ភ្នំពេញ៖ម្ចាស់បទ”ទឹកភ្នែកស្វាមី ស្រីឡង់សេ”លោកហេង ប៊ុនលាភ បានប្រាប់ថាលោកគ្មានផែនការណ៍ចេញទៅរស់នៅសហរដ្ឋអាមេរិកឡើយ តែធ្លាប់ទៅលេងនៅទីនោះជាញឹកញាប់មែន ព្រោះមានបងប្អូននៅអាមេរិកហើយលោកចង់យកក្រឌីតផងដែរ។អតីតតារាចម្រៀងSSB រូបនេះថាមុនផ្ទុះកូវីដលោកតែងតែចេញទៅកម្សាន្ដនៅអាមេរិកក្នុង១ឆ្នាំម្ដង តែលោកវិលមកខ្មែរវិញតាមកាលកំណត់ និងមិនបានសុំសិទ្ធិរស់នៅអាមេរិកឡើយ។លោកថាបច្ចុប្បន្នលោកមានការងាររាជការដែលត្រូវបំពេញខណៈដែលការថតភាពយន្ដនិងច្រៀងតាមឆាកវិញគឺធ្វើទៅតាមពេលវេលា តែមូលហេតុដែលលោកមិនសូវឡើងឆាកព្រោះតែពិបាកទន្ទេញប៉ារ៉ូលឡើងវិញ ទើបធ្វើឲ្យបាត់មុខឬមិនបានឡើងច្រៀងទៅតាមកម្មវិធីផ្សេងៗតាមការអញ្ជើញរបស់ម្ចាស់កម្មវិធី។ប៉ុន្ដែលោកថាមើលឃើញប្អូនៗតារាស្រកក្រោយស្អាតៗនិងមានសម្ថភាពល្អបើទោះជាយើងធ្វើមិនបាន១០០% ក្ដី តែមានការវិវត្តន៍ទៅមុខហើយ។
ហេង ប៊ុនលាភ ក្រៅពីមានតួនាទីជាមន្រ្ដីយោធានោះលោកក៍ត្រូវបានគេដឹងថាមានឪពុកម្ដាយក្មេកជាអ្នកមានទ្រព្យស្ដុកនៅខេត្តពោធិសាត់ផងដែរ តែអ្វីដែលគូរឲ្យចាប់អារម្មណ៍នោះលោកប៊ុនលាភ បែជាប្រើជីវិតយ៉ាងសាមញ្ញបំផុតដោយជាទម្លាប់លោកបានជិះរថយន្ដCamry កញ្ចាស់ទៅវិញ។ទាក់ទងរឿងនេះលោកប៊ុនលាភ ថាលោកចង់រស់នៅធម្មតាៗទៅតាមលទ្ធភាពព្រោះលោកក៍គ្មានទ្រព្យធនច្រើនដែរហើយតាមពិតចង់ជិះរថយន្ដទំនើបដូចតែគេដែរ តែមិនមានលទ្ធភាពនោះទេ។លោកថារថយន្ដកាមរីកញ្ចាស់ដែលលោកប្រើនោះគឺជាឡានអនុស្សាវរីយ៍របស់លោក ហេតុនេះហើយបានជាលោកប្រើប្រាស់រថយន្ដមួយនេះមកដល់បច្ចុប្បន្ន ខណៈដែលលោកក៍មានរថយន្ដសម្រាប់ជិះចូលព្រៃ១គ្រឿងទៀតផងដែរ។
គូរបញ្ជាក់ថាលោកហេង ប៊ុនលាភ លេចធ្លោក្នុងអាជីពចម្រៀងឆ្នាំ២០០២ដល់២០០៦ ហើយលោកធ្លាប់បានថតភាពយន្ដចំនួន៨០រឿងក្នុងនោះមានដូចជារឿង”ព្រះលក្ខសិនវង្ស” និងរឿង”មរណៈមាតា”ជាដើម។តារាចម្រៀងដែលមានរូបរាងដូចខ្មែរអង្គររូបនេះមានប្រពន្ធជាង១០ឆ្នាំទៅហើយតែគកម្រឃើញលោកបណ្ដើរភរិយាទៅចូលរួមកម្មវិធីទើបធ្វើឲ្យអ្នកខ្លះសង្ស័យថាចំណងស្នេហាលោកប៊ុនលាភ និងភរិយា មានបញ្ហា។ត្រង់ចំណុចនេះលោកប៊ុនលាភ បញ្ជាក់ថាលោកនិងប្រពន្ធនៅស្រលាញ់គ្នាធម្មតាទេហើយពេលនេះទទួលបានចំណងដៃកូន៣នាក់(ស្រី១) ។ចំពោះរឿងលោកមិនដែលនាំប្រពន្ធចូលកម្មវិធីដូចគេនោះលោកថាមកពីភរិយាមិនសូវចូលចិត្តទៅកម្មវិធីជួបជុំគ្នាច្រើន ទើបលោកទៅណាច្រើនតែម្នាក់ឯងរហូតក្លាយជាទម្លាប់៕
