ភ្នំពេញ៖ស្រីស្អាតប៉ាច គីមមួយ បានក្លាយទៅជាគូដណ្ដឹងលោកសយ រតនៈ ស្របច្បាប់ទៅហើយក្រោយពីពួកគេបានភ្ជាប់ពាក្យជាមួយគ្នាកាលពីថ្ងៃទី១ខែកក្កដាឆ្នាំ២០២២ ដោយមានឪពុកម្ដាយទាំងសងខាងគាំទ្រ។ការដែលគីមមួយ ស្ម័គ្រចិត្តប្រគល់បេះដូងនាងទៅឲ្យលោករតនៈ ឃុំគ្រងនោះមានន័យថាប្រុសៗទាំងឡាយដែលធ្លាប់លង់សម្រស់នាងជាយូមកហើយនោះអស់សិទ្ធិញ៉ែស្រីស្រស់រូបនេះទៀតហើយព្រោះថាចាប់ពីពេលនេះតទៅស្រីស្អាតទៅណាមកណាក៍មានអង្គរក្សបេះដូងតាមការពារគ្រប់ពេលវេលាដែរ។
ក្នុងជំនួបតាមទូរស័ព្ទកាលពីរសៀលថ្ងៃទី៨កក្កដា តារាហង្សមាសប៉ាច គីមមួយ បានឲ្យដឹងថាទោះជាពេលនេះនាងមានគូដណ្ដឹងទៅហើយក្ដី តែនាងមិនទាន់កំណត់ថ្ងៃរៀបការជាក់លាក់ឡើយ។ចំពោះមូលហេតុវិញគីមមួយ ថាព្រោះតែនាងចង់ឲ្យគេSurprise ទើបអត់ទាន់និយាយរឿងរៀបការនេះទុកជាមុន ពោលគឺចង់ឲ្យដល់ថ្ងៃការទាំងអស់គ្នាបានឃើញតែម្ដង។គីមមួយ ប្រាប់មូលហេតុដែលនាងជ្រើសយកលោករតនៈ ជាអនាគតស្វាមីនោះថាដោយសារតែនាងនិងរតនៈ បានស្រលាញ់គ្នាជាង២ឆ្នាំទៅហើយ គឺឃើញថាមានការចុះសម្រុងគ្នាល្អទើបឈានមកដល់ការភ្ជាប់ពាក្យ។ប៉ុន្ដែតារាសាច់សដូចបណ្ដូលចេកថាបើនិយាយពីការស្គាល់គ្នាវិញរវាងនាងនិងរតនៈ រាប់អានគ្នាជាច្រើនឆ្នាំមកហើយ។
មុនភ្ជាប់ពាក្យនេះដែរប៉ាច គីមមួយ បានឲ្យដឹងថានាងទើបតែបញ្ចប់ការថតភាពយន្ដថ្មីឲ្យហង្សមាសដែលអាចជារឿងទី៥ឬទី៦ហើយសម្រាប់រូបនាងតែសម្រាប់គោលដៅក្នុងអាជីពសិល្បៈវិញគឺនាងនៅតែផ្ដោតលើចម្រៀងច្រើនជាងការថតរឿងដដែល។អនាគតភរិយារបស់លោករតនៈ រូបនេះបន្ថែមថាទោះជាខែនេះជារដូវធ្លាក់ភ្លៀងមែន ប៉ុន្ដែរូបនាងនៅតែមានការងារសិល្បៈធ្វើជាហូហែរដោយចេញច្រៀងសម្ដែងរៀងរាល់សប្ដាហ៍ ព្រោះកម្មវិធីគេធ្វើនៅតាមសាលនានាអីចឹងមិនប៉ៈពាល់រឿងភ្លៀងនោះទេ។
គូរបញ្ជាក់ថាក្រៅពីប៉ាចគីមមួយ តារាដែលជ្រើសអ្នកសិល្បៈដូចគ្នាធ្វើជាប្ដីមានដូចជាយក់ ថិតរដ្ឋា,សួស វីសា ,ទេព បូព្រឹក្ស,សេង សុខឃីម,ម៉ា នីកា និងជា ស្រីរ័ត្ន ជាដើម។ទស្សនិកជនរងចាំមើលថាតើចំណងស្នេហាប៉ាច គីមមួយ -សយ រតនៈ រក្សារបានភាពគង់វង្សយូអង្វែងរហូតដល់រៀបការដែរឬទេ?
