ភ្នំពេញ៖ពិធីការិនីគូរឲ្យក្នក់ក្នាញ់នាងហ៊ិន ច័ន្ទនីរ័តុ្ន នៅតែបន្ដកៀកកើយគ្នាជាមួយជាមួយលោកសេង មង្គល(ហូ ប៉ូសេង)តទៅទៀតទើបធ្វើឲ្យអ្នកតាមដានរឿងស្នេហារបស់នាងឡើងវិលក្បុង ខណៈដែលអ្នកគិតថារឿងនេះ១០០%ប្រាកដជាមិនអាចទៅរួចនោះបែជាស្ងៀមស្ងាត់និងស្រឡាំងកាំងទៅវិញព្រោះមើលទៅស្រីស្រស់ប្រុសរូបសង្ហារដូចជាយល់ចិត្តគ្នាខ្លាំងណាស់។ប៉ុន្ដែគេចាប់អារម្មណ៍ថាសកម្មភាពរបស់ស្រីស្អាតច័ន្ទនីរ័ត្ន ដែលហាក់កាន់តែយល់ចិត្តលោកមង្គល នោះកើតមានក្រោយពីតារាចម្រៀងលោកចេន ដែលធ្លាប់ត្រូវបានគេសង្ស័យថាជាគូស្នេហ៍របស់នីរ័ត្ន នោះបានរៀបការចោលនាងកាលពីថ្ងៃទី២២ខែឧសភាឆ្នាំ២០២២ ដោយនីរ័ត្ន ថែមទាំងបង្ហាញភាពក្លាហានទៅចូលរួមពិធីនោះដោយផ្ទាល់ទៀតផង ដើម្បីបញ្ជាក់ថានាងគ្មានការខូចចិត្ត ឬរវាងលោកនិងម្ចាស់បទ”អាក្របី”អត់មានអ្វីពាក់ព័ន្ធគ្នាជាពិសេសនោះទេ។តែចាប់ពីពេលនោះមកច័ន្ទនីរ័ត្ន បែជាកាន់តែទុកចិត្តលោកសេង ហើយស្និតស្នាលគ្នាយ៉ាងស៊ីជម្រៅនៅក្រៅជាងក្នុងឆាកទៅវិញ បើទោះជាប្រភពពីតារាជិតដិតថាពួកគេមិនមានអារម្មណ៍ស្នេហ៍ដូចគ្នាក៍ដោយ។ប្រភពជិតដិតពីតារាទាំងពីរខាងលើនៅតែចាត់តុកថាទំនាក់ទំនងដូចគូស្នេហ៍រវាងច័ន្ទនីរ័ត្ន និងលោកមង្គល គ្រាន់តែជាស្នេហា”ក្លែងក្លាយ”ប៉ុណ្ណោះ ព្រោះតែពួកគេសម្អាងថាធាតុពិតតារាទាំងពីរដួងមានគូស្នេហ៍រៀងៗខ្លួនអស់ទៅហើយគ្រាន់តែពួកគេមិនចង់បង្ហាញជាសាធារណៈ។តែលោកមង្គល ហៅសេង វិញនៅពេលសួរពីទំនាក់ទំនងជាមួយច័ន្ទនីរ័ត្ន វិញលោកមិនដែលប្រកែកនោះទេ ពោលគឺថែមទាំងសរសើរស្រីស្អាតតូចតន់រូបនេះពេញៗមាត់ថាគូរឲ្យស្រលាញ់ទៀតផង ប៉ុន្ដែលោកថានៅពេលខាងមុខមិនដឹងជាមានរឿងអ្វីកើតឡើងឡើយ ។
ហ៊ិន ច័ន្នីរ័ត្ន មានវ័យ២៩ឆ្នាំទៅហើយតែរូបសម្រស់នាងនៅតែជាទីគយគន់ពោលគឺស៊ីដាច់គេនៅបាយ័នរហូតធ្វើឲ្យប្រុសៗមិនតិចនាក់ទេ ធ្លាក់ក្នុងអន្លង់ស្នេហ៍នាងដោយមិនដឹងខ្លួន។កាលពីឆ្នាំ២០២០ មានព័តមានថាមន្រ្ដីធំម្នាក់ដែលធ្លាប់មានសង្សារជាតារាល្បីរបស់ហង្សមាសម្នាក់ក៍បានចាញ់ស្នេហ៍ពិធីការិនីរូបនេះដែរ។ប៉ុន្ដែប្អូនលោកផ្កាយ៣នោះមិនអាចយកបានបេះដូងពិធីការិនីធ្មេញចំពើសរូបនេះទេ ព្រោះថាការមានលុយ និងអំណាចតែបើច័ន្ទនីរ័ត្ន គ្មានអារម្មណ៍ស្នេហ៍នោះច្បាស់ជាមិនអាចទៅរួចឡើយ។
គូរបញ្ជាក់ថាថ្វីត្បិតតែហ៊ិន ច័ន្ទនីរ័ត្ន មានជម្រើសស្នេហ៍ច្រើនមែន តែការបរាជ័យស្នេហ៍ជាបន្ដបន្ទាប់នាពេលកន្លងមកនោះធ្វើឲ្យពិធីការិនីដ៍មានមន្ដស្នេហ៍រូបនេះត្រូវអ្នកខ្លះហៅនាងថាតារា”អភ័ព្វស្នេហ៍”ទៀតផង។ដោយសារតែមិនចង់ឭពាក្យពេជ្រន៍ទាំងនោះមកលើខ្លួនទើបនីរ័ត្ន ធ្លាប់បង្ហើបថានាងចង់រៀបការនៅអាយុ៣០ឆ្នាំពោលគឺនៅឆ្នាំ២០២៣ ខាងមុខនេះ។តែអនាគតស្វាមីរបស់នាងជាអ្នកណានោះមិនត្រូវបានអតីតFreshie លេខ១កាលពីឆ្នាំ២០០៧ រូបនេះបង្ហើបឡើយ។មជ្ឈដ្ឋានមហាជនបានលើកឡើងថាដរាបណាច័ន្ទនីរ័ត្ន នៅតែមិនព្រមបញ្ចេញបុរសពិតដែលនាងត្រូវរៀបការនៅឆ្នាំក្រោយនេះទេ ច្បាស់ជាមានមន្រ្ដីធំៗតាមឆ្វែលស្នេហ៍នីរ័ត្ន កាន់តែច្រើនថែមទៀតជាមិនខានឡើយ។
សូមបញ្ជាក់ថានៅឆ្នាំ២០២៣ខាងមុខនេះតារាដែលគ្រោងបញ្ចប់ភាពនៅលីវដូចគ្នាមានដល់ទៅ៣ដួងនោះគឺនាងអ៊ីវ៉ា,គង់ វង្សយ៉ាទី និងហ៊ិន ច័ន្ទនីរ័ត្ន នេះឯង។គេចាំមើលថាតើក្នុងចំណោមស្រីស្អាតខាងលើនេះតើ១ណានឹងបានប្ដីមុន?
