ភ្នំពេញ ៖ បុរសម្នាក់ បានអះអាងថា មានជនសង្ស័យ បានធ្វើសកម្មភាពគាស់ផ្ទះរបស់គាត់ រួចចូលទៅលួចប្រមូលយកទ្រព្យសម្បត្តិនិងសម្ភារៈអស់ជាច្រើន ទើបគាត់ទទូចស្នើសុំអន្តរាគមន៍ពីលោកនាយប៉ុស្តិ៍នគរបាលដែលទើបឡើងកាន់តំណែងថ្មី ជួយស្រាវជ្រាវតាមចាប់ខ្លួនជនសង្ស័យ មកផ្តន្ទាទោស។
បុរសជាម្ចាស់ផ្ទះរងគ្រោះ បានសរសេរក្នុងគណនីហ្វេសប៊ុក របស់ខ្លួន ឈ្មោះ Sok Heng នៅវេលាម៉ោងជាង ៩យប់ ថ្ងៃទី១៣ ខែកញ្ញា ឆ្នាំ២០២២ ថា “អ្ហែងសាហាវណាស់អ្ហែង! ករណីចោរគាស់ផ្ទះ ផ្ទះលេខ១១អឺ ភូមិដំណាក់១ ក្រុម៦ សង្កាត់ស្ទឹងមានជ័យ២ ខណ្ឌមានជ័យ រាជធានីភ្នំពេញ ចន្លោះម៉ោងធ្វើសកម្មភាព ៣ៈ៣០ព្រឹក។ ទ្រព្យសម្បត្តិដែលបាត់បង់ រួមមាន ៖ Macbook pro 2017 ចំនួន ១គ្រឿង។ iPhone 12 pro max ចំនួន១គ្រឿង។ iPad pro 2021 ចំនួន១គ្រឿង។ iPhone 7 plus ចំនួន២គ្រឿង។ iPad mini ចំនួន១គ្រឿង។ iPad ធម្មតា ចំនួន១គ្រឿង និងAndriod ចំនួន២គ្រឿង។ ដូច្នេះបើបងប្អូនហាងលក់គ្រឿងអេឡិចត្រូនិក ប្រទះឃើញសម្ភារៈទាំងនេះ ជួយទំនាក់ទំនងមកគណនីហ្វេសប៊ុក ឈ្មោះ Sok Heng នេះផ្ទាល់ និងលេខទូរស័ព្ទ ០១៦៧២៩២២០, ០១៦៨៤៤១៩៧ និង ០១២២៦៩៨៦៤”។
ជុំវិញករណីនេះ ជនរងគ្រោះ បានបញ្ជាក់ថា គាត់បានដាក់ពាក្យបណ្តឹងរួចហើយ នៅប៉ុស្តិ៍នគរបាលស្ទឹងមានជ័យ២ ហើយសង្ឃឹមថា សមត្ថកិច្ច ជាពិសេសលោកមេប៉ុស្តិ៍ស្ទឹងមានជ័យ២ ដែលទើបតែឡើងថ្មី ជួយស្រាវជ្រាវតាមចាប់ខ្លួនក្រុមចោរទាំងនេះ យកមកផ្តន្ទាទោសឱ្យ ខាងតែបានផង៕