ភ្នំពេញ ៖ ប្តីប្រពន្ធ ២នាក់ បានកើតមានជម្លោះនឹងគ្នា រហូតដល់ស្ត្រីជាប្រពន្ធ នាំកូនប្រុសស្រី២នាក់ ចុះចេញពីបន្ទប់ជួល ទៅនៅស្រុកកំណើត អស់រយៈពេលជាង១សប្តាហ៍មកហើយ ទុកឱ្យប្តីនៅតែឯង ស្រាប់តែក្រោយមក បុរសជាប្តី បានសម្រេចចិត្តចងកសម្លាប់ខ្លួន ដោយបានបន្សល់ទុកលិខិតបណ្តាំ ១ច្បាប់ បញ្ជាក់ថានឹងតាមចងពៀរជាមួយប្រពន្ធ គ្រប់ៗជាតិ។
ករណីបុរសខូចចិត្តប្រពន្ធរត់ចោល ធ្វើអត្តឃាតដោយចងកសម្លាប់ខ្លួននេះ បានកើតមានការភ្ញាក់ផ្អើលឡើង កាលពីវេលាម៉ោង ១១និង៣០នាទីព្រឹក ថ្ងៃទី០៩ ខែមីនា ឆ្នាំ២០២៣ នៅចំណុចបន្ទប់ជួល លេខ៨ តាមផ្លូវបេតុង ភូមិចុងថ្នល់ខាងកើត សង្កាត់ទឹកថ្លា ខណ្ឌសែនសុខ។
បុរសដែលចងកសម្លាប់ខ្លួន មានឈ្មោះកែវ សុខគឿន អាយុ៤២ឆ្នាំ មុខរបររត់ម៉ូតូកង់បី ស្នាក់នៅបន្ទប់ជួលកើតហេតុខាងលើ និងមានស្រុកកំណើតនៅខេត្តកណ្តាល។
តាមសម្តីកូនស្រីរបស់ជនរងគ្រោះ បានរៀបរាប់ប្រាប់ថា មុនពេលកើតហេតុ រយៈពេលប្រមាណជាង ១សប្តាហ៍ ឪពុកម្តាយរបស់នាង បានឈ្លោះគ្នា បន្ទាប់មកម្តាយបាននាំរូបនាង និងប្អូនប្រុសតូច ត្រឡប់ទៅនៅស្រុកកំណើត ឯខេត្តកណ្តាល ដោយទុកឱ្យឪពុកនៅបន្ទប់ជួលតែម្នាក់ឯង។
កូនស្រីជនរងគ្រោះ បន្តថា តាំងពីពួកនាងចេញមករស់នៅស្រុកកំណើត ឪពុកនាងតែងទូរស័ព្ទមកលេងពួកនាងជាកូនៗជាប្រចាំ និងតែងពោលពាក្យនឹកកូនៗខ្លាំងណាស់។ លុះមុនពេលកើតហេតុ កាលពីថ្ងៃទី០៧ ខែមីនា ឆ្នាំ២០២៣ ឪពុកបានទូរស័ព្ទមកប្រាប់នាងថា គាត់នឹកអាអូនខ្លាំងណាស់ (កូនប្រុសតូច) និងថែមទាំងប្រាប់ឱ្យនាងដឹកប្អូនទៅលេងគាត់ទៀតផង ស្រាប់តែយប់ឡើង នាងទូរស័ព្ទមកឪពុក មិនចូល លុះមានការសង្ស័យ ទើបនៅព្រឹកថ្ងៃទី០៨ ខែមីនា ឆ្នាំ២០២៣ នាងបានជិះម៉ូតូមកពីផ្ទះ ឯខេត្តកណ្តាល មកបន្ទប់ជួលឪពុក លុះមកដល់ ឃើញម៉ូតូកង់បីឪពុក ចតចោលខាងក្នុងរបង មិនបានចេញទៅរត់កង់បីនោះទេ ប៉ុន្តែទាំងទ្វាររបង និងទ្វារបន្ទប់បានចាក់សោជាប់ ទោះជានាងស្រែកហៅយ៉ាងណាក៏មិនឮឪពុកឆ្លើយសោះ ទើបនាងសម្រេចផ្លោះរបងចូលទៅខាងក្នុង និងឃើញមានទួរណឺវីស១ ក៏យកមកឆ្កឹះ គន្លឹះទ្វារ រហូតដល់របើក ស្រាប់តែពេលចូលទៅដល់ ប្រទះឃើញឪពុករបស់នាង បានចងកស្លាប់ក្នុងបន្ទប់ ក៏ប្រញាប់ផ្តល់ដំណឹងទៅម្តាយនិងសាច់ញាតិ ព្រមទាំងរាយការណ៍ប្រាប់សម្ថកិច្ច ចុះមកជួយអន្តរាគមន៍តែម្តង។
ក្រោយកើតហេតុ សមត្ថកិច្ចមូលដ្ឋាន សហការជាមួយសមត្ថកិច្ចជំនាញការិយាល័យកោសល្យវិច័យ ព្រមទាំងវេជ្ជបណ្ឌិត នង សុវណ្ណរ័ត្ន គ្រូពេទ្យកោសល្យវិច័យអមសាលាដំបូងរាជធានី បានចុះមកពិនិត្យ រួចបញ្ជាក់ថាជនរងគ្រោះពិតជាស្លាប់ដោយសារធ្វើអត្តឃាត (ចងក) ប្រាកដមែន ដោយប្រើខ្សែអង្រឹង ចងកជាប់នឹងធ្នឹមដំបូលបន្ទប់ជួល បណ្តាលឱ្យស្លាប់។
ដោយឡែក នៅក្បែរសព មានលិខិតបណ្តាំមួយច្បាប់ ដែលជនរងគ្រោះសរសេរដោយផ្ទាល់ដៃ បន្សល់ទុកឱ្យប្រពន្ធ ឈ្មោះណាត ដោយមានខ្លឹមសារទាំងស្រុងថា “ណាត ពាក្យដែលយើងសន្យានឹងគ្នា អូនបែរជាបំភ្លេច អ៊ីចឹងពេលដែលខ្ញុំស្លាប់ទៅជាខ្មោច ខ្ញុំនឹងតាមចងពៀរជាមួយណាត ឯង គ្រប់ៗជាតិ…”។
សពជនរងគ្រោះ ត្រូវបានសមត្ថកិច្ចប្រគល់ឱ្យក្រុមគ្រួសារ ដើម្បីរៀបចំធ្វើបុណ្យតាមប្រពៃណី៕