ភ្នំពេញ៖រយៈពេលជាង៤ឆ្នាំហើយដែលអ្នកនាងគង់ សុជាតិ នៅតែមិនទាន់អាចពពោះយកកូនភ្លោះប្រុសតាមសំណើររបស់ស្វាមីនាងលោកជា វិបុល បាននៅឡើយ ខណៈដែលពេលនេះលោកវិបុល ក៍លែងហ៊ានរំអុកភរិយាសំណព្វចិត្តរបស់លោកទៀតដែរព្រោះខ្លាចប៉ៈទង្គិចអារម្មណ៍ស្នេហ៍។ប៉ុន្ដែទោះជាមិនទាន់បានកូនថែមដូចក្ដីបំណងក៍មិនធ្វើឲ្យចំណងស្នេហាតារា១គូនេះរងភាពរង្គោះរង្គើរសារជាថ្មីម្ដងទៀតដែរ ព្រោះរយៈពេលចុងក្រោយនេះគេឃើញតែសុជាតិ-វិបុល រីករាយជាមួយគ្នាដូចគូស្នេហ៍យុវវ័យ។យ៉ាងណានោះមិនមែនថាលោកវិបុល បំភ្លេចរឿងចង់បានកូនម្ដងប្រុសដល់ទៅ២នាក់នោះទេ តែជាការរងចាំពេលវេលាអំណោយផលរបស់អ្នកនាងសុជាតិ ខណៈដែលពិធីការិនីជើងចាស់រូបនេះប្រាប់ថានៅពេលដែលស្រ្ដីអាយុកាន់តែច្រើនរឿងយកកូនត្រូវតែពិគ្រោះជាមួយក្រុមគ្រូពេទ្យជំនាញឲ្យបានច្បាស់លាស់ទើបល្អ។
គូរកត់សម្គាល់ថាទោះជាអ្នកនាងគង់ សុជាតិ មិនទាន់បំពេញចិតុ្តប្ដីក្មេងរឿងយកកូនថែមក្ដី ប៉ុន្ដែពេលនេះនាងមានកូនសរុប៣នាក់(កូនប្ដីមុន២នាក់)ហើយកាលពីថ្ងៃទី១៨ខែមិថុនាឆ្នាំ២០២២ នាងក៍បានកូនប្រសារជាលើកដំបូងផងដែរព្រោះកូនប្រុសទី១របស់នាងឈ្មោះម៉ៅ សាលភាពបុត្រ រៀបការប្រពន្ធដែលពេលនោះសុជាតិ កាន់តែមានភាពកក់ក្ដៅខ្លាំងណាស់ដោយសារតែលោកវិបុល បានស្រលាញ់និងចាត់ទុកកូនដើមនាងដូចជាកូនរបស់លោកដែរ។អ្នកនាងសុជាតិ មានជំនឿរចិត្តយ៉ាងមុតមាំថាក្នុងករណីដែលនាងមិនអាចយកកូនភ្លោះតាមបំណងស្វាមីនោះទេក៍នាងជឿរថាលោកវិបុល គ្មានការអាកអន់ស្រពោននាងចិត្តឡើយ។
គង់ សុជាតិ បានរៀបការជាមួយលោកជា វិបុល កាលពីថ្ងៃទី៩ខែវិច្ឆិការឆ្នាំ២០១៣ ដែលចំណងស្នេហាជាង៩ឆ្នាំនេះពួកគេទទួលបានកូនស្រី១ឈ្មោះជា សុជាតិនារី ហៅដូរី អាយុជាង៥ឆ្នាំ។អំឡុងពេលចាប់ដៃគ្នាជិត១០ឆ្នាំនេះសុជាតិ-វិបុល ធ្លាប់ជួបបញ្ហាធំតែម្ដងគត់ដែលស្ទើតែមិនអាចឲ្យអ្នកទាំងពីរកាន់ដៃគ្នាតទៅមុខទៀតបាននោះគឺកាលពីពាក់កណ្ដាលឆ្នាំ២០២០ លោកវិបុល ផ្ទុះរឿងស្នេហាក្រៅឆាកជាមួយចាន់ កែវនិមល ដែលធ្វើឲ្យសុជាតិ ឈឺចាប់និងតក់ស្លុតរហូតចូលពេទ្យទៀតផង។ប៉ុន្ដែពេលនេះ”ក្រោយភ្លៀង មេឃស្រឡះ”ហើយគូស្នេហ៍តារា១គូនេះចាប់ផ្ដើមត្រូវប៉ាន់រកលុយរួមគ្នាឡើងវិញ បន្ទាប់ពីកូវីដថមថយគេឃើញអ្នកនាងសុជាតិ និងស្វាមី តែងតែលេចមុខធ្វើMCតាមកម្មវិធីធំៗ រួមគ្នាស្ទើតែរៀងរាល់ថ្ងៃតែម្ដងទើបនាំឲ្យប្រាក់ចំណូលក៍កាន់តែកើននិងស្នេហាកាន់តែរឹងមាំ៕
