ខេត្តកំពង់ស្ពឺ ៖ រោងចក្រកាត់ដេរ ១កន្លែង ត្រូវបានអគ្គិភ័យឆាបឆេះ ដោយមិនដឹងមូលហេតុ បង្កឱ្យរងការខូចខាតសម្ភារៈ និងម៉ាស៊ីនដេរ ប្រមាណជាង៣០០គ្រឿង និងត្រូវបានកម្លាំងជំនាញ ប្រើរថយន្តពន្លត់អគ្គិភ័យ បាញ់ទឹកពន្លត់អស់ចំនួន ១១រថយន្ត ទើបអាចគ្រប់គ្រងស្ថានការណ៍បានទាំងស្រុង។
ហេតុការណ៍អគ្គិភ័យ បានកើតឡើង កាលពីវេលាម៉ោង ៤និង២០នាទីទៀបភ្លឺ ថ្ងៃទី៣០ ខែកញ្ញា ឆ្នាំ២០២២ នៅត្រង់ចំណុចរោងចក្រ លីវតាន មានទីតាំងស្ថិតនៅចំណុចភូមិព្រៃកេះ ឃុំព្រៃវិហារ ស្រុកគងពិសី។
អគាររោងចក្រដែលទទួលរងការឆាបឆេះ មានទំហំ ៩៥ម៉ែត្រ គុណនឹង ៥៤ម៉ែត្រ ធ្វើអំពីដែកប្រក់ស័ង្កសី។ ចំណែកសម្ភារៈ និងទ្រព្យសម្បត្តិដែលទទួលរងការខូចខាត រួមមាន ឆេះអគាររោងចក្រអស់ទាំងស្រុង ឆេះម៉ាស៊ីនដេរ ចំនួន៣០០គ្រឿង និងឆេះសម្ភារៈជាច្រើនទៀត មិនទាន់ដឹងចំនួនច្បាស់នៅឡើយ និងកំពុងសាកសួរបន្ត។ រីឯមូលហេតុ សមត្ថកិច្ចជំនាញ នៅមិនទាន់អាចសន្និដ្ឋានបាននៅឡើយថា ផ្តើមចេញពីបញ្ហាអ្វី ដោយកំពុងបន្តការស្រាវជ្រាវ។
នៅក្នុងប្រតិបត្តិការពន្លត់អគ្គិភ័យនេះ សមត្ថកិច្ចបានប្រើប្រាស់កម្លាំងសរុប ចំនួន៦២នាក់ និងរថយន្តពន្លត់អគ្គិភ័យ ចំនួន ១១គ្រឿង ដោយប្រើប្រាស់ទឹកបាញ់ពន្លត់ អស់ចំនួន ១១រថយន្ត។ ក្នងនោះកងកម្លាំងការិយាល័យបង្ការ-ពន្លត់អគ្គិភ័យនិងសង្គ្រោះ មានចំនួន ៩នាក់ ប្រើរថយន្តពន្លត់អគ្គិភ័យ ចំនួន២គ្រឿង។ កងកម្លាំងកងពលតូចលេខ៧០ ចំនួន ១៧នាក់ ប្រើរថយន្តពន្លត់អគ្គិភ័យ ចំនួន៥គ្រឿង។ កម្លាំងអធិការដ្ឋាននគរបាលស្រុកគងពិសី ចំនួន១៨នាក់ ប្រើរថយន្តពន្លត់អគ្គិភ័យ ចំនួន១គ្រឿង។ កងកម្លាំងអធិការដ្ឋាននគរបាលស្រុកបរសេដ្ឋ ចំនួន៦នាក់ ប្រើរថយន្តពន្លត់អគ្គិភ័យ ចំនួន១គ្រឿង។ កងកម្លាំងអធិការដ្ឋាននគរបាលស្រុកត្រាំកក់ ខេត្តតាកែវ ចំនួន៦នាក់ ប្រើរថយន្តពន្លត់អគ្គិភ័យ ចំនួន ១គ្រឿង និងកម្លាំងអធិការដ្ឋាននគរបាលស្រុកបាទី ខេត្តតាកែវ ចំនួន៦នាក់ ប្រើរថយន្តពន្លត់អគ្គិភ័យ ចំនួន១គ្រឿង៕