ពមកវិញនៅពេលនេះ ក៏ដោយ ព្រឹត្តិការណ៍ថ្មីៗបង្ហាញថា NATOត្រូវតែពិចារណាលើការផ្លាស់ប្តូររយៈពេលវែងចំពោះ ការចែកចាយ កងកម្លាំងរបស់ខ្លួននៅអឺរ៉ុប៕