ភ្នំពេញ៖លោកខែម ប៊ុនថៃ ហៅខេមរៈ សិរីមន្ដ ជាមុខសញ្ញានៃការចង់បានរបស់Galaxy បន្ទាប់ពីថៅកែផលិតកម្មនេះលោកឡេង ណាវ៉ាត្រា យកបានលោកព្រាប សុវត្ថិ មករួមទ្រនុំរបស់ខ្លួនជិត២ឆ្នាំមកនេះ។អ្វីដែលគូរឲ្យកត់សម្គាល់ថ្មីៗនេះគេឃើញលោកប៊ុនថៃ និងលោកណាវ៉ាត្រា ព្រមទាំងលោកសុវត្ថិ ,ខេម និងមុនីនាគ ដែលជាកូនទី២របស់លោកឧកញ៉ាស្នាយ បង្ហាញការជួបជុំគ្នាក្នុងភាពស្និតស្នាលដូចតារាចម្រៀងក្នុងផលិតកម្មតែ១ជួបជុំមេដែលធ្វើឲ្យដំណឹងលោកឧកញ៉ាប៊ុនថៃ អាចនឹងទៅចូលរួមជាមួយGalaxy នោះចាប់ផ្ដើមកក្រើកឡើងវិញ។ប្រសិនបើលោកប៊ុនថៃ នឹងទៅរួមរស់ជាមួយGalaxy មែននោះអ្នកជំនាញសិល្បៈបានលើកឡើងថាហង្សមាសហាក់ស្រឡះដៃធេងព្រោះអត់ទាំងព្រាប សុវត្ថិ និងខែម ប៊ុនថៃ ពេលនោះអាចប្រឈម”រងារ”ជាមិនខាន។
ប៉ុន្ដែក្នុងជំនួបតាមទូរស័ព្ទកន្លងមកលោកខែម ប៊ុនថៃ ធ្លាប់ប្រាប់អ្នកយកព័តមានយើងថាកិច្ចសន្យារបស់លោកជាមួយហង្សមាសមិនទាន់ផុតកំណត់នោះទេ ពោលគឺលោកនៅតែជាតារាហង្សមាស។តែលោកប៊ុនថៃ ថាគ្មានអ្នកណាដឹងថាថ្ងៃខាងមុខនឹងមានរឿងអ្វីកើតឡើងឡើយ។អតីតតារាចម្រៀងU2 និងសាន់ដេរូបនេះក៍ទទួលស្គាល់ថាការរាប់អានរវាងលោកនិងថៅកែGalaxy គឺពិតជាមានភាពស្និតស្នាលលើសពីបងប្អូនទៅទៀត។
ថ្វីត្បិតតែលោកខែម ប៊ុនថៃ និងព្រាប សុវត្ថិ អាចនឹងប៉ៈគ្នានៅផលិតកម្មតែ១សារជាថ្មីមែន ប៉ុន្ដែមហាជនខ្លះបានលើកឡើងថាវាមិនអាចទៅរួចព្រោះតាមព័តមានថាតារាទាំងពីរមិនសូវត្រូវគ្នាទេ ពោលគឺមានការកាច់កុងគ្នាខ្លាំងទើបលោកសុវត្ថិ ដើរចេញពីហង្សមាសព្រោះមិនចង់នៅ”ភ្នំ១មានខ្លា២”។តែលោកនូ ស៊ឹប អះអាងថាវាអាចទៅរួចព្រោះថាតារាល្បី២ដួងនៅជាមួយគ្នាបានឬអត់បាននោះគឺអាស្រ័យទៅលើអ្នកដឹកនាំផលិតកម្មនោះទេ។ដោយឡែកអ្នកដឹកនាំកម្មវិធីប្រគុំតន្រ្ដីរបស់CTN លោកស៊ិន សិលា បានបញ្ចេញទស្សនៈថារវាងលោកឧកញ៉ាព្រាប សុវតិ្ថ និងខេមរៈ សិរីមន្ដ នោះយកល្អគូតែឈប់ច្រៀងទាំង២នាក់តែម្ដងទៅ ព្រោះថាធ្វើជាតារាចម្រៀងផងឧកញ៉ាផងហាក់ច្របូលច្របល់និងពិបាកបែងចែកឬឡើងអក្សរនៅលើទូរទស្សន៍ពេលដែលពួកគាត់ឡើងច្រៀង។
មជ្ឈដ្ឋានមហាជនសង្កេតឃើញថាក្រោយលោកខែម ប៊ុនថៃ និងព្រាប សុវត្ថិ ឡើងជាឧកញ៉ា និងជិះរថយន្ដទំនើបម៉ាកRolls Royce ដូចគ្នានោះពេលនេះតារាទាំងពីរហាក់បន្ធូដៃពីការរាំច្រៀងដូចគ្នា ហេតុនេះហើយការប្រកួតប្រជែងរឿងលក់ដីឡូតិ៍អាចក្ដៅគគុកជាងចម្រៀងជាមិនខាន៕