ភ្នំពេញ៖ពេជ្រ សោភា បានព្យាយាមលាក់មុខសង្សារថ្មីអស់ជាងកន្លះឆ្នាំមកហើយក្រោយប្រេះឆាលោកឆឹម សក្កដា កណ្ដាលផ្លូវហើយថ្មីៗនេះមិនត្រឹមតែបិតមុខសង្សារជិតបានល្អនោះទេ តែសោភា បែជាបង្ហាញសញ្ញាស្នេហ៍កាន់តែលែងច្បាស់លាស់ថែមទៀត។សោភា ដែលមិនធ្លាប់ហ៊ានអោបរិតសង្សារថ្មីជាសាធារណៈនោះនាងប្រែជាហ៊ានទៅថតស្អិតល្មូតជាមួយបុរសផ្សេងដល់Studioទៅវិញ។នេះជារឿងចម្លែកមួយរហូតមានអ្នកខ្លះសង្ស័យថាសោភា និងសង្សារថ្មីចែកផ្លូវគ្នាទៅហើយទៀតផង។តែក្នុងជំនួបតាមទូរស័ព្ទសោភា និយាយថានាងមិនមែននៅទំនេរទេគឺពិតជាមានសង្សារមែន ប៉ុន្ដែនាងនៅតែវាចាដដែលៗថាការបញ្ចេញមុខសង្សារគ្រប់ពេលមិនមែនជាជម្រើសរបស់នាងនោះទេ។នាងធ្លាប់សារភាពថាចង់សាងស្នេហ៍ដោយលាក់លៀម ហើយក៍គ្មានគម្រោងរៀបការជាលើកទី២ដែរ។
តារារួមអាជីពនៅហង្សមាសខ្លះបានសម្ដែងការភ័យជំនួសពេជ្រ សោភា ព្រោះថាពេលនេះនាងមានអាយុ៣៩ឆ្នាំទៅហើយតែមិនទាន់មានម្ចាស់បេះដូងពិតប្រាកដដូចគេនោះទេ ខណៈដែលអ្នកចម្រៀងរួមជំនាន់ដូចជាមាស សុខសោភា,ឱក សុគន្ធកញ្ញា និងសុគន្ធ និសា ជាដើមពួកគេសុទ្ធតែមានប្ដីអោបជារៀងរាល់រាត្រីរៀងៗខ្លួន។តារាខ្លះបាននិយាយក្រោយខ្នងសោភា ថាបើនាងនៅតែចង់បានគូស្នេហ៍ជាប្រុសក្មេងបែបនេះតទៅទៀតនោះប្រយ័ត្នជួបរឿង”អ្នកក្រមិនហ៊ាន អ្នកមានមិនចូល”ច្បាស់ជានៅមេម៉ាយសៅកែជាមិនខាន។តែសោភា ហាក់មិនសូវក្វល់ក្វាយឬគិតច្រើនលើរឿងស្នេហាមិនសមប្រកបនោះទេហើយរហូតមកដល់ពេលនេះនាងនៅតែប្រកាន់ទស្សនៈថាការងារនិងគ្រួសារជាជម្រើសទី១ ខណៈដែលស្នេហាជារឿងទី២។មានពេលខ្លះសោភា បានលើកឡើងទៀតថានាងរស់នៅតែម្នាក់ឯងដូចសព្វថ្ងៃនេះជីវិតពោពេញទៅដោយសិទ្ធិសេរីភាពពេញទំហ៊ឹង ហេតុនេះហើយនាងថាតើមេម៉ាយមានអីមិនល្អទៅ?
សូមបញ្ជាក់ថាពេជ្រ សោភា ត្រូវបានគេចាត់ទុកថាជាអ្នកមេម៉ាយទ្រព្យស្ដុកនាឆ្នាំ២០២២ នេះព្រោះនាងលេងម៉ូថរដយន្ដថ្លៃៗព្រមទាំងទិញផ្ទះវីឡារប្រណិតមិនចាញ់តារាល្បីៗនៅប្រទេសជិតខាងឡើយ។ការមានទ្រព្យណែនពេញកណ្ដាប់ដៃបែបនេះហើយធ្វើឲ្យអ្នកខ្លះសង្ស័យថាសោភា មានតាចិញ្ចឹមទៀតផង តែសោភា ថាលុយដែលនាងមាននាពេលបច្ចុប្បន្នកើតចេញពីការងារសិល្បៈតាមរយៈការច្រៀងសម្ដែងនិងរកស៊ីលក់ផលិតផលរួមទាំងការថតស្ពតទាំងឡាយ។ប៉ុន្ដែសោភា មិនដែលប្រាប់ពីប្រភពនៃប្រាក់ចំណូលពិតរបស់នាងថាក្នុង១ឆ្នាំអាចរកបានពីសិល្បៈនោះមានសរុបចំនួនប៉ុន្មានឡើយ។មិត្តភក្ដិនៅក្នុងសិល្បៈដែលជិតដិតសោភា ខ្លះលើកឡើងថាសោភា ជោគជោគជ័យតែអាជីពចម្រៀងទេ តែរឿងស្នេហាពិតជាសូន្យ…។តែសោភា ប្រឆាំងហើយថានៅលើលោកនេះគ្មាននារីណាម្នាក់ចង់ជួបរឿងដូចបទចម្រៀង”ទុក្ខស្រ្ដីប្ដីកាន់លុយ”នោះឡើយ។
គូរកត់សម្គាល់ថាក្រៅពីមិនសូវក្វល់ក្វាយឲ្យគេដឹងថានាងមានទុក្ខសោកក្នុងបេះដូងនោះពេលនេះពេជ្រ សោភា កំពុងតែកាន់សាសនាគ្រិស្ដយ៉ាងខ្ជាប់ខ្ជួនគឺដូចតារាចម្រៀងខេម ផងដែរ ព្រោះក្រៅពីនិពន្ធបទចម្រៀងនិងទន្ទេញប៉ារ៉ូលបទថ្មីៗសោភា ត្រូវអានសៀវភៅគម្ពីព្រះយេស៊ូគ្រិស្ដ។ដោយសារតែសោភា ហាក់ស៊ុបខ្លាំងគូសមទៅលើព្រះយេស៊ូគ្រិស្ដនោះទើបនាងបានចាត់ទុកថាសង្សារថ្មីរបស់នាងបានមកពីព្រះយេស៊ូប្រទានឲ្យជួបនាងទៀតផង។ប៉ុន្ដែនៅពេលសួរថាហេតុអីបានជាពេលនាងឈឺដេកពេ្យគូស្នេហ៍មិនដែលទៅអើតមើលដូចសង្សារគេផ្សេងៗទៀតនោះសោភា ថានោះមកពីនាងមិនចង់បង្ហាញ ពោលគឺនាងមិនដែលទម្លាក់កំហុសទៅលើសង្សារម្ដងណាឡើយ។
ក្រៅពីពេជ្រ សោភា តារាប៉ៈស្នេហ៍មិនសូវសមប្រកបមានដូចជានាងសុខ សោម៉ាវត្តី,ហ៊ិន ច័ន្ទនីរ័ត្ន និងកែវ និសា ជាដើម។ចំពោះសោភា វិញនាងនៅតែមានទស្សនៈថាបើជ្រើសគូស្នេហ៍ខុសម្ដងមិនមែនខុស១ជីវិតនោះទេ ពោលគឺនឹងរកអ្នកណាដែលសមប្រកបព្រមទាំងយល់ពីអាជីពរបស់នាងឲ្យបានច្បាស់លាស់។តែការស្វែងរកបុរសក្នុងក្ដីស្រម៉ៃរបស់សោភា ជាង១០ឆ្នាំមកនេះធ្វើឲ្យនាងនៅតែមិនទាន់ប្រាកដស្នេហ៍ថាប្រុសនោះជាម្នាក់ណានៅឡើយ៕