អ៊ីវ៉ា ៖ពិបាកក្លាយជាតួឯក

ភ្នំពេញ៖អ៊ីវ៉ា ត្រូវបានផលិតកម្មដល់ទៅ៣ពេញចិត្តសម្ថភាពរបស់នាង​និងចង់បានតារាកូនកាត់​ចិន​រូប​នេះ​ធ្វើជា​សមាជិករបស់ខ្លួននោះគឺហង្សមាស ,ថោន និងGalaxy តែទំផុតស្រីនាថ សម្រេ​ច​ចិត្តបន្ដជ្រកកោននៅផលិត​កម្មសាន់​​ដេតទៅទៀតតាមរយៈការច្រៀង​ដោយគ្មាន​កុងត្រា។មជ្ឈដ្ឋានមហាជនឃើញថាការជ្រក​នៅទ្រនុំចាស់​នេះស្រីនាថ ហៅអ៊ីវ៉ា មិនអាច​ប្រជែងតំណែង​តួ​ឯក​ជាមួយសុខ ពិសី បានជាដាច់ខាត ពោលគឺនាងបានត្រឹមជា​តួរងប៉ុណ្ណោះ តែស្រីនាថ ស្ម័គ្រ​ចិត្ត​កាយ ហើយព្រមច្រៀងនៅផលិតកម្មដែល​បានផ្ដល់កំណើត​ឲ្យ​នាង​ទៀត​ទាំង​គ្មានកុងត្រា ​ព្រោះឪពុកនាងលោកអ៊ូវ៉ាវ បានអះអាងថាស្រីនាថ ចាត់ទុកសាន់ដេ​ដូចជាឪពុកម្ដាយទី២របស់​នាង​ពោលគឺ​ផលិតកម្ម១នេះហើយ​ដែល​ធ្វើឲ្យនាងមានឈ្មោះ​បោះសម្លេងរហូតមក​ដល់បច្ចុប្បន្ន។ដោយឡែកតាម​ព័ត​មាន​ពីតារា​ដែលជិតដិតថាអ៊ីវ៉ា បាន​បង្ហើបឲ្យដឹងថាអ៊ីវ៉ា មិនទៅហង្សមាសព្រោះរូបនាងបានដឹងច្បាស់​ណា​ស់​ថាទ្រនុំធំនោះគឺឱក សុគន្ធកញ្ញា គឺជាតួឯក ខណៈដែលការទៅថោនត្រូវបាននាង​រំ​សា​យ​ចិត្តវិញ​ក្រោយពីលោក​កែវ វាសនា វិលមកសាន់ដេវិញ ស្របពេលដែលការទៅGalaxy វិញ​កាន់​តែមានភាគរយតិច​ព្រោះអ្នកណាក៍​ដឹង​ថាតន់ ច័ន្ទសីម៉ា គឺជាតារាដែលសំខាន់ជាងគេ​នៅទី​នោះ ហេតុនេះហើយ​បើទៅ​បានត្រឹមធ្វើជាតួរង​គឺនាងសុខ​ចិត្ត​នៅទ្រនុំចាស់វិញល្អជាងរើរ​បង្វេ​ច​ទៅ​ហើយមកវិញ។

អ្នកចម្រៀងឃីន ស្រីនាថ ហៅអ៊ីវ៉ា មិនសូវមានបទចម្រៀងចេញបុកជាប់ៗគ្នានោះទេ​ពោល​គឺយូៗ​ទើប​ចេញ​បទ​ថ្មី​ម្ដងហើយពេលនេះនាងងាកទៅចាប់​ដៃគូជាមួយតារាប្រុស២នាក់​ច្រៀងឆ្លាស់​គ្នានោះគឺលោកកែវ វាសនា និង​វេហាស៍ ។តារាវ័យ២៩ឆ្នាំរូបនេះត្រូវបានគេ​សរ​សើរ​ថា​នាង​​មាន​​សម្ថភាពអាចច្រៀងបានជាច្រើនទម្រង់ ហើ​យ​ក្រោយស្រីស្រស់ផ្ដាច់​ស្នេហ៍​ថៅកែ”ប”​នៅ​សៀមរាបរយៈពេលជាង៨ឆ្នាំមកពេលនេះស្រីនាថ មាន​សេរី​ភាព​ពេ​ញលេញ​ក្នុងការច្រៀង​សម្ដែង​ទាំងបទញាក់ និងឈុតស្និតស្នាលជាមួយតួប្រុស ព្រោះគ្មានអ្នកហួង​ហែង​ទៀត​ឡើយ​។

ប៉ុន្ដែអ៊ីវ៉ា ធ្លាប់បង្ហើបថានាងចង់បញ្ចប់ភាពនៅលីវត្រឹមអាយុ៣០ឆ្នាំ ពោលគឺនាងអាចនឹង​រៀប​​ការ​ប្ដីនៅឆ្នាំ​២០២៣ ខាងមុខនេះហើយ បន្ទាប់ពីនាងបង្ហើប​ថា​អនា​គតស្វាមីរបស់នាង​គឺជាអ្នកធ្វើការនៅវិស័យកីឡារ។តែស្រី​នាថ មិនដែលបង្ហាញមុខបុរស​នោះ​​ជាចំហម្ដងឡើយ ខណៈដែលកាលពីចុងឆ្នាំ២០២១ មានគេឃើញនាងបណ្ដើរ​បុរស​ចម្លែក​ម្នាក់ទៅ​កម្សាន្ដ​ជាលក្ខណៈគ្រួសារនៅខេត្តសៀមរាប ។ប្រសិនបើអ៊ីវ៉ា ពិតជាគ្រងឈុត​កូនក្រមុំមែន​ទែន នៅ​ឆ្នាំ​ក្រោយនេះគឺមានន័យថានាងបានបំពេញបំណង​ជូនឪពុក​នាងលោក​វ៉ាវ ហើយ​ព្រោះ​​លោកចង់​ឲ្យ​នាង​យកប្ដីឆាប់ៗដើម្បីបានកូនប្រសារបើករថយន្ដ​ជូននាងទៅ​ច្រៀង​​សម្ដែង​តាម​ឆាក​តន្រ្ដីជំនួសលោក៕