ភ្នំពេញ៖អតីតតារាកំប្លែងCTN លោកចែម ចាន់រ៉ា ហៅនាយពែកម៉ី ដែលត្រូវបានស្ថានីយ៍ទូរទស្សន៍១នេះចេញលិខិតបញ្ឈប់ការងារកាលពីថ្ងៃទី៤ខែកក្កដាឆ្នាំ២០២២ ធ្វើឲ្យនាយបង្ហាញអារម្មណ៍មិនច្បាស់លាស់ក្នុងអាជីពទើបមានគម្រោងទៅផលិតវីដេអូកម្សាន្ដនៅស្រុកកំណើត ឯខេត្តស្វាយរៀងនោះពេលនេះនាយចាប់ផ្ដើមមានរស្មីជីវិតម្ដងទៀតហើយតាមរយៈការឈជើងនៅក្រុមហ៊ុនMSA ដែលអតីតក្រុមកំប្លែងរបស់CBS ស្ទើតែទាំងអស់នៅតែក្រោមការដឹកនាំរបស់លោកសុវណ្ណ រិទ្ធី ហៅលោកតាវ៉ិច ទ័រ ដដែល។នាយពែកម៉ី បានចេញថតសម្ដែងរឿងកំប្លែងនៅទ្រនុំថ្មីជាលើកដំបូងនៅព្រឹកថ្ងៃទី១១កក្កដា ដែលក្នុងនោះក៍លេចមុខនាយគ្រឿន ,នាយក្រូច ផងដែរ។
លោកសុវណ្ណ រិទ្ធី ហៅលោកតាវ៉ិច ទ័រ ដែលចាកចេញពីCTN នៅថ្ងៃតែមួយជាមួយនាយពែកម៉ី ជាទីដែលលោកធ្លាប់ជ្រកកោនជាង១០ឆ្នាំនោះបានប្រាប់អ្នកកាសែតកាលពីពេលថ្មីៗនេះថាលោកបានចុះកុងត្រារយៈពេលវែងជាមួយMSA តាមរយៈការបន្ដផលិតវីដេអូបែបកំប្លែងតទៅទៀត។ប៉ុន្ដែលោកវ៉ិច ទ័រ មិនប្រាប់ទេថាតើលោកយកបានយកអតីតកូនចៅរបស់លោកដែលត្រូវCTN បញ្ឈប់ទាំងអស់ឬទៅជាមួយយ៉ាងណា តែតាមព័តមានថាកូនប្រុសរបស់លោកក៍ទៅទ្រនុំថ្មីនោះដែរ ខណៈដែលកូនស្រីលោកវ៉ាន់ នីឡា នឹងវិលវិញក្រោយសម្រាលកូន។
សម្រាប់នាយពែកម៉ី វិញទោះជាអត់មានប្រាក់ខែបើកនៅCTN តទៅទៀតព្រោះលែងជាបុគ្គលិកក្ដី ប៉ុន្ដែលោកចាន់រ៉ា ហាក់គ្មានការបារម្ភរឿងជួបហានិភ័យសេដ្ឋកិច្ចនោះទេ ព្រោះថាអតីតកម្មករសំណង់ក្លាយទៅជាតារាល្បីរូបនេះមានជីវភាពធូធារទៅហើយដូចជាទិញបានផ្ទះវីឡារធំស្កឹមស្កៃ និងជិះរថយន្ដទំនើបម៉ាកLexus Lx 570 តម្លៃជាង២០ម៉ឺនដុល្លារទៀតផង។ដោយឡែកអ្នកគាំទ្រនាយពែកម៉ី នៅតែជឿរជាក់ថាអ្នកកំប្លែងមុខស្ងួតនេះនៅតែអាចរក្សារតំណែងរបស់ខ្លួនក្នុងនាមជាតារាកំប្លែងជូរមុខតទៅទៀត ព្រោះថាពេលនេះលោកធ្វើការក្រោមការគ្រប់គ្រងរបស់លោកតាវ៉ិច ទ័រ ដូចមុនដដែល អីចឹងទាំងសាច់រឿង និងការដឹកនាំគឺដូចនៅCTN ។
គូររំលឹកថានាយពែកម៉ី បានឈ្នះពានប្រលងកំប្លែងCTN នៅថ្ងៃទី១ខែមករាឆ្នាំ២០១០ ពោលគឺជិត១២ឆ្នាំដែលលោកចាន់រ៉ា បានចាប់អាជីពមួយនេះហើយបោះបង់ចោលការងារសំណង់។ក្រោយក្លាយទៅជាតារាល្បីមានព័តមានថានាយពែកម៉ី មានស្រីក្មេងៗជាច្រើនឈ្លក់ស្នេហ៍ព្រោះថ្វីមាត់នាយ ទើបធ្វើឲ្យលោកចាន់រ៉ា មានមន្ដស្នេហ៍មិនចាញ់នាយក្រូច,នាយចឺម និងលោកអ៊ីណូ ឡើយ៕
