ព្រាប សុវត្ថិ -ខេមរៈ សិរីមន្ដ៖ក្រោយឡើងឧកញ៉ាតើគូ​តែ​​នៅច្រៀងឬ ឈប់ល្អជាង?

ភ្នំពេញ៖ព្រាប សុវត្ថិ បានឡើងជាឧកញ៉ារយៈពេលជិត២ខែមកហើយដែល​ពេលនេះគេឃើញ​លោកចាប់​ផ្ដើម​រយាលៗពីការច្រៀងសម្ដែងតាមឆាកតន្រ្ដីនិងរួមទាំងការថតបទចម្រៀងMV ផងដែរ ពោលគឺយូៗម្ដង​គេឃើញ​លោកច្រៀងនៅកម្មវិធី​មង្គលការនិងឆាករបស់​ក្រុម​ហ៊ុន​ស្រាបៀរប៉ុណ្ណោះ។សកម្មភាពបែបនេះធ្វើឲ្យព្រាប សុវត្ថិ អាចនឹងលែង​មានបទ​ចម្រៀ​​​ងដិត​ដល់លើទីផ្សារជាមិនខាន ខណៈដែលតាំងពីទៅជ្រកនៅGalaxy ជិត២ឆ្នាំនេះ​ព្រាប សុវត្ថិ ក៍មិនសូវមានបទផ្ទុះខ្លាំងៗដូចមុនដែរពោល​គឺអ្នកគាំទ្រលោកនិយម​តែស្ដាប់​និង​ច្រៀងបទ​លោក​ចា​ស់​​ៗច្រើនជាងបទថ្មី។គេកត់សម្គាល់ដែរថាក្រោយក្លាយទៅជាឧកញ៉ាមកលោកព្រាប សុវត្ថិ បានងាកទៅ​បុក​ការ​ធ្វើជំនួញច្រើនជាងមុនដូចជាការលក់ដីធ្លី,សាប៊ូ និងភោជនីយដ្ឋាន រួមទាំងការសាងសង់រម្យនីយដ្ឋាននៅខេត្ត​មណ្ឌុ​លគិរីជាដើមដែលអាចនិយាយបានថាពេលនេះលោកសុវត្ថិ មិនពឹងលើ​អាជីពសិល្បៈទាំង​ស្រុងដូចមុន​ទៀ​ត​ឡើយ។

ដោយឡែកលោកខែម ប៊ុនថៃ វិញបានឡើងជាឧកញ៉ាជាង៤ខែមកហើយដែល​ពេល​នេះ​លោកក៍មិនសូវចេញ​បទ​ថ្មីៗ ឬបង្ហាញខ្លួនឲ្យបានញឹកញាប់តាមឆាកតន្រ្ដីដូច​មុនដែរ​ពោ​ល​​គឺឃើញតែលោកប៊ុនថៃ លក់ដីឡូតិ៍ច្រើន​ជាងរាំ​ច្រៀង។ការរយាលៗពីការ​កាន់ក្បាលមី​ក្រូ​ឡើងឆាករបស់លោកប៊ុនថៃ នៅពេលនេះស្របពេលដែល​មុន​នេះលោកបាន​ចេញវីដេអូថា​លោកច្រៀង៦បទបានតម្លៃខ្លួនដល់ទៅ១ម៉ឺនដុល្លារឯណ្ណោះ ទើបធ្វើឲ្យអ្នកមាន​ក​ម្មវិធីតូចតាច​លែង​ហ៊ានហៅលោកឧកញ៉ាច្រៀងដូចមុនទៀត។

  តើការឃ្លាតឆ្ងាយពីឆាកតន្រ្ដីរបស់លោកឧកញ៉ាព្រាប សុវត្ថិ និងខែម ប៊ុនថៃ មកពី​លោក​ឡើង​ជា​ឧកញ៉ា និង​ឡើង​តម្លៃខ្លួនខ្ពស់ជាងមុនឬយ៉ាងណា?

 លោកស៊ិន សិលា អ្នកដឹកនាំកម្មវិធីប្រគុំតន្រ្ដីរបស់ទូរទស្សន៍CTN បានឲ្យដឹងថាតាំងពី​លោកព្រាប សុវត្ថិ និង​ខេមរៈ សិរីមន្ដ ឡើងជាឧកញ៉ាមកលោកមិនដែលបានទាក់​ទងទៅឧក​ញ៉ា​ទាំងពីរឡើងច្រៀងឆាកConcerts របស់លោកដូចមុនទៀតឡើយ។ចំពោះមូល​ហេតុវិញ​លោកសិលា បានអះអាងថាមកពីតារា​ទាំងពីរ​ទទួល​បាន​គោរម្យងារ​នោះធំពេកលោកមិន​ហ៊ានទាក់​ទង និងម្យាងទៀតតម្លៃក៍ខ្ពស់អីចឹងលោកថា​បើការប្រគុំតន្ត្រី​នៅ​ប៉ុស្ដិ៍វិញច្បាស់ ជា​មិនមានលទ្ធភាពជួលលោកឧកញ៉ាឡើងច្រៀងឡើយ ។ប៉ុន្ដែសម្រាប់ការប្រគុំតន្រ្ដី​នៅខាង​ក្រៅវិញលោកថានឹង​ធ្វើទៅតាមខាងSponsors តម្រូវពោលគឺបើពួកគាត់ចង់ បានលោកឧក ញ៉ាទាំងពីរ​ច្រៀង​សម្ដែង​ឲ្យខាងក្រុមហ៊ុនទាក់ទងដោយខ្លួនឯង ចំណែកលោកជាអ្នកធ្វើតាម​ក្រោយក្រុមហ៊ុន​។លោក​សិលា ដែល​មានបទពិសោធន៍ជាច្រើនឆ្នាំក្នុងការដឹកនាំConcerts  នោះថាពិបាកដែរនៅពេល​ដែលតារាល្បីទាំងពីរ​ឡើងជា​ឧកញ៉ាព្រោះ ពេលឡើងច្រៀង ត្រូវ ឡើងអក្សរលើទូរទស្សន៍ថាជាលោកឧកញ៉ាឡើង​បកស្រាយចម្រៀង​ព្រោះ​យើង​គោរពទៅតាមគោរម្យងារ មិនអាចហៅ​ធម្មតា​បាន​ដូចមុនទេ លើកលែងតែនៅក្នុងក្រុមគ្រួសាររបស់គាត់។

 ឆ្លើយតបចំណួរថាតើតាមទស្សនៈរបស់លោកផ្ទាល់ក្រោយឡើងជាឧកញ៉ាលោកព្រាប សុវត្ថិ-ខេមរៈ សិរីមន្ដ គូតែបន្ដអាជីពចម្រៀងតទៅទៀត ឬក៍ឈប់ល្អជាងនោះលោកសិលា បញ្ជាក់ថាតារាទាំងពីរគូតែ​ប្រកាស​ឲ្យ​ច្បាស់ៗថាឈប់ឬនៅច្រៀងដើម្បីឲ្យគេបានដឹងគ្រប់គ្នា។លោកថាតាមទស្សនៈលោកគិតថា​បើតារាទាំងពីរ​ឈប់ច្រៀងល្អជាង ដើម្បីកុំឲ្យគោរម្យងារ​នោះត្រូវ​បាន​គេហៅខុស ឬមានភាពច្របូកច្របល់​ច្រៀងផង​ធ្វើជា​ឧកញ៉ាផង។លោកសិលា សង្កត់ថា​លោ​កដឹងថាក្រោយទទួលបានគោរម្យងារជា​ឧកញ៉ានេះធ្វើឲ្យ​តារាល្បី​ខាង​លើងាយ​ស្រួលរកស៊ីព្រោះប្រជាជនកាន់តែទុកចិត្តក្ដី តែគូបែងចែកឲ្យច្បាស់ថានៅធ្វើជាតារា​ចម្រៀង​ទៀត ឬក៍​ធ្វើ​ជាឧកញ៉ា?

 ក្រៅពីលោកព្រាប សុវត្ថិ នឹងខេមរៈ សិរីមន្ដ នោះលោកទុំ សារុត ហៅនាយឃ្លោគ ក៍​បាន​ក្លាយទៅជាឧ​កញ៉ា​មុនគេក្នុងចំណោមតារាទាំងឡាយផងដែរ ខណៈដែលលោកលាន អាហ្វ្រីលគីនីន វិញប្រភពខ្លះថា​គេ​ហៅជា​ឧកញ៉ាតៗគ្នាមិនទាន់មានគោរម្យងារ​ឡើយ។​ដោយ​ឡែកសម្រាប់នាយពែកម៉ី ដែល​លេចឭថានឹង​ឡើងជា​ឧក​ញ៉ានាពេលបន្ទាប់​នោះបានប្រាប់​អ្នកយក​ព័តមានយើងថានាយមិនដែលចង់ធ្វើអ្នកធំនោះទេ​គឺចង់តែធ្វើអ្នកតូច​តាចព្រោះងាយ​ស្រួលផឹកស៊ីជាង និងម្យាងទៀត​ខ្លាចពេលឡើងឧកញ៉ាលែងមានគេហ៊ាន​ជួលលេង​កំប្លែង​និង​កាត់សក់ដូចមុនទើបនាយសូមរក្សារងារត្រឹមជាអ្នកកំប្លែងម្នាក់ប៉ុណ្ណោះ៕