អគ្គលេខាធិការអង្គការសហប្រជាជាតិលោក Antonio Guterres កាលពីថ្ងៃព្រហស្បតិ៍បានអំពាវនាវឱ្យមានបទឈប់បាញ់យ៉ាងហោចណាស់បីថ្ងៃឬ៧២ម៉ោងនៅក្នុងប្រទេសស៊ូដង់ក្នុងពិធីបុណ្យ Eid al-Fitr ដែលជាការបិទបញ្ចប់ខែដ៏ពិសិដ្ឋនៃបុណ្យរ៉ាម៉ាដាន។
លោក Guterres បានប្រាប់អ្នកសារព័ត៌មានដោយបន្ថែមថា យើងបានទាក់ទងជាមួយភាគីនានាយើងជឿថាវាអាចទៅរួច។យើងកំពុងរស់នៅគ្រាដ៏សំខាន់មួយនៅក្នុងប្រតិទិនមូស្លីម។ ខ្ញុំគិតថានេះជាពេលវេលាដ៏ត្រឹមត្រូវសម្រាប់បទឈប់បាញ់ដើម្បីរក្សាសន្តិសុខ។
លោក Guterres បានបន្ថែមថា ការផ្អាកនេះនឹង អនុញ្ញាតឱ្យជនស៊ីវិលដែលជាប់គាំងនៅក្នុងតំបន់ជម្លោះអាចរត់គេចខ្លួន និងស្វែងរកការព្យាបាល អាហារ និងការផ្គត់ផ្គង់ចាំបាច់ផ្សេងទៀត។លោកGuterres បានបន្ថែម។
មនុស្សជាង៣០០នាក់ត្រូវបានសម្លាប់ចាប់តាំងពីការប្រយុទ្ធគ្នាបានផ្ទុះឡើងកាលពីថ្ងៃសៅរ៍រវាងកងកម្លាំងដែលស្មោះត្រង់នឹងមេទ័ពរបស់ប្រទេសស៊ូដង់លោក Abdel Fattah al-Burhan និងអនុប្រធានរបស់គាត់គឺលោក Mohamed Hamdan Daglo ដែលបញ្ជាកងកម្លាំងគាំទ្ររហ័ស (RSF) ។
RSF ប្រកាសបទឈប់បាញ់រយៈពេល ៧២ម៉ោង
ក្រុមទាហានប៉ារ៉ាស៊ូដង់របស់កងកម្លាំងគាំទ្ររហ័ស (RSF) បានប្រកាសថាខ្លួននឹងចាប់ផ្តើមបទឈប់បាញ់ក្នុងពេលឆាប់ៗនេះបើទោះបីជាមានការប្រយុទ្ធគ្នាយ៉ាងខ្លាំងក្លាជាមួយកងទ័ពនៅក្នុងរដ្ឋធានី Khartoum ក៏ដោយ។
RSF បាននិយាយនៅក្នុងសេចក្តីថ្លែងការណ៍មួយថា ខ្លួននឹងសង្កេតមើលបទឈប់បាញ់រយៈពេល ៧២ ម៉ោង ដែលនឹងចូលជាធរមាននៅម៉ោង ៦ ព្រឹកនៅថ្ងៃសុក្រ ដែលជាការចាប់ផ្តើមនៃថ្ងៃឈប់សម្រាករបស់ជនជាតិមូស្លីម Eid al-Fitr ។
សេចក្តីថ្លែងការណ៍បាននិយាយថាបទឈប់បាញ់ស្របគ្នានឹងពិធីបុណ្យEid al-Fitr ដ៏ប្រពៃហើយដើម្បីបើកច្រក របៀងមនុស្សធម៌ដើម្បីជម្លៀសប្រជាពលរដ្ឋនិងផ្តល់ឱកាសឱ្យពួកគេស្វាគមន៍ក្រុមគ្រួសាររបស់ពួកគេ។
រហូតមកដល់ពេលនេះ យ៉ាងហោចណាស់មនុស្ស ៣៥០នាក់ត្រូវបានសម្លាប់ក្នុងការប្រយុទ្ធគ្នា។ជនស៊ីវិលរាប់ពាន់នាក់បានភៀសខ្លួនចេញពីទីក្រុង Khartoum ហើយមនុស្សមួយចំនួនធំក៏បានឆ្លងចូលទៅក្នុងប្រទេស Chad ដើម្បីភៀសខ្លួនពីការប្រយុទ្ធគ្នានៅក្នុងតំបន់ភាគខាងលិចនៃទីក្រុង Darfur។
កូរ៉េខាងជើងនិងជប៉ុន បញ្ជូនយន្តហោះយោធាទៅជម្លៀសពលរដ្ឋ
ទីភ្នាក់ងារសារព័ត៌មានយ៉ុនហាប់បានចេញផ្សាយកាលពីថ្ងៃសុក្រថាប្រទេសកូរ៉េខាងត្បូងបានសម្រេចបញ្ជូនយន្តហោះយោធាទៅជម្លៀសពលរដ្ឋរបស់ខ្លួននៅក្នុងប្រទេសស៊ូដង់។
ប្រព័ន្ធផ្សព្វផ្សាយខាងលើបាននិយាយថា ពលរដ្ឋកូរ៉េខាងត្បូងចំនួន ២៥នាក់រស់នៅក្នុងប្រទេសស៊ូដង់ ហើយត្រូវបានគេដឹងថាមានសុវត្ថិភាព។
ជាមួយគ្នានេះដែរយន្តហោះរបស់កងកម្លាំងស្វ័យការពារជប៉ុនមួយគ្រឿងបានចាកចេញទៅកាន់ប្រទេស Djibouti កាលពីថ្ងៃសុក្រ ដើម្បីត្រៀមជម្លៀសជនជាតិជប៉ុនចេញពីប្រទេសស៊ូដង់ ដែលជាកន្លែងការប៉ះទង្គិចគ្នាផ្នែកយោធាកាន់តែខ្លាំងឡើង។
យន្តហោះដឹកជញ្ជូន C-130 បានចាកចេញពីមូលដ្ឋានអាកាស ដើម្បីទៅជម្លៀសពលរដ្ឋជប៉ុនចំនួន ៦៣ នាក់នៅក្នុងប្រទេសស៊ូដង់ ដែលភាគច្រើននៅក្នុងរដ្ឋធានី Khartoum ៕