ខេត្តកណ្តាល ៖ ជនសង្ស័យមួយក្រុម បានធ្វើសកម្មភាពវាយកាប់ប្លន់ម៉ូតូមួយគ្រឿង របស់ប្រជាពលរដ្ឋ ហើយជិះរត់គេចខ្លួន តែត្រូវបានសមត្ថកិច្ចដេញតាមស្ទាក់ចាប់ឃាត់ខ្លួនបានជាបន្តបន្ទាប់ ចំនួន៧នាក់ នាំយកទៅចាត់ការតាមច្បាប់។
ការឃាត់ខ្លួនក្រុមជនសង្ស័យជាចោរប្លន់ទាំង៧នាក់នេះ ធ្វើឡើង កាលពីវេលាម៉ោង១ និង៥០នាទីរំលងអធ្រាត្រ ឈានចូលថ្ងៃទី១០ ខែវិច្ឆិកា ឆ្នាំ២០២២ នៅចំណុចផ្លូវជាតិលេខ៤ ភូមិអង្គស្នួលទី៣ ឃុំពើក ស្រុកអង្គស្នួល។
ជនសង្ស័យទាំង៨នាក់ដែលត្រូវបានចាប់ខ្លួន រួមមាន ទី១-ឈ្មោះផន សុផា ភេទប្រុស អាយុ១៨ឆ្នាំ មុខរបរសិស្ស រស់នៅភូមិត្រពាំងរាំង ឃុំព្រៃពួច ស្រុកអង្គស្នួល។ ទី២-ឈ្មោះឆែម សុខចាន់ ហៅវ៉េត ភេទប្រុស អាយុ១៧ឆ្នាំ មុខរបរមិនពិតប្រាកដ រស់នៅភូមិគោកពពេល ឃុំលំហាច ស្រុកអង្គស្នួល។ ទី៣-ឈ្មោះសម្បត្តិ រិទ្ធី ហៅធី ភេទប្រុស អាយុ១៦ឆ្នាំ មុខរបរមិនពិតប្រាកដ រស់នៅភូមិថ្នល់ទទឹង ឃុំដំណាស់អំម្ពិល ស្រុកអង្គស្នួល។ ទី៤-ឈ្មោះកៅ គីមហេង ភេទប្រុស អាយុ១៧ឆ្នាំ មុខរបរកម្មករ រស់នៅភូមិទូករទេះ ឃុំលំហាច ស្រុកអង្គស្នួល។ ទី៥-ឈ្មោះផល់ សុភានិត ហៅជូ ភេទប្រុស អាយុ១៦ឆ្នាំ មុខរបរកម្មករ រស់នៅភូមិព្រៃចំការ ឃុំលំហាច ស្រុកអង្គស្នួល។ ទី៦-ឈ្មោះញ៉េន សៀវយ៉ាវ ភេទប្រុស អាយុ១៧ឆ្នាំ មុខរបរកម្មករ រស់នៅភូមិទំនប់សាប ឃុំលំហាច ស្រុកអង្គស្នួល និងទី៧-ឈ្មោះម៉ុន ដារ៉ា ភេទប្រុស អាយុ១៣ឆ្នាំ មុខរបរកម្មករ រស់នៅភូមិតារ័ត្ន ឃុំលំហាច ស្រុកអង្គស្នួល (ប្រគល់ឱ្យអាណាព្យាបាលវិញ)។ ចំណែកជនសង្ស័យម្នាក់ទៀត ដែលកំពុងរត់គេចខ្លួន មានឈ្មោះគីម ចាន់ថា ភេទប្រុស អាយុ១៦ឆ្នាំ មុខរបរមិនពិតប្រាកដ រស់នៅភូមិត្រពាំងរាំង ឃុំព្រៃពួច ស្រុកអង្គស្នួល។
ចំណែកវត្ថុតាងដែលសមត្ថកិច្ចដកហូតបាន រួមមាន ៖ ១-ដាវ ចំនួន១ដើម ប្រវែងប្រហែល០,៦០ម៉ែត្រ។ ២-ម៉ូតូម៉ាកហុងដា ឌ្រីម សេ១២៥ ពណ៌ខ្មៅ ផលិតឆ្នាំ២០២១ លេខតួនិងលេខម៉ាស៊ីន 5971295 ពាក់ស្លាកលេខ តាកែវ 1Y-0715។ ៣-ម៉ូតូម៉ាកហុងដា ឌ្រីម សេ១២៥ ពណ៌ខ្មៅ ផលិតឆ្នាំ២០២១ លេខតួនិងលេខម៉ាស៊ីន 5292173 ពាក់ស្លាកលេខ ភ្នំពេញ 1HC-2559។ ៤-ម៉ូតូម៉ាកហុងដា ឌ្រីម សេ១២៥ ពណ៌ខ្មៅ ផលិតឆ្នាំ២០១៥ លេខតួនិងលេខម៉ាស៊ីន 8314808 ពាក់ស្លាកលេខ កំពង់ស្ពឺ 1D-8700។ និង៥-ម៉ូតូម៉ាកស៊ុយស៊ូគី និច ពណ៌ខៀវលាយស ផលិតឆ្នាំ២០១៩ លេខម៉ាស៊ីន AE52-351911 លេខតួ CE45F-351951 ពាក់ស្លាកលេខ ភ្នំពេញ 1HV-2749។ ចំណែកម៉ូតូបាត់បង់ ១គ្រឿង ម៉ាកហុងដា ឌ្រីម សេ១២៥។
តាមប្រភពពីសមត្ថកិច្ច បានឱ្យដឹងថា មុនពេលកើតហេតុ ប៉ុស្តិ៍នគរបាលរដ្ឋបាលពើក បានទទួលព័ត៌មានពីប្រជាពលរដ្ឋល្អ រាយការណ៍ថា ឃើញបក្ខពួកជនសង្ស័យមួយក្រុម បានធ្វើសកម្មភាពកាប់និងវាយប្លន់ម៉ូតូមួយគ្រឿង របស់ជនរងគ្រោះ នៅចំណុចកើតហេតុខាងលើ។
ក្រោយពីទទួលបានព័ត៌មានខាងល ប៉ុស្តិ៍នគរបាលពើក ប៉ុស្តិ៍ព្រៃពួច ប៉ុស្តិ៍ដំណាក់អម្ពិល ប៉ុស្តិ៍លំហាច និងផ្នែកនគរបាលយុត្តិធម៌ស្រុក បានរួមសហការគ្នា បានចេញទៅដល់កន្លែងកើតហេតុ និងដេញតាមស្ទាក់ ហើយឃាត់ខ្លួនជនសង្ស័យបានម្នាក់ ឈ្មោះ ផន សុផា និងម៉ូតូ ១គ្រឿង ហើយបាននាំជនសង្ស័យទៅអធិការដ្ឋាននគរបាលស្រុកអង្គស្នួល ដើម្បីសាកសួរបន្តតាមនីតិវិធី។
ក្រោយឃាត់ខ្លួនបាន ជនសង្ស័យខាងលើ បានឆ្លើយសារភាពថា ខ្លួននិងបក្ខពួក ចំនួន៧នាក់ ដែលមានឈ្មោះដូចខាងលើ បានរួមគ្នាធ្វើសកម្មភាពដេញវាយនិងកាប់ជនរងគ្រោះ ប្លន់យកម៉ូតូមែន។
ក្រោយពីស្តាប់ចម្លើយឈ្មោះ ផន សុផា រួចមក ទើបផ្នែកជំនាញ បានសហការជាមួយប៉ុស្តិ៍នគរបាលពើក ប៉ុស្តិ៍ព្រៃពួច ប៉ុស្តិ៍លំហាច បានស្រាវជ្រាវស្វែងរកមុខសញ្ញាជាបក្ខពួក ហើយឃាត់ខ្លួនបានជាបន្តបន្ទាប់ សរុបចំនួន ៧នាក់ខាងលើ យកទៅសាកសួរបន្តតាមនីតិវិធី៕