ភ្នំពេញ ៖ យុវជនម្នាក់ដែលគេស្គាល់ថាជាតារាទិកតុក (TikTok) កំពុងតែអង្គុយផឹកស៊ីជាមួយមិត្តភក្តិសុខៗ ស្រាប់តែលេចមុខក្រុមក្មេងស្ទាវ ប្រដាប់ដោយកាំបិត បានធ្វើសកម្មភាពដេញកាប់ប្រហារ បណ្តាលឱ្យរងរបួសរយះមាត់ រួចរត់គេចខ្លួនបាត់អស់ លុះសមត្ថកិច្ចចុះទៅដល់សួរនាំ បែរជាឆ្លើយថា ដួលម៉ូតូទៅវិញ។
ករណីហិង្សានេះ បានកើតឡើង កាលពីវេលាម៉ោង ៧និង៤០នាទីយប់ ថ្ងៃទី៣០ ខែសីហា ឆ្នាំ២០២២ នៅត្រង់ចំណុចភូមិទំនប់ ផ្លូវ៥៩៨ ស្ថិតក្នុងសង្កាត់ភ្នំពេញថ្មី ខណ្ឌសែនសុខ។
តាមប្រភពព័ត៌មានពីកន្លែងកើតហេតុ បានឱ្យដឹងថា មុនពេលកើតហេតុ គេបានឃើញយុវជនមួយក្រុម មានគ្នា៤ ទៅ៥នាក់ បានអង្គុយផឹកស៊ីជុំគ្នាយ៉ាងសប្បាយរីករាយ នៅត្រង់ចំណុចកើតហេតុ។ ក្នុងចំណោមយុវជនទាំងនោះ មានយុវជនម្នាក់ ត្រូវគេស្គាល់ថា ជាតារា TikTok ឈ្មោះ កា ខេធីផ្លេ (Ka KT Play) លុះដល់វេលាកើតហេតុ ស្រាប់តែមានក្មេងស្ទាវមួយក្រុម មានគ្នាជាង ១០នាក់ ជិះម៉ូតូ ២ទៅ៣គ្រឿង និងរថយន្តមួយគ្រឿងទៀត ហើយនៅក្នុងដៃ ប្រដាប់ដោយដាវ និងដុំថ្ម ស្ទើរគ្រប់ដៃ។
ប្រភពពីកន្លែងកើតហេតុ បន្តថា ពេលនោះ ក្រុមក្មេងស្ទាវទាំងនោះបានឈប់ ហើយចុះទៅកាប់ប្រហារលើយុវជនដែលកំពុងអង្គុយផឹកស៊ីទាំងនោះ បណ្តាលឱ្យយុវជនម្នាក់ រងរបួសរយះម្រាមដៃ និងយុវជនជាតារា TikTok រងរបួសរយះបបូរមាត់។ បន្ទាប់មក ក្រុមក្មេងស្ទាវទាំងនោះ បាននាំគ្នាគេចខ្លួនចេញពីកន្លែងកើតហេតុបាត់អស់ ដោយបន្សល់ទុកតែកាំបិត មួយដើមនៅកន្លែងកើតហេតុ។
ប្រភពដដែល បន្តទៀតថា ភ្លាមៗនោះ ជនរងគ្រោះដែលរងរបួសរយះម្រាមដៃ ត្រូវបានគ្នីគ្នាបញ្ជូនទៅសង្គ្រោះនៅឯមន្ទីរពេទ្យព្រះកុសុមៈ ភ្លាមៗ។ ស្របពេលនោះដែរ ក៏មានកម្លាំងកងរាជអាវុធហ្ថតខណ្ឌសែនសុខ បានចុះទៅធ្វើការអន្តរាគមន៍ និងបានធ្វើការសាកសួរទៅលើយុវជនជាតារា TikTok ម្នាក់នោះ ប៉ុន្តែបែរជាយុវជនម្នាក់នោះ មិនព្រមឆ្លើយប្រាប់ពីមូលហេតុ ដែលបណ្តាលឱ្យកើតជាអំពើហិង្សា កាប់ប្រហារគ្នានោះទេ បែរជាប្រាប់ទៅកម្លាំងកងរាជអាវុធហ្ថតខណ្ឌសែនសុខ ថារបួសដែលនៅលើបបូរមាត់របស់ខ្លួន គឺបណ្តាលមកពីជិះម៉ូតូដួលទៅវិញ។
ក្រោយពេលកើតហេតុ កម្លាំងកងរាជអាវុធហត្ថ បានប្រមូលវត្ថុតាង និងនាំយុវជនរងគ្រោះ ទៅកាន់មូលដ្ឋានកងរាជអាវុធហត្ថខណ្ឌសែនសុខ ដើម្បីធ្វើការសាកសួរ និងដាក់ពាក្យបណ្តឹងទៅតាមផ្លូវច្បាប់៕