លោកស្កុត ម៉រីស៊ុន នាយករដ្ឋមន្ត្រីអូស្ត្រាលីបានទាមទារឱ្យមានការស៊ើបអង្កេតពេញលេញលើឧប្បត្តិហេតុថ្មីៗនេះដែលនាវាកងទ័ពជើងទឹកចិនបានបាញ់ភ្លើងឡាស៊ែរលើយន្តហោះចម្បាំងរបស់ខ្លួន។លោកបានបញ្ជាក់ថាទង្វើរបស់ចិនមិនអាចទទួលយកបានទាំទេ។យើងបានទាមទារឱ្យមានការស៊ើបអង្កេតលើឥរិយាបថរបស់ចិន។យើងរំពឹងថាប្រទេសចិននឹងផ្តល់ចម្លើយមួយចំនួនលើបញ្ហាទាំងនោះ។ក្រសួងការពារជាតិអូស្ត្រាលីបាននិយាយនៅមុននេះបន្តិចថាកាលពីថ្ងៃព្រហស្បតិ៍សប្តាហ៍មុន នាវាចម្បាំងចិនបានបាញ់ឡាស៊ែរនៅយន្តហោះស៊ើបការណ៍ P-8Aposeidon របស់អូស្ត្រាលីដែលកំពុង
ហោះហើរចេញពីឆ្នេរសមុទ្រភាគខាងជើងរបស់ប្រទេស។ ក្រសួងបាននិយាយនៅពេលនោះថាសកម្មភាពដែលបានរាយការណ៍អាចមានគ្រោះថ្នាក់ដល់អាយុជីវិតនាវិកអូស្ត្រាលី។ក្រសួងការពារជាតិអូស្ត្រាលីក៏បានអោយដឹងទៀត ថា យន្តហោះល្បាតដែនសមុទ្រ P-8A Poseidon បានរកឃើញឡាស៊ែរដែលបញ្ចេញពីនាវាកងទ័ពរំដោះប្រជាជនចិនពីរគ្រឿងដែលកំពុងធ្វើដំណើរជិតឆ្នេរសមុទ្រភាគខាងជើងនៃប្រទេសអូស្ត្រាលី។
ក្រុងប៉េកាំងមិនបានធ្វើអត្ថាធិប្បាយលើការចោទប្រកាន់នេះទេរហូតមកដល់ពេលនេះប៉ុន្តែបានច្រានចោលការអះអាងស្រដៀងគ្នារបស់អាមេរិកកាលពីឆ្នាំ 2020។ កងទ័ពជើងទឹកអាមេរិកបាននិយាយនៅពេលនោះថានាវាចម្បាំងចិនបានបាញ់ឡាស៊ែរលើយន្តហោះចារកម្មអាមេរិកនៅមហាសមុទ្រប៉ាស៊ីហ្វិក៕