អ្នកធ្វើដំណើររាប់ពាន់នាក់បានសម្រុកចូលអាកាសយានដ្ឋានតូចមួយនៅកោះ Jeju របស់ប្រទេសកូរ៉េខាងត្បូងកាលពីថ្ងៃពុធ ទី២៥ខែមករាឆ្នាំ២០២៣ប្រជែងគ្នាឡើងយន្តហោះបន្ទាប់ពីការពន្យារពេលដោយព្យុះព្រិលខណៈដែលអាកាសធាតុរដូវរងាបានគ្របដណ្តប់អាស៊ីបូព៌ារយៈពេលពីរថ្ងៃជាប់គ្នា។
មន្ត្រីនៅក្រសួងមហាផ្ទៃ និងសុវត្ថិភាពរបស់កូរ៉េខាងត្បូង មិនបានរាយការណ៍ភ្លាមៗអំពីការខូចខាត ឬរបួសធ្ងន់ធ្ងរណាមួយពីសីតុណ្ហភាពក្រោមសូន្យ និងលក្ខខណ្ឌទឹកកកដែលបានប៉ះពាល់ដល់ប្រទេសភាគច្រើនចាប់តាំងពីថ្ងៃអង្គារ។
យ៉ាងហោចណាស់ផ្លូវចំនួនប្រាំបី និងផ្លូវសមុទ្រចំនួន ១០ នៅតែត្រូវបានបិទគិតត្រឹមរសៀលថ្ងៃពុធ។ ផ្ទះប្រហែល ១៤០ខ្នងនៅក្នុងរដ្ឋធានីសេអ៊ូល និងតំបន់ក្បែរនោះបានរាយការណ៍ថាបានគាំងម៉ាស៊ីនបូមទឹក ឬបំពង់បង្ហូរប្រេង ដោយសារសីតុណ្ហភាពធ្លាក់ចុះដល់ដក១៥ទៅ ដក២០ អង្សាសេនៅទូទាំងដីគោក។
នៅប្រទេសជប៉ុនព្រិលធ្លាក់ខ្លាំងនិងសីតុណ្ហភាពត្រជាក់ខ្លាំងបានរំខានដល់ការធ្វើដំណើរ។ប្រធានខុទ្ទកាល័យលោក Hirokazu Matsuno បានប្រាប់អ្នកយកព័ត៌មានថា យ៉ាងហោចណាស់មនុស្សម្នាក់បានស្លាប់ហើយអ្នកស្លាប់ពីរនាក់ទៀតកំពុងត្រូវបានស៊ើបអង្កេតពាក់ព័ន្ធនឹងអាកាសធាតុត្រជាក់។
អាកាសចរណ៍ក្នុងស្រុករួមមាន ANA និង Japan Airlines បានលុបចោលជើងហោះហើរជាង ៣០០ខណៈដែលសេវារថភ្លើងត្រូវបានផ្អាក ឬពន្យារពេលនៅភាគខាងជើងប្រទេសជប៉ុនកាលពីថ្ងៃអង្គារ។
ទោះជាយ៉ាងណាក្តីចរាចរណ៍ផ្លូវអាកាសបានវិលមករកភាពប្រក្រតីវិញ បន្ទាប់ពីជើងហោះហើររាប់រយជើងក្នុង និងចេញពីទីក្រុង Jeju ត្រូវបានផ្អាកកាលពីថ្ងៃអង្គារ ដោយសារតែខ្យល់បក់ខ្លាំង និងព្រិលធ្លាក់ធ្វើឱ្យអ្នកដំណើរប្រមាណ ៤០០០០នាក់ ដែលបានទៅលេងកោះរមណីយដ្ឋានសម្រាប់ថ្ងៃឈប់សម្រាកបុណ្យចូលឆ្នាំថ្មីជាប់គាំង៕