ព្រាប សុវត្ថិ ៖ចាយអស់៣០ម៉ឺនដុល្លារ

ភ្នំពេញ៖ព្រាប សុវត្ថិ បានទិញរថយន្ដទំនើបម៉ាកRolls Royce Ghost ដែលមានតម្លៃខ្ទង់ជិត​៣០​ម៉ឺនដុល្លារកាលពី​ថ្ងៃទី២៨ខែមិថុនាឆ្នាំ២០២០ ពោលគឺបន្ទាប់ពីលោកឡើងងារជាឧកញ៉ារយៈ​ពេល២ខែគត់។នេះគឺជាការជះ​លុយធំ​របស់កំពូលតារាចម្រៀងវ័យ៤៧ឆ្នាំរូបនេះ ខណៈដែល កន្លងមកគេឃើញលោកសុវត្ថិ ជិះរថយន្ដទំនើបៗឆ្លាស់គ្នា​មានដូចជាRange Rover ,Ford ,Bmw និងIsuzu ជាដើម។ប៉ុន្ដែតាមព័តមានថាដោយសារតែលោកឧកញ៉ាព្រាប សុវត្ថិ ធ្វើជា​BA របស់Isuzu  ហេតុនេះហើយលោកនៅតែជិះរថយន្ដនេះច្រើន​ជាងរថយន្ដផ្សេងៗទៀត​របស់លោក ហើយជាក់ស្ដែងដូចជានៅថ្ងៃទិញឡានថ្មីនោះលោកឧកញ៉ាស្នាយ បានឲ្យ​កូន​ប្រុសទី២របស់លោកឈ្មោះសុវត្ថិ មុនីនាគ ជាអ្នកបើកវិញ ដែលនេះអាចបណ្ដាលមកពីលោក​ខ្លាចប៉ៈពាល់​ដល់ក្រុមហ៊ុនរថយន្ដ​ដែលលោកបាន​កុង​ត្រា​រយៈពេល២ឆ្នាំមកនេះ។តាមរយៈ​ការ​ទិញ​រថយន្ដទំនើបលំដាប់សេដ្ឋីជិះនេះមានន័យថាការសម្រុក​រកស៊ី​លក់​ដីឡូតិ៍១ប្រាវរបស់​ព្រាប សុវត្ថិ គឺកាក់កបខ្លាំងទើបពេលនេះលោកកាន់តែលេងម៉ូដឡានថ្មីៗថែមទៀត។

 គូរបញ្ជាក់ថាក្រៅពីព្រាប សុវត្ថិ តារានិងអតីតតារាដែលកំពុងតែជិះរថយន្ដRolls Royce មានដូចជា​អ្នកនាង​ស្រី​តូច ចំណាន,លី យ៉ាណា ,ខៀវ សានសាណា និងខែម ប៊ុនថៃ ជាដើម។​ចំ​ពោះលោកព្រាប សុវត្ថិ វិញទោះជា​លោក​ចង់ជិះរថយន្ដថ្លៃលំដាប់ណាក៍អាចទៅរួច​ដែរព្រោះ​កាលពីខែកញ្ញាឆ្នាំ២០២០ អតីតតារាហង្សមាស​រូបនេះ​ត្រូវបានមនុស្សជំនិតបំផុត​របស់លោក​ទម្លាយប្រាប់អ្នកកាសែតថាលោកសុវត្ថិ សល់ទ្រព្យខ្ទង់​ចំនួនដល់ទៅ​៣០​លានដុល្លារ ក្រោយ​ចាប់​អាជីពចម្រៀងជាង២០ឆ្នាំ។អ្វីដែលគូរឲ្យចាប់អារម្មណ៍ក្រោយក្លាយទៅជាឧកញ៉ានេះ លោ​​ក​​សុវត្ថិ បានរយាលៗកាន់តែខ្លាំងពីអាជីពចម្រៀង​ហើយសម្រុកមករកស៊ីផ្នែក​អចលន​ទ្រព្យ ,ភោជនីយដ្ឋាន និងកំពុងសាងសង់រម្យនីយ៍ដ្ឋានមួយនៅខេត្តមណ្ឌុល​គិរីទៀតផង។​ដោយ​ឡែ​ក​​​សម្រាប់អាជីពចម្រៀង​របស់​លោក​នៅGalaxy វិញ ហាក់ស្ងប់ស្ងាត់ជាងមុនព្រោះ​មិនសូវ​មានបទថ្មីៗចេញ ខណៈដែលអ្នកគាំទ្រនិយម​ស្ដាប់​បទលោកនៅហង្សមាសជាង​ផលិត​កម្មថ្មី​។ប៉ុន្ដែតាមព័តមានថាព្រាប សុវត្ថិ ត្រៀមចេញបទថ្មី១ៗថែមទៀត​ក្រោ​យការទៅដល់​Galaxy របស់អតីតអ្នកនិពន្ធនិងដឹកនាំសម្ដែង២រូបរបស់ហង្សមាសគឺលោកខាំ ភូរិ និងសុខ ជំនោរ ។យ៉ាងណាអ្នកជំនាញសិល្បៈបានលើកឡើងថាព្រាប សុវត្ថិ គូរតែឈប់ពីច្រៀងរាំ ហើយមក​ធ្វើជំនួញវិញ​ប្រសើរ​ជាងដើម្បីកុំឲ្យច្របូកច្របល់ធ្វើជាឧកញ៉ាផងច្រៀងផង ព្រោះ​ថាពេលនេះ​ទោះ​ជាលោកលែងច្រៀង​រាំក៍មិន​អាច​ប្រឈមបញ្ហារវិបត្តិសេដ្ឋកិច្ចដែរ។

 សូមបញ្ជាក់ថាក្រៅពីព្រាប សុវត្ថិ រថយន្ដRolls Royce ត្រូវបានឧកញ៉ាៗជាច្រើនទៀត​បានជ្រើសរើសប្រើប្រាស់​ឡានម៉ាកល្បីមួយនេះដើម្បីឲ្យសាកសមទៅនិងកេរ្ដិ៍ឈ្មោះនិងឥទ្ធិពលរបស់ពួកគេ។រថយន្ដRolls-Royce ជា​រថ​យន្ដប្រណិតដែលមានជាច្រើនម៉ាកនៅ​លើពិភព​លោកហើយរថយន្ដនេះត្រូវបានបែងចែកជាច្រើនស៊េរី​ដូច​ជា​Rolls-Royce Phantom, Rolls-Royce Dawn, Rolls-Royce Collinan, Rolls-Royce Wraith និងRolls-Royce Ghost  ជាដើម​។ក្នុងចំណោមរថយន្ដRolls-Royce ខាងលើគឺមានតែRollls-Royce Ghost ទេដែលមាន​តម្លៃ​ធូថ្លៃ​ជាងគេគឺ​ស៊េរី​ឆ្នាំ២០២០ត្រូវបានគេដាក់លក់នៅសហរដ្ឋអាមេរិកតម្លៃ៣១៥០០០ដុល្លា៕