ភ្នំពេញ៖អ្នកជំនាញសិល្បៈបានលើកឡើងថាប្រសិនបើថៅកែហង្សមាសចង់ឲ្យលោកខែម ប៊ុនថៃ ជំនួសតំណែងលោកព្រាប សុវត្ថិ នៅផលិតកម្មធំនេះមែននោះគឺកៅអីទំនេររបស់លោកស្នាយ ទាំង៣ក្នុងមានជាគ្រូបង្វឹកនិងគណៈកម្មារការCambodian Idol, The Voice Kids Cambodia និងCambodian Idol Junior នោះត្រូវតែប្រគល់ទៅឲ្យលោកប៊ុនថៃ រ៉ាប់រងជំនួសទាំងអស់ បន្ទាប់ពីលោកសុវត្ថិ ទៅជ្រកនៅGalaxy ។ប៉ុន្ដែរហូតមកដល់ពេលនេះថៅកែហង្សមាសបានប្រគល់តំណែងធំ២របស់លោកស្នាយ ទៅឲ្យតារាចម្រៀង២ដួងផ្សេងទៅហើយដែលមិនមែនជាលោកប៊ុនថៃ ក្នុងនោះគឺតួនាទីជាគណៈកម្មារការCambodian Idol រដូវកាលទី៤ ធ្លាក់ ទៅនាងសុខ សីឡាលីន ទទួលបន្ទុក ខណៈដែលគ្រូបង្វឹកThe Voice Kids Cambodia រដូវកាលទី៣ស្ថិតក្នុងកណ្ដាប់ដៃលោកកែ សុវណ្ណារ៉េត ហៅហ្សូណូ ។ យ៉ាងណានៅសល់តំណែងមួយទៀតរបស់លោកព្រាប សុវត្ថិ ដែលមិនទាន់មានអ្នកចូលទៅស្នងលោកនោះCambodian Idol Junior ដែលក្នុងនោះត្រូវបានគេព្យាករណ៍ថាមានតារាចម្រៀងដល់ទៅ៣ដួងអាចប្រជែងតំណែងធំនោះក្នុងនោះមានពេជ្រ សោភា,សួស វីសា និងលោកខែម ប៊ុនថៃ នេះឯង។
លោកវណ្ណា អ្នកគ្រប់គ្រងកម្មវិធីប្រលងចម្រៀងខាងលើរបស់ហង្សមាសទូរស័ព្ទមិនចូលទេកាលពីថ្ងៃទី២១កក្កដា ទើបមិនអាចសុំការបំភ្លឺបានឡើយ ជុំវិញថៅកែហង្សមាសមិនទាន់ដាក់បញ្ចូលលោកខែម ប៊ុនថៃ អង្គុយកៅអីទំនេររបស់ព្រាប សុវត្ថិ ។ដោយឡែកលោកខែមរៈ ភារុណ បងប្រុសលោកប៊ុនថៃ វិញទូរស័ព្ទចូលគ្មានអ្នកទទួល។ ទោះជាលោកខែម ប៊ុនថៃ មិនទាន់ចេញមុខធ្វើCoach និងJudge ដែលហង្សមាសទើបតំណើរការកម្មវិធីប្រលងចម្រៀងឡើងវិញក្រោយកូវីដថមថយនេះមែន ប៉ុន្ដែកន្លងមកតារាកូន៣រូបនេះធ្លាប់ធ្វើជាគ្រូបង្វឹកX Factor Cambodia រដូវកាលទី១ តែមិនទាន់បានជួយឲ្យកូនក្រុមលើកពានឡើយ។
អ្វីដែលមហាជនមើលឃើញនៅពេលនេះលោកខែម ប៊ុនថៃ តាំងពីឡើងជាឧកញ៉ាជាង៥ខែមកនេះលោកកាន់តែរយាលៗពីអាជីពសិល្បៈដោយផ្ដោតលើការកស៊ីលក់ដីឡូតិ៍ច្រើនជាង ហេតុនេះហើយទើបអត់សូវមានបទល្បីៗដូចមុន ស្របពេលដែលមុននេះលោកប៊ុនថៃ ចេញវីដេអូថាលោកច្រៀង៦បទបានតម្លៃខ្លួនដល់ទៅ១ម៉ឺនដុល្លារនោះទៀតរឹតតែធ្វើឲ្យអតីតតារាU2 និងសាន់ដេរូបនេះលែងសូវមានអ្នកធ្វើកម្មវិធីតូចតាចហ៊ានជួលទៅច្រៀងដូចមុន៕